LUKAS 13 - Kalate Zambe Nnomo a Mfefe Mfefé Nkôñelan

Nloon asu nkôñelane minlem Nkana nkôkôme figié

¹ Melu mete, bôte b'éziñ be nga zu kañete nye e jam e nga kui e be bôte ya Galilé e mbe bete Pilat a nga bundane metyi map a ma *bityi'a biap.

² A nga yalane be na: Ye mia simesane na bôte ya Galilé bete be mbe beta bebo *abé a dañe ba bevo'o bese amu be nga tôbane mintaé avale te'

³ Ma jô mia na momo. Ve nge mi nji kôñelane minlem, mia ye fe jañe bese avale te.

⁴ Nge na e bôte awôm a muam e nkume ya Siloé ô nga ku yôp a wôé, ye mia bumi na be mbe be bili mekua a dañe bôte bevo'o bese be too Yérusalém'

⁵ Ma jô mia na momo. Ve nge mia bo teke kôñelane minlem, mia ye jañe bese avale te ebien.

⁶ A nga kane fe e *nkana wu: môt éziñ a nga bili élé figié mbéan afube mindi'i dé été. A nga zu jeñe bibuma y'été ve teke koone jôm.

⁷ E nde a nga jô mba'ale afube mindi'i na: tame yen, den a ntoo mimbu milaa, me za'a jeñ bibuma bi figié nyô, ve teke koone jôm. Baké'é je; amu jé ja di si e zesé'

⁸ Mba'ale afube mindik a nga yalane na: A Masa, beta'a jôé je e mbu wu; ataté éyoñe ji a kui éyoñe te, ma ye fa'a je mbôma'an a kut akun été.

⁹ Melu ma zu éko éziñe na ja ye wume bibuma; nalé momo, wo ye ba'é je.

Ñyeyeme minga wo saéban

¹⁰ Yésus a ye'ele'e e da ya meba me Zambe e môse Sabat,

¹¹ minga éziñe mbia *nsisim ô nga veñesane ñyeyem den mimbu awôm a muam a mbe valé; a mbe kukuu teke fo'o nguleya tebe.

¹² Yésus a nga yene nye a nga kobô nye a jô nye na: A minga, ô kôtébaneya mfa'a ya éyeme jôé.

¹³ A nga beté nye mo. Awolo te a nga tebe a kañe Zambe.

¹⁴ Ve évete ya *aba Zambe é nga yene nalé *abé na Yésus a nga saé môt e môse Sabat, nye jama bôte na: mimôse ya saé mi ne misaman, za'ane ñhe saéban mimôse mite saa e môse *sabat. Nti a nga yalane nye na:

¹⁵ A bôte bebadu'u, ye môt ase ya be mia, e môse *sabat, a nji tii e nya'a jé nge éjakase jé na a ke nyuu je mendim'

¹⁶ Ye e nji yiane na minga nyô, ngon Abraham, e nje Satan a biya nka'an den a ntoo mimbu awôm a muam, be tii nye, ngata'a éte e môse Sabat'

¹⁷ Eyoñ a mbe a kobô'ô nalé, besiñe bé bese be mbe njalan a meyat, a jama bôt a nga vak amu bitôto'o bi mam bise a mbe a bo'ok.

Minkana ajô fes ôndôndôô a mvusu

¹⁸ A nga beta jô na: éjôé Zambe ja funane jé, a ma ye ve'ane je a jé'

¹⁹ Ja funane fes ôndôndôô, e nje môt a nga nyoñ a wua je afube dé été; ja faa a bo élé, a anone ya yôp da tabe je mintyaé.

²⁰ A nga beta jô na: Ma ye ve'an éjôé ya yôp a jé'

²¹ Ja funane mvusu e nye minga a nga nyoñ a futi nye avut mve'an ôvek biyoñ bilaa a kui na ébañ é vus.

Ofanefane mbé

²² Yésus a mbe a tyi'ila'ane bitison a minlam, a a mbe a ye'ele'e a kelek e mfa'a ya Yérusalém.

²³ Môt éziñ a nga jô nye na: A Nti, ye ve bôte tyôtyoé e mbe da ye yen ényiñ? A nga yalane be na:

²⁴ Va'ane ngule ya nyiin ôfanefane *mbé. Amu ma jô mia de na: ézuk ja ye jeñe na é nyiin, ve teke ngul.

²⁵ Eyoñe mie ndaa a kôlôya si a a feteya *mbé a na, éyoñ mi li'iya atan, mia ye taté na mia kute *mbé a jô na: A Nti! Di'i bia e *mbé! A ye yalane mia na: Mi ne bôte ya vé'

²⁶ Eyoñe te mia ye taté na mia jô na: Bi nga di a nyu ôsu viôé, a ô nga ye'ele e minjoñe miangan.

²⁷ A a ye yalane mia a jô na: Kelane ma ôyap, mia bese mia bo ékotekot.

²⁸ Minyôn a nlatane mesôñ bia ye bobane valé, éyoñe mia ye yen Abraham, Izak, Yakob a bekulu mejô bese éjôé Zambe, a éyoñe mia ye wuaban atan.

²⁹ Bôte ba ye so e jôbe da tôô a e jôbe da dim, akôé a e nké; a ba ye tabe tawôlô éjôé Zambe.

³⁰ A tama yenan: e ba be tele mvus, ba ye tebe ôsu a ba be tele ôsu, ba ye tebe mvus.

Yésus a ke e Yérusalém

³¹ Eyoñe te Befarizieñ b'éziñ be nga zu jô nye na: Kelek, kôlô'ô va, amu Hérôde a kômbô wôé wo.

³² A nga jô be na: Kela jôan nkemva'a te na: ô lôô ma vaa mimbia minsisim a ma saé bôt den a akiti; a e môse lale wo ye bo wu e mmanan ésaé.

³³ Ve ma yiane wulu den, a akiti a e môse wo tôñe valé; amu e nji yiane na *nkulu mejô a wu e Yérusalém atan.

³⁴ Yérusalém, Yérusalém, wo wôé bekulu mejô a lume ba ba lômbane *mekok, abime biyoñ avé me nga kômbô kôane bone bôé, ane nyia kup a kôan e mefabe mé si e metyi a bô'ô yôp, ve mi nji ke kômbô nalé.

³⁵ Tame yenan, e *nda jenan ja ye li'i mia bilik; ve ma jô mia de na, mia ye bo te beta yen ma akekui mi jôya na: Ebotan é bo'o be nyô a zu a jôé Nti!