LUKAS 19 - Kalate Zambe Nnomo a Mfefe Mfefé Nkôñelan

Zaké

¹ Yésus a nga nyiin e Yérikô a tulane tison.

² E nde môt éziñ, jôé na Zaké, évete benyoñe *toya a nkukum

³ a mbe a jeñe na a yen za a ne Yésus; ve a nji bo ngu, amu jama bôt a amu a mbe étun.

⁴ Ane a nga mate mbil ôsu a bet élé Sikomor na a yene nye, amu Yésus a nga yiane lôt e vôm ate.

⁵ Eyoñe Yésus a nga kui e vôm ate, a nga bete mis a jô nye na: A Zaké, bo'o avôle ya sis; amu ma yiane tabe e *nda jôé den.

⁶ Zaké a nga ji'a sis a nyoñe nye a mevak.

⁷ Eyoñe bôt be yeneya jame te, bese be nga ke ba kobô menyiñ be jô'ô na: E nne a kômeya ke tabe e be mbo *abé.

⁸ Ve Zaké a nga subu ôsu a jô Nti na: Tane yen, a Nti, ma ve bingôngole bi bôt éfase jia ya akume dam, a nge me nga nyoñe jôme be môt nalé a too te yian, ma bulane nye je biôme binyin.

⁹ Yésus a nga jô nye na: E den émiene nyô, ényiñ é soya asu e *nda nyô, amu nyôna a ne fe e mone Abraham.

¹⁰ Amu Mona môt a nga zu jeñ a nyii jôm é nga jañ.

Nkana bemin

¹¹ Bôt be kele ôsu a vô'ôlô, e nde Yésus a beta beté *nkana ôfe, amu a mbe bebé Yérusalém, ôsimesan ô too bôte na: éjôé Zambe é mbe na ja yiane yené été été.

¹² Ane ñhe a nga jô na: Ewôlô môt éziñ é nga ke si é ne ôyap asu ya nyoñ éjôé a bulane fe.

¹³ A nga loon awôme ya bebo bisaé bé a kee be bemin awôm a jô be na: bo'one be na be bo abui akekui ma ye so.

¹⁴ Ve bôte ya si jé be mbe be vini'i nye, a be nga lôme bôt e mvuse jé be jô na: bi nji kômbô na nyôlé ate a jôô bia.

¹⁵ Eyoñ a nga bulan, mvuse nyoñan éjôé, a nga bo na be loone nye e bôt a nga ve moné, asu ya na *a yem aval avé môt ase a nga bo na moné a bo abui.

¹⁶ Nyô ôsu a nga zu a jô na: A Masa, e mine wôé a biaéya bemin awôm.

¹⁷ A nga jô nye na: Mvo'é, mbamba mbo ésaé; ô nga bo *zôsôô a biôme tyôtyoé, nyoñe éjôé bitison awôm.

¹⁸ Nyô baa a nga zu a jô na: A Masa, mine wôé a biaéya betan.

¹⁹ A nga jô nye na: wo fe, jô'ô bitisone bitan.

²⁰ E mfe a nga zu a jô na: A Masa, e mine wôé me nga ba'ale mvulekan éfus éyé été e nye nyô,

²¹ amu me nga ko wo woñ, amu ô ne e môt a ne teke bo fiañga; wo nyoñ e jôm ô nji ke bôôé, wo kôan e jôm ô nji ke bé.

²² A nga jô nye na: Ma ye kobô wo ajô, me bela'ane bifia biôé, a mbia mbo ésaé; ô mbe ô yeme na me ne teke bo fiañga; na ma nyoñ e jôm me nji ke bôôé, a kôan e jôme me nji ke bé;

²³ amu jé ñhe ô nji ke futi moné wom e bañ, e mebulane mam, me nga ye vaa nye a nseñge'

²⁴ Wôna a nga jô e ba be mbe valé na: Nyônane nye min a ve nye e môt a bili bemin awôm.

²⁵ Be nga jô nye na: A Masa, a bili bemin awôm.

²⁶ Ma jô mia de na: ba ye ve nyô a bili, ve nyô a nji bi ba ye vaa ja'ane jôm a bili.

²⁷ Jam afe na: besiñe bam be nji kômbô na me jôô be, za'ane be va a tyi'ane be *tyiñ me too.

²⁸ Eyoñ a nga mane kobô nalé, Yésus a nga tebe ôsu a bet e mfa'a ya Yérusalém.

Yésus a nyiin e Yérusalém

²⁹ Eyoñ a nga kui bebé Bétfajé a Bétani, e mfa'a nkôl ba loone beôlivié, Yésus a nga lôme bebaé ya beyé'é bé

³⁰ a jô'ô na: Kelane nlam ô ne mia ôsu le: éyoñe mia ye nyiin été, mia ye koone mon éjakas ntiñetan, môt éziñ a ngenane te bet été, ti'ane nye a za'ane nye.

³¹ Nge môt éziñ a sili mia na: amu jé mia tii nye? Mia ye jô nye na: Nti a kômbô nye.

³² E ba be nga lômban, be nga ke a koon avale Yésus a nga jô be.

³³ Mbôlô be mbe be ti'i mon éjakas, e bôt be mbee nye be nga jô be na: Amu jé mia tii mon éjakas'

³⁴ Be nga yalane na: Nti a kômbô nye.

³⁵ A be nga zuu Yésus mon éjakas, be nga bôôé mengômesane map été yôp a bo na Yésus a bet été yôp.

³⁶ Nté ôse a mbe a wulu'u, bôte ke ba zu ba taa mengômesane map e zene yôp.

³⁷ Eyoñ a ntoo bebé Yérusalém, alumbu nkôle beôlivié, njalan a mevak e nde beyé'é bese nsamba wua be nga taté na ba kañe Zambe tyiñe yôp, amu bitua bi mam bise be nga yen.

³⁸ Be mbe be jô'ô na: Ebotan é bo'o be njô bôt, nyô a zu a jôé Nti! Mvo'é e yôb été, Duma e mevôm ma dañ ôyabe yôp.

³⁹ Befarizieñ b'éziñ, ézezañe jama bôt, be nga jô Yésus na: A Nye'ele bamé'é beyé'é bôé.

⁴⁰ A nga yalane na: Ma jô mia de na: nge ba tabe bivô, *mekok ma ye yôtan!

⁴¹ Valé tison é ntoo nye bebé, Yésus, éyoñ a yeneya je, a nga yi je a jô na:

⁴² Nge ô mbe ô yemek, wo fe, e môse wu, e mam me mbe ve wo *mvo'é! Ve éyoñe ji me ne nsolan e mise môé.

⁴³ Melu ma ye zu be wo e mme mete besiñe bôé ba ye bômane wo a minka'alé, ba ye futi wo e njiñelete wob été a bametane wo mimfa'a mise;

⁴⁴ ba ye ko'o wo a bone bôé ézezañe jôé, a ba ye bo te li'i wo akok e bete di avo'o yôp, amu ô nji ke yem éyoñe be nga zu jome wo.

Yésus a titane bekuane biôm e * nda Zambe

⁴⁵ A nga nyiin e *nda Zambe a taté na a titane bebo makit,

⁴⁶ a jô'ô be na: E ne ntilane na: E *nda jam ja ye bo ndaa meye'elan. Ve mia, mi boya je e mbas ako'o miñwuwup.

⁴⁷ A mbe a ye'ele'e melu mese e *nda Zambe. A minlô betuni, *beyeme bekalate a bivete y'ayoñ be mbe be jeñek ane be ne bo nye na a wu;

⁴⁸ Ve be mbe teke yem avale be bo, amu bôte bese be mbe be tyele nye biyaé.