LUKAS 12 - Kalate Zambe Nnomo a Mfefe Mfefé Nkôñelan

Yésus a ye'ele beyé'é bé na be bo te ko woñ e si nyô

¹ Amu mam mete, mbôlô bôt be nga sulan betoyini betoyini, bôt be tibi'i ba bevo'o yôp, e nde Yésus a taté na a jô beyé'é bé na: taba'ane mvusu Befarizieñ ntyee, e nye a ne nsisime bebadu'u.

² Teke jam éziñ é ne nsolan da yiane bo te kulan, nge *nsolane jam bôt ba yiane bo te yem.

³ Amu ajô te e jam ese mia ye jô e dibi été da ye wô'ôban e bizôña *môs a e jam mia ye jô ôfôfoé e bitune bi *nda été, ba ye yôtane de e mendile menda yôp.

⁴ Ma jô mia de, mia bemvôé bam te mia ko ba ba wôé nyôle woñ, a e mbe bete be se nguleya bo jam afe mvus éte.

⁵ Ma ye liti mia nyô mia yiane ko woñ. Koone woñ, e nyô a ne na nge a mane wôé, a bili nguleya wua bôt étôtôlan, yaa, ma jô mia na e nye mia yiane ko woñ.

⁶ Ye be nji kuane bemvokuma betan frañ ébaé? Ve da, teke wua y'été Zambe a vuan.

⁷ Ja'ane ésile ya e nlô wônan ése é ne nlañan. Ajô te te koone woñ, mi ne tañ anen a dañ abui bemvokuma.

⁸ Ma jô mia de na: nyô ase a meme ma e mise me bôt e Mona môte fe a ye meme nye e mise b'éngele be Zambe.

⁹ Ve môt a ye kate ma e mise me bôt, a ye kateban e mise b'éngele be Zambe.

¹⁰ E nyô ase a ye kobô Mona môt ébiasé, a ye jamban, ve nyô a kobô Mfufube Nsisim ébiasé, aa ye ke jamban.

¹¹ Eyoñe ba ye kee mia e meba me Zambe, bekobô mejô a bejôô, te tyelane minleme yôp avale mia ye kamane miabebien, nge jam mia ye jô:

¹² Amu Mfufube Nsisim a ye ye'ele mia e jame mia jô awolo te ebien.

Nkukum ô ne teke fek

¹³ Môt éziñ ya jama bôt a nga jô Yésus na: A Nye'ele jô'ô mojañe na bia nye bi kaban éli'i jangan.

¹⁴ A nga yalane môt ate na: Za a nga telé ma e be mia na me bo *ntyi'i mejô nge nkab akum'

¹⁵ Wôna a nga jô be na: Tuka'a tabane ntyel a aval ôzañ akum ese; amu ja'ane afo'o été, ényiñe môt é nji ke timbi a e biôme a bili.

¹⁶ A a nga kane be *nkana: Sii nkukume môt éziñ é nga ve nye abui bidi.

¹⁷ A mbe a fasek e be émien été na: Ma ye bo aya? Amu me nji bi afôla ya naane bidi biam.

¹⁸ Nye na e jame ma ye bo e nde di: Ma ye tyame mekañe mam, a lôñe mefe ma dañ anen, ma ye yoé fône jam ése été a akume dam,

¹⁹ a ma ye jô nleme wome na: a e nleme wom, ô mbili abui akum e ne nnaan asu abui mimbu; woko'on, ja'ak, nya'ak a va'ak.

²⁰ Ve Zambe a nga jô nye na: a akute môt! Alu dina ebien, ba ye nyoñe nsisime wôé; e biôm ô maneya kômesan bia ye bo e bi bi za'

²¹ Avale te e nde e né e be nyô a tôkan abui akum asu dé émien, a too teke kum asu Zambe.

Mam ma tyelé nleme yôp. Nyaa akumu

²² Wôna Yésus a nga jô beyé'é bé na: Amu ajô te ma jô mia na: Te mia tyelé minleme yôp ajô ényiñe jenan mfa'a jôme mia ye di, nge ajô nyôle jenan mfa'a jôme mia ye jaé.

²³ Amu ényiñ ja dañe bidi a nyôl ja dañe ngômesan.

²⁴ Fomba'ane bigbwañ: bi ne teke bé nge kôan, teke akañ nge angun: ve Zambe a ve bie bidi. Abim avé mi ne beta tañ a dañ anon'

²⁵ Za ya be mia, amu ntyelane nleme wé yôp, a ne wôñôlô ényiñe jé e nté ényi'a wo'

²⁶ Nge mi se ñhe nguleya bo to'o ve ôyôme jam, amu jé mia tyelé nleme yôp ajô mam mevok.

²⁷ Yenan, ane same meyañ ja yaé, teke saé nge tiñ, ve da ma jô mia na to'o Solômon, étôto'o jé ése été, a nji ke jaé ngômesan ane jia ya be be.

²⁸ Nge Zambe a jalé bilo'o ngômesan, e mbie bia yené den e mefup, v'akiti bia ye wuaban e mbume nduan, ngumane ke mia, ye a ye bo te dañe bo mia nalé, a bôt be nee mbunane tyôtyoé'

²⁹ Ve mia, te jenañe jôme mia ye di, nge jôme mia ye nyu, a te tebane fe'e ne vema.

³⁰ Amu *meyoñ me ne te buni Zambe e *si nyô e me ma jeñe mam mete mese. Esoo wônan a yeme na mia yi bie.

³¹ Ve tata'a jeñan éjôé jé; a mam mete ma ye vebane mia abet.

³² Te ko woñ, a mbame bone biyem; amu Esoo wônan a nga yene mvaé ya ve mia éjôé.

³³ Ku'ane jôme mi bili, a va'ane je bingôngole bi bôt. Bo'one na mi bi mimfe'e mi moné mi ne te vele, akum e ne te man e yôp, e vôme miñwuwup mi ne te kui bebé, nge si'ibem te ndamane biôm.

³⁴ Amu e vôm akume dôé e né, e valé fe e nye nleme wôé ô né.

Momba'an

³⁵ Tiñeta'ane kandé e mengeteñ menan a belambe benan be yôñôk.

³⁶ A mia, funa'an e bôt ba yange na e Masa wop a so éli'iti, asu ya dii nye *mbé awolo ebien a ye so a kute *mbé.

³⁷ Ebotan é ne e be bebo bisaé bete e mbe Masa wop, e nsoone wé, a ye koone be be mombô'ô. Ma jô mia bebela na, a ye tiñeti kandé angeteñ, a bo be na be tabe e tawôlô a a ye subu na a saane be.

³⁸ To'o a so évevé baa nge ji lale, a koone be nalé, be ne ébotan.

³⁹ Tuka'a yemane de na nge miene *nda a too ye yem awolo avé ñwuwup wo yiane so, a nga ye mombô, teke jô'é na be bôé nye *nda.

⁴⁰ Mia fe taba'ane nkôman, amu Mona môt a ye so awolo mi nji simesan.

⁴¹ Pierre a nga jô nye na: Ye bia wo ku e *nkana wu, ye bôte bese'

⁴² A Nti a nga jô na: Za ñhe a ne mbamba mba'ale akum a ntyel, e nye Masa wé a ye telé e be bebo bisaé bé na a ve be ngabe bidi fôn éyoñe ja yian'

⁴³ Ebotan a mbo ésaé ate, e nye Masa wé, éyoñ a ye so, a ye koon a bo'o ésaé nalé!

⁴⁴ Ma jô mia de bebela na: A ye telé nye njôô ya akume dé ese.

⁴⁵ Ve nge mbo ésaé ate, a jô émien été na: Masa wom a bo nju'u ya so, nge a taté na a bôme bebo bisaé, befam a binga, a di, a nyu, a so'o bilam,

⁴⁶ Masa mbo ésaé ate a ye so e *môs a nji yange, awolo a nji yem, a ye bo nye bifuse bifus a bo nye na a nyoñe ngap asu'ulane bikotekote bi bôt.

⁴⁷ E mbo ésaé a nga bo te yeme nkômbane Masa wé a nga bo teke kômesane jôm éziñ a a nga bo teke bo ane nkômbane wé ô né, a ye biban abui minkasa.

⁴⁸ Nyô a nga bo te yeme nkômbane Masa wé ve a nga bo mam ma yiane *melep, mbo ésaé ate a ye bibane minkasa tyôtyoé. Ba ye sili abui e be nyô be nga ve abui a ba ye dañe sili abui be nyô be nga dañe ve abui.

Amu jé Yésus a nga zu'

⁴⁹ Me nga zu wua nduan e *si nyô, a jé éfe ma yiane kômbô nge é maneya kalan'

⁵⁰ Nduban éziñ ô ne e ñwô ô ne wu ma yiane duban, abim ôjeja'a e bili ma na jame te e boban!

⁵¹ Ye mia simesane na me nga zu ve *mvo'é si nyô? Momo, ma kate mia, ve nkanda'ane mengam.

⁵² Amu ataté éyoñe ji, bôte betan e *nda jia, ba ye kabane zañ, belaa ba ye wosane bebaé a bebaé ba ye wosane belaa;

⁵³ ésaa a ye wosane monafame wé, a monafam a ye wosan ésaa, nyia a ye wosane ngo jé a mona minga a ye wosane nyia wé; ntyi minga a ye wosane mbom, a mbom wo ye wosane ntyia minga.

⁵⁴ A mbe a beta'a jô jama bôte na: éyoñe mia yene *nkut ô té'é e jôbe da dim, mia jô tyi'ibi tyi'ibi na: mveñ ja zu nnoñ. Nalé ve boban.

⁵⁵ A éyoñe mia yen évuñulu ya nké ja vuñ, mia jô na: ayôñ da zu bo, nalé ve boban.

⁵⁶ A bôte bebadu'u, mia yeme yemelan avale si a yôp bi né: Amu jé mi ne teke yemelan éyoñ y'éyoñe ji'

⁵⁷ A amu jé miabebien mi ne teke yemelane jam e ne *zôsôô'

⁵⁸ Eyoñe mia nsiñe wôé mia ke asu be nkobô mejô, taté'é mane kôm a nye, a za kee wo asu be *ntyi'i mejô, *ntyi'i mejô ke a za kee wo e mo me mone bezimbi a mone bezimbi ke a futi wo e mbôk.

⁵⁹ Ma jô wo de na wo ye bo te kui mimbôk te na ô ya'an a kui e nsañ moné wo dañe tyôtyoé.