LUKAS 15 - Kalate Zambe Nnomo a Mfefe Mfefé Nkôñelan

E ngale ntômba a nga jañ a e moné a nga jañ

¹ Benyoñe *toya bese a bebo *abé be nga zu Yésus bebé na be vô'ôlô nye.

² Befarizieñ a *beyeme bekalate be nga kobô menyiñ be jô'ô na: e nyôna a nyoñe bebo *abé, ba be be be ja'ak.

³ Ve a nga kane be *nkana wu:

⁴ môte *mbé ya be mia, nge a bili beyale mintômba ntet, a dimili wua, a bo te li'i ba bevo'o 99 e *nkôte si, asu ya ke tôñe nyô a ne njañan akekui a yeneya nye'

⁵ Eyoñ a yeneya nye, a beté nye e bitule bié a meva'a mese,

⁶ mebulane ya *nda, a loone bemvôé bé a bembôma'ane bé e *nda jé a jô be na: e mbo'one mevak, amu me yeneya ngale ntômba wom a nga jañ.

⁷ Avale te ma jô mia de na: mevak ma ye dañe bo e yôp amu mbo *abé wua *a kôñelane nlem a dañe bezôsôô 99 be nji yi *nkôñelane nlem.

⁸ Nge na minga *mbé, nge a bili minsañ mi moné awôm, a dimili wua, a ye bo te bo'é lambe, a nga vose *nda a tu'a jeñ, akekui a yene wô'

⁹ Eyoñ a yeneya wô, a loone bemvôé be binga bé a e binga baa be nye be too bebé e *nda jé a jô'ô na: bia be mia e mvakan, amu me yeneya e nsañe mone me nga dimili.

¹⁰ Avale te ma jô mia de na: mevak me ne asu beéngele be Zambe amu e mbo *abé wua *a kôñelane nlem.

E monafam a nga jañ

¹¹ A nga beta jô na: môt éziñ a nga bili bobefame bebaé.

¹² Nyô a nga dañe mongô a nga jô ésaa wé na: A ésaa wom, va'a ma ngabe ya akume da yiane bo éndam. A ésaa a nga kabe be akume dé.

¹³ Tyôtyôé melu é lôteya, nyô a nga dañe mongô a nga kôan e biôme bise a nga bili a ke e si é ne ôyap e vôm a nga mane dimili afo'o dé a mboon ébamba.

¹⁴ Eyoñ a maneya dimili biôme bise beta mfumbale zaé a nga kui e si éte, a a nga taté na a jembane biôme bise.

¹⁵ A nga ke lat a wua ya bôte ya si éte, nye ve lôme nye e mefube mé na a ke ba'ale bengôé.

¹⁶ A nga ye bi nkômbane ya di bikôla'a bidi bengôé be mbe be ja'ak, ve teke môt a mbe a va'a nye bie.

¹⁷ Eyoñ a nga bulane be émien, a nga jô émiene na: bebo bisaé e be ésaa wom bañembé be bili bidi abui, a ma, e vana, ma wu amu zaé.

¹⁸ Ma ye kôlô si, ma ye ke e be ésaa wom a ma ye jô nye na: a ésaa wom, me boya yôp a wo *abé,

¹⁹ me nji yiane beta lobane na mone wôé; bo'o ma ane wua ya bebo bisaé bôé.

²⁰ A nga kôlô si a ke e be ésaa. A ngenan ôyap, ésaa a nga yene nye, éngôngole *nlem é nga bi nye, a nga mate ke ku nye *tyiñ, a wubane nye.

²¹ Mon a nga jô nye na: A ésaa wom, me boya yôp a wo abé; me nji yiane beta lobane na mone wôé; bo'o ma ane wua ya bebo bisaé bôé.

²² Ve ésaa a nga jô bebo bisaé bé na: Jika'a zuan ézingi ja dañ abeñ a jalé nye je; jala'ane nye élondo ônyu a besilefase mebo.

²³ Za'ane mone nyak a ne avoñ, a wôane nye. E nja'an a e mvakan;

²⁴ amu e mone wome nyô a nga wu, a a beteya bulan ényiñ; a nga jañ, a a yenéya. A be nga taté na ba bo mevak.

²⁵ Nde ntôle monafam ô mbe mefup. Eyoñ ô nga bulan a subu *nda bebé, a nga wô'ô mezik a *mebôk.

²⁶ A nga loone wua ya bebo bisaé a yemelane jam da lôtan.

²⁷ Mbo ésaé ate a nga jô nye na: Monyoñ a bulaneya, a amu a te beta so nye *mvo'é, ajô te ésoo a te wôé mone nyak a ne avoñ.

²⁸ Ane a nga wô'ô ôlun a a nji kômbô nyiine *nda. Esaa a nga kui atane na a nyiñeli nye *nda été.

²⁹ E nde a nga yalan ésaa na: tame yen, abui mimbu, me saane wo, me nji ve'ele bo mebendé môé melo éyoñ éziñ, ô nji ve ma mon ékela éyoñ éziñe na me vak bia bemvôé bam.

³⁰ V'éyoñe mone wôé ate a soya, e nyô a nga min akume dôé baa be binga b'ébamba, ô wôéya mone nyak a ne avoñ asu dé!

³¹ Esaa a nga jô nye na: Wo a mone wom, bia wo bi ne éyoñ ése, a jôm ése me bili é ne énjôé;

³² ve da yiane na bi vak a jem, amu monyoñ ate a nga wu a a beteya bulan ényiñ; a nga jañ, a a yenéya.