LUKAS 14 - Kalate Zambe Nnomo a Mfefe Mfefé Nkôñelan

Môt a saéban e môse sabat

¹ Môse *sabat éziñ, Yésus a nga nyiin e *nda jia ya bivete Befarizieñ asu ya di;

² a bivete bi bi mbe bi fombô'ô nye. E teme na, môt éziñ, nkôkone mendim, ô ntele nye ôsu.

³ Yésus ve nyoñe nkobô a jô beye'ele metiñ a Befarizieñ na: Ye nkañesan ô ne ye momo na be saé môt e môse *sabat'

⁴ Be nga tabe bivô. Ane a nga nyoñe nkôkon, a saé wô a suu wô.

⁵ Wôna a nga jô be na: e *mbé ya be mia, nge monafame wé nge nya'a jé ja ku anjeñ, a ye bo te dutu je môse *sabat été été'

⁶ A be nji bo nguleya yalane nye jame te.

Eto ya ôsu

⁷ A nga kane bôt be ne nloban *nkana, amu a nga yene be ane be mbe be tobôk bito ya ôsu; nye be na:

⁸ Eyoñe ba te bañete wo abô'ô aluk, te ke tabe éto ya ôsu, a za bo na e môt ba semé a dañe wo fe a ne mbañetan,

⁹ a na môt a nga bañete mia bebaane a za zu jô wo na: Va'a nye éto. Eyoñe te wo ye wô'ô ôsone ya ke tabe éto ya mvus.

¹⁰ V'éyoñe ba te bañete wo, kele tabe éto ja su'ulan, ndemben éyoñe môt a nga bañete wo a ye so, a jô wo na: A mvôé jam betek e nkôñe wo dañe yôp, nalé a ye bo wo duma asu e ba mia be be be mia ye tabe tawôlô.

¹¹ Yaa, e môt a bete émiene yôp a ye silibane si, a nyô a sili émiene si, a ye betebane yôp.

¹² A nga jô fe môt a nga bañete nye na: éyoñe wo ve bôte bidi ya zañe *môs nge mamengô'é, te bañete bemvôé bôé, nge bobenyoñ, nge bebiaé bôé, nge bôte mia be be mi too be ne minkukum, be zaa bañete wo éyoñe jap a nalé a viane bo e ma'ane môé.

¹³ V'éyoñe wo bo beta ésulane bidi, bañete'e minzôzoé, e bôt be ne bibu'a biziñ ntyi'an, miñyeyem, mindindim.

¹⁴ A wo ye vak amu be nji bi jôme ya ya'ane wo; amu wo ye bi ma'an éyoñe bezôsôô be bôt ba ye wômô.

Nkana bôt be nga bañete

¹⁵ Wua ya bôt be nga too tawôlô, éyoñ a maneya wô'ô mejô mete, a nga jô Yésus na: Ebotan a môt a ye tabe tawôlô ndian éjôé Zambe!

¹⁶ A Yésus a nga yalane nye na: Môt éziñ a nga kômesane beta dina a bañete bôt abui.

¹⁷ Awolo ndian, a nga lôme mbo ésaé wé a kate bôt a nga bañete na: Za'an amu mam mese me ntoo nkôman.

¹⁸ Ve bese tyiñe jia be nga taté na ba sili *njaman: Nyô ôsu a nga jô nye na: Me nga kus afup a me ne ntindane ya ke yene de; ma ye'elane wo na, nyoñe ma ane nyô a yiane jamban.

¹⁹ E mfe ke na: Me nga kuse fia benyak étan, ma ke ve'ele be, ma ye'elane wo ô nyoñe ma ane nyô a yiane jamban.

²⁰ Nyô mbo'o ke na: Me ndôme luk amu ajô te me se nguleya zu.

²¹ E mebulan, mbo ésaé a nga kate Masa wé mam mete. Ajô te mmie ndaa, ôlun été, a nga jô e mbo ésaé wé na: Kelek avô e minseñ a minjoñe ya tison, ô zuu ma va: minzôzoé, e bôt be ne bibu'a ntyi'an, mindindim a miñyeyem.

²² E mbo ésaé nye na: A Masa, e jam ô nga bendé e maneya boban, bito bi ngenane bi yoo.

²³ Masa a nga jô mbo ésaé na: Kele mezen a e minka'alé minka'alé, yemete'e bôt be nyiin, nalé ate e *nda jam ja ye jaé.

²⁴ Amu ma jô mia de na: Teke wua ya bôt be nga too mbañetan a ye tye'e jôme ya dina wom.

Aval avé bia yiane tôñe Yésus

²⁵ Yésus a ézu'u bôt be kele nsamba, ane a nga kôñelan a jô be na:

²⁶ Nge môt éziñ a zu be ma, a nge a nji vini ésaa wé, nyia wé, minga wé, bone bé, bobenyañe bé a bekale bé, ja'an ényiñe jé ébien, a se nguleya bo e ñye'é wom.

²⁷ A Nyô a nji be'e *krôa jé a bo te tôñe ma, a se nguleya bo e ñye'é wom.

²⁸ Amu, za ya be mia, nge a kômbô lôñe nkum, a bo te taté tabe si asu ya bo metañe ya moné a yian ésaé, a yen nge a bili abime da ye bo na ésaé te é man,

²⁹ woñ ô too na nge a mane bo mbôka'a ya nkum, a za bo te nguleya mane wô, a bôte ba ye yene nye be za wôé nga a jô na:

³⁰ Môte nyô a nga taté na a lôñ, ve a nji bo nguleya mane.

³¹ Nge na, njô bôte *mbé a ne na nge a kôlô si na a ke wosane njô bôte mbok, a bo te taté tabe si a fas nge a bili ngule ya wulu a ke tôbane môt a zu wosane nye a bôte toyini mewôm mebaé nye ki toyini awôm'

³² Ke nyô mbo'o a ngenan ôyap, nye ve lôme minlômane be nye asu mam ma silibane na *mvo'é é boban e zañe jap.

³³ Ajô te ñhe, nyô ase ya be mia a bo te bene biôme bise a bili, a se nguleya bo e ñye'é wom.

³⁴ Nku ô ne mbamba jôm; ve nge nku ô bo fe éyôs, ba ye tyiti wô a jé'

³⁵ O nji ke beta volô, to'o asu si, to'o asu akun; ba wua wô fé. Nyô a nee melo asu ya wôk, a wô'ôk.