LUKAS 16 - Kalate Zambe Nnomo a Mfefe Mfefé Nkôñelan

Mbia mba'ale akum

¹ Yésus a nga jô fe beyé'é bé na: Nkukume môt éziñ ô nga bili mba'ale akum, a be nga kate nye na môt ate a miase nye akume dé.

² A nga loone nye a jô nye na: Za jame ma wôk be kobô'ô ajô dôé? Bo'o sito'o ya mba'alan akume wôé, amu ô se nguleya beta bo mba'ale akume wom.

³ Mba'ale akum a nga jô émiene na: Ma ye bo aya, amu masa wom a vaa ma mba'alane ya akume dé? Ye ke fa'a si? Me nji bi nguleya bo nalé. Ye ke ma bo zak? Ma wô'ô nalé ôson.

⁴ Ma yem e jam ma ye bo, nalé ate e ba ba ye nyoñe ma e menda map éyoñe ba ye vaa ma e mba'alan akume wom ba ye yené.

⁵ Ajô te a nga loone môt ase ya bebii memvôla be masa wé a jô nyô ôsu na: Ô bili masa wom tañeya'

⁶ A nga yalane na: Lita mbon toyini élaa a mintete misaman. A a nga jô nye na: nyoñe afebe mvôla dôé, jika'a tabe si, tili'i na: toyini a mintete muam.

⁷ A nga jô mfe na: Wo ki ô bili tañeya? A nga yalane na: Belita be fôn toyini mewôm melaa a ésaman. A a nga jô nye na: nyoñe afebe mvôla dôé a tili'i na: lita fôn 2880.

⁸ Ane masa a nga se'e ékotekote mba'ale akum ate amu a nga bo ane môt a ne ntyee. Amu bone ya *si nyô ba dañe yeme tabe ntyee e mfa'a bôte baa be be be ne avale da, e jame e ne ayaé e be bone y'éfufup be be.

⁹ A ma ma jô mia na: latane memvôé a akum da so ékotekote mboon, nalé ba ye nyoñe mia e be *tabernakel be too nnôm éto, éyoñ akume te da ye jembane mia.

¹⁰ Nyô a ne *zôsôô e biôme bi ne tyôtyoé, a ne fe *zôsôô e biôme bi ne anen, a nyô a ne ékotekot a tyôtyoé biôm, a ne fe ékotekot a biôme bi ne anen.

¹¹ Ajô te ñhe nge mi nga bo te yené *zôsôô akum e nji yian été, za a ye ve mia benya be biôm'

¹² A nge mi nga bo te yené *zôsôô e biôme bi ne bi bi môte mfe, za a ye ve mia biôme bi ne émbiôé'

¹³ Teke mbo ésaé éziñ a ne saane bemasa bebaé. Amu naa a ye vini wua *a nye'e nyô mbok, nge na a ye kabetane wua a biasé nyô mbok. Mi se nguleya saane Zambe a Akum.

¹⁴ Befarizieñ, e mbe be mbe be nyeke'e moné, be mbe be vô'ôlô'ô mam mete mese, be nga woé Yésus.

¹⁵ A nga jô be na: Mia mi ne e ba ba liti bebiene na be ne *zôsôô e mise me bôt, ve Zambe a yeme minleme mienan; amu jam e ne beta jam e be bôt é ne mbia jôme be Zambe.

¹⁶ Azukui be Yôanes, éyoñ é mbe ji metiñ a bekulu mejô; ataté éyoñe te, éjôé Zambe ja kateban ane mbamba foé, a môt ase a belan éngôngôt asu ya nyiin été.

¹⁷ Da dañe tyi'ibi na yôp a si bi lôt, a lôte na e nten ékanga wua ya metiñ ô kôlô.

¹⁸ Nyô ase a suu minga wé a lu'u mfe, a bo *mejian, a nyô ase a lu'u minga nnôm a te suu a bo *mejian.

Nkukume môt baa Lazar

¹⁹ E nkukume môt éziñ ô nga too a be'e bitôto'o mengômesan, *môs ôse ve sandé ényiñ a mimvôman.

²⁰ Engôngole môt, mefôle nyôl ne nyaññ, jôé na Lazar, a nga bôô e *mbé ya aka'a dé;

²¹ a mbe a kômbô'ô di afufus e mbe e kpwa'ak e tawôlô nkukume si. Ve bemvu be mbe be za'a nyiane meveñe mé.

²² Engôngole môt é nga wu a beéngele be nga be'e nye a kee nye e tôé Abraham. E nkukume fe ô nga wu a jambane soñ.

²³ Etaba'a miñwuan, a nga bete mis; a éndeñela'a été, a nga yen Abraham ôyap, Lazar a ye'e nye tôé.

²⁴ A nga yône na: A ésaa wom Abraham, koo ma éngôngo, a lômôk Lazar na a dube sôso'o ônyu jé mendim a ve ma ôyem évôvoé; amu ma wô'ô mintaé e nkaba'a nduane wuna été.

²⁵ Abraham a nga yalane na: A mone wom, simesa'ane na ô nga bi akum éyoñ y'ényiñe jôé, a na mfa'a Lazar, a nga tôbane minjuk, éyoñe ji a volebaneya nleme va, ve wo wo wô'ô mintaé.

²⁶ E mam mete mese yôp, beta yee a ne e zañe jangan a mia, nalé ate e ba be ne kômbô kôlô vana a zu be mia be bo te nguleya bo de, be bo fe te nguleya kôlô mi ne wé a zu be bia.

²⁷ E nkukum wô na: A ésaa wom, ma sili ñhe wo na ô lôme Lazar e ndaa ésaa wom;

²⁸ amu me bili bobenyañe betan. A kee be jam *a yem, be fe be za zui e vôma éndeñela'a nyô.

²⁹ Abraham nye na: Be bili Môze a bekulu mejô, be tame wô'ô be.

³⁰ A nga yalane na: Momo, a ésaa wom Abraham, ve nge môt éziñ a so miñwuan a zu be be, ba ye kôñelane minlem.

³¹ Abraham a nga yalane nye na: nge ba bo te wô'ô Môze a bekulu mejô, ba ye bo te kañese, ja'ane môt a wômô a so'o miñwuan.