LUKAS 18 - Kalate Zambe Nnomo a Mfefe Mfefé Nkôñelan

Nkana mbia ntyi'i mejô

¹ Yésus a nga kane be *nkana asu ya liti na: bia yiane ye'elan éyoñ ése teke tek.

² Nye na: E *ntyi'i mejô éziñ a nga too e tison teke ko Zambe woñ, teke semé môt éziñ.

³ E nkuse minga éziñ ô mbe e tison éte ô bo'o ô za'a jô nye na: tyi'i ma ajô e zañe bia e nsiñe wom.

⁴ Ayab éyoñ, a nji kañese. Ve a nga su'ulane jô émiene na: me kusa bo te ko Zambe woñ nge semé môt éziñ,

⁵ ve da na amu e nkuse minga wu wo ndeñele ma, ma ye tyi'i nye ajô, a za su'ulane zu bôé ma nlô.

⁶ E Nti a nga beta jô na: Wô'an ane mbia *ntyi'i mejô a jô.

⁷ Ye Zambe a ye bo te tyi'i mejô mintobane mié, e mmie mia yône be nye alu baa *môs, a ye yange ayap mfa'a wop'

⁸ Ma jô mia de na: A ye ji'a tyi'i be mejô. Ve éyoñe Mona môt a ye so, ye a ye fo'o koone mbunan e *si nyô'

Mone Farizieñ a e nyoñe toya

⁹ A nga beta kane *nkana wu asu bôte b'éziñ be mbe be buni'i bebiene na be ne *zôsôô, be biasé'é bôte bevok;

¹⁰ nye na: bôte bebaé be nga bete *nda Zambe na be ye'elan: wua a mbe Farizieñ, nyô mbo'o *nyoñe toya.

¹¹ Farizieñ, tetele, a nga ye'elan avale di e *nlem été: A Zambe, ma ve wo akéva amu me nji bo ane bôte bevo'o bese e mbe ba wôlé éza biôm, ékotekot, *mejian, nge ane *nyoñe toya nyô;

¹² ma tyi bidi biyoñ bibaé sondô ase, ma ve *ngab awômô ya biôme bise ma bi.

¹³ E *nyoñe toya a nga tele ôyap, teke ayo'o ebiene ya fombô yôp, ve a kutuk tôé a jô'ô na: A Zambe, koo ma éngôngo, ma mbo *abé.

¹⁴ Ma jô mia de na: a nga siliki e *nda jé a mbili mekabe, ve saa ñhe môte mbok. Amu nyô ase a bete émiene yôp, a ye silibane si, a nyô a sili émiene si, a ye betebane yôp.

Bone be bongô

¹⁵ Bôt be nga soo nye ja'ane *bon be ndôme bialé na a nnambe be. Ve beyé'é, éyoñe be yeneya jame te, be nga ve be bijô.

¹⁶ A Yésus a nga bo na be loone be a jô na: Jôka'an bone be bongô be zu be ma, a te kamane be jame te; amu éjôé Zambe é ne asu ba be ne ane be.

¹⁷ Ma jô mia de bebela na: Nyô ase a ye bo te nyoñ éjôé Zambe ane mone mongô a ye bo teke nyiin été.

Nkukum ésoé ndôman

¹⁸ Evet éziñ é nga sili Yésus nsili na: A mbamba nye'ele, ma yiane bo jé na me nyoñ ényiñe ya nnôm éto ane ngap'

¹⁹ Yésus a nga jô nye na: Amu jé wo loone ma mbamba? Teke môt a ne mbamba, nga ve Zambe étam.

²⁰ Wo yeme mebendé na: te bo mejian; te wôé môt; te wup; te bôte môt ajô; semé'é ésoo baa nyua.

²¹ Nye na me maneya ba'ale mam mete mese aso mongô.

²² Yésus, éyoñ a maneya vô'ôlô nye, a nga jô nye na: Jame da e ngenane da jembane wo: Ku'an e biôme bise ô bili, kabe bie bingôngole bi bôt, a wo ye bi mefok e yôp. Wôna za'ak a tôñe ma.

²³ Eyoñ a nga wô'ô nalé, a nga dañe bo éyôé, amu a mbe étua kum.

²⁴ Eyoñ a nga yene nalé; Yésus a nga jô na: Abim ayaé e né e be ba be bili akume na be nyiin éjôé Zambe!

²⁵ Amu da dañe tyi'ibi na kamel a tulan *abé ôndôndo, a dañe na nkukum ô nyiin éjôé Zambe.

²⁶ Ba be mbe be vô'ôlô nye be nga jô na: Ajô te za a ne nguleya nyiiban'

²⁷ Yésus a nga yalane na: Jam e se nguleya boban e be bôt, e ne boban mfa'a Zambe.

²⁸ Pierre nye na: Tame yen: bi nga li'i biôm bi mbe ébiangan a bi nga tôñe wo.

²⁹ Yésus a nga yalane be na: bebela, ma jô mia de na: teke môt, éyoñ a maneya li'i *nda, minga, bobenyañ, bebiaé nge *bon amu éjôé Zambe,

³⁰ a bo te nyoñe biôm abui éyoñe ji, a ényiñe ya nnôm éto éyoñe ja zu.

Yésus a kate foé y'awu a ñwômane soñe wé

³¹ Yésus a nga nyoñe beyé'é awôm a bebaé e fefele jé a jô be na: Tama yenan, bia ke e Yérusalém; a e mam mese bekulu mejô be nga tili ajô Mona môt ma ye tôéban.

³² Amu a ye keeban e be bikuu; ba ye woé nye, a kpwe'ele nye, ba ye tui nye menden

³³ a éyoñe be maneya bôme nye, ba ye wôé nye; a e môse lale a ye wômô.

³⁴ Ve be nji wô'ô jôm; mejô mete me mbe be nsolan; be mbe teke yem atinane y'été.

E ndindime ya Yérikô

³⁵ Mbôlô Yésus a mbe bebé Yérikô, e ndindim éziñ ô mbe ô too e fefele *zen ô jaké'é biôm.

³⁶ A nga wô'ôtane ndulu bôt a lôtôk a sili jam e mbe.

³⁷ Be nga kate nye na: Yésus ya Nazarét a lôt.

³⁸ Ane a nga yôtane na: A Yésus, mone David, koo ma éngôngo!

³⁹ E ba be mbe be wulu'u ôsu, be nga komekane nye na a tabe évô, ve a mbe a dañe bete tyiñe na: A mone David, koo ma éngôngo!

⁴⁰ Yésus a nga tebe a bendé na be zuu nye be nye, a éyoñ a nga kui nye bebé, Yésus a nga sili nye na:

⁴¹ Wo yi na me bo wo jé? Nye na: A Nti, naa me beta yen!

⁴² Yésus a nga jô nye na: beta'a yen; e mbunane wôé ô nyiiya wo.

⁴³ Awolo te, a nga yen a tôñe Yésus, a va'a Zambe duma. Bôte bese, éyoñe be nga yene jame te, be nga kañe Zambe.