LUKAS 10 - Kalate Zambe Nnomo a Mfefe Mfefé Nkôñelan

Yésus a lôme beyé'é mewôme zamgbwa Ôbane mbamba foé

¹ Mvuse mam mete, Yésus a nga beta lôme beyé'é befe mewôme zamgbwa, bebaé bebaé, ôsu vié, e tison ése a e vôm ase émien a mbe na a yiane ke.

² A mbe a jô'ô be na: nkôane bidi ô ne abui, ve bebo bisaé be ne tyôtyoé. Ye'ela'ane ñhe masa nkôane bidi na a lôme bebo bisaé e nkôane bidi wé.

³ Kelan. Mi lôô ma lôme mia ane bone mintômba ézezañe beze été.

⁴ Te mia jaé mfek nge ékpwaé, nge besilefas a te mia batane môt e *zen.

⁵ E *nda éziñ mi ne nyiin, tata'a jôane na: *mvo'é é tabe'e e *nda nyô!

⁶ Nge mona *mvo'é a ne valé, e *mvo'é jenan ja ye tabe be nye; nge nalé momo, wôna ja ye bulane be mia.

⁷ Taba'an e *nda éte été, ja'an a nya'an e jôm é ne été; amu mbo ésaé a yiane ma'ane mé. Te keane menda menda.

⁸ E tison éziñ mi ne nyiin, a e vôm ba ye nyoñe mia, ja'ane jôm ba ye ve mia,

⁹ saane minkôkon mia ye bo valé, a jô'ane mie na: éjôé Zambe é subuya mia bebé.

¹⁰ Ve tison éziñ mi ne nyiin a e vôme ba ye bo te nyoñe mia, kelan e mevôme ya tison été a jô'ane na:

¹¹ a mbia *nlem ase mfa'a wônan, bia sas ja'ane mbuluk ôbiene ya tisone jenan ô nga kabetan e mebo mangan si; ve da yemane na: éjôé Zambe é subuya mia bebé.

¹² Ma jô mia na, *môs ôte ayaa mfa'a Sodom da ye bo si a di tison éte ja ye tôbane de.

¹³ Ngo'é wo a Kôrazin! Ngo'é wo a Bétsayida! amu nge bitua bi mam bi nga boban ézezañe jenan bi too ye boban e Tir a Sidoñ ve be nga maneya kôñelane *nlem a ayap a njaane nkuta a ñwoban asup.

¹⁴ Amu ajô te éyoñe ntyi'ane mejô, Tir a Sidoñ ba ye bi ayaa é nji dañe ngu ane éndenan.

¹⁵ Wôna wo, Kapernawum, ye wo ye beteban a kui yôp? Momo, wo ye silibane si a kui étaba'a miñwuan.

¹⁶ Nyô a ve mia mewôk a ve fe ma mewôk, a nyô a bene mia a bene fe ma, a nyô a bene ma a bene fe nyô a nga lôme ma.

¹⁷ Bemewôme zamgbwale bete be nga bulan a jô na: A Nti, ja'ane mimbia minsisim mia wô'ô bia a jôé dôé.

¹⁸ Yésus nye be na: Me mbe me yenek Satan a so'o yôp a kpwa'a si ane feleves.

¹⁹ Mi lôô, me nga ve mia ngule ya wulu benyo yôp a alé, a nguleya wulu e ngule nsiñ ése, a teke jôm éziñ é ne ngule ya ndeñele mia.

²⁰ Ve da, te mia vak amu minsisim mia wô'ô mia, ve va'an amu môé menan me ntoo ntilane yôp.

Mbamba Foé a ne nliteban e be bon

²¹ Eyoñe te ébien, Yésus a nga fôn a mevak a ngule Mfufube Nsisim a jô na: A Esaa wom, Masa ya yôp a si, ma kañe wo, amu ô nga solé mame ma e be mimfefek a mintyetyeñ, a amu ô nga liti me *bon. Yaa, a Esaa wom, amu avale te nde mbamba nkômbane wôé a mbe.

²² Esaa wom a nga ve ma mam mese a teke môt *a yem za a ne Mon, vengevenge ve Esaa, nge yem za a ne Esaa vengevenge ve Mon a e nyô Mon a kômbô nye liti.

²³ A éyoñ a kôñelaneya e be beyé'é, a nga jô be be too be be na: e mise ma yene mam mia yen me ne ébotan!

²⁴ Amu ma jô mia na: abui bekulu mejô a bejô bôt be nga kômbô yene mam mia yen ve be nji ke me yen, be kômbô fe wô'ô mam mia wôk ve be nji ke me wôk.

Nkana mbamba môte ya Samari

²⁵ E nde a zu bo na, nye'ele metiñ ve kôlô si a jô nye na: A Nye'ele, ma yiane bo aya ane ma ye nyoñ ényiñe ya melu mese ane ngap'

²⁶ Yésus a nga jô nye na: Jé é ne ntilan e metiñ? Wo lañ été aya'

²⁷ Nye na: Wo ye nye'e Nti e Zambe wôé, a e nleme wôé ôse a nsisime wôé ôse, a e ngule jôé ése, a ôsimesane wôé ôse a e môte mbok ane womien.

²⁸ Ô yemeya yalan, nalé Yésus a nga jô nye; bo'o nalé wôna wo ye nyiñ.

²⁹ Ve nye, a nga kômbô kale émien, e nde a nga jô Yésus na: Ve za a ne ma môte mbok'

³⁰ Yésus a nga beta nyoñe nkobô a jô na: Môt éziñ a mbe a siliki'i e mfa'a ya Yérikô a so'o Yérusalém. A nga ku ézezañe beze mimfaka, mbe bete be nga mane wôlé nye biôm, be mane fe tya'a nye ébôm, be mane ke a li'i nye ane mbim.

³¹ A teme teme na, *ntuni éziñ nye'e ki a nga siliki fe *zen éte; ve yene môt ate a lôt teke bisi.

³² Mone Lévit éziñe fe a nga kui vôm ate, ve yene nye a lôt teke bisi.

³³ Ve môte ya Samari éziñ, a too dulu zañ, a nga kui nye bebé, a yene nye a ko nye éngôngo.

³⁴ A nga ke bebé a tiñeti nye meveñ a nsôane mbon a woon été; mvus éte, a nga tooé nye e tite mimbe'e jé yôp, a kele nye e *nda beyeñ a ba'ale nye.

³⁵ Tyé kpwaa, a nga kuli bedenié bebaé a kee be mba'ale beyeñ a jô na: ba'ale'e nye, a tañe wo ye dimili ane abet mamien ma ye ya'ane wo je éyoñ ma ye bulan.

³⁶ E *mbé ya bôte bana belaa a yené ane nyô a mbe môte mbok e be môt a nga ku ézezañe beze mimfaka'

³⁷ A nga yalane na: e nyô a nga mvamane nye? Yésus a nga jô nye na: Kelek a wo bo'ok avale te.

Maata baa Marie

³⁸ A too e dulu zañ e nde a nga nyiin e nlam éziñ a minga jôé na Maata, a nga nyoñe nye e *nda jé.

³⁹ A nga bili monyañ jôé na Marie a nga zu tabe e mebo me Nti a wô'ô mejô mé.

⁴⁰ Abui minju'u y'ésaé e nga bili Maata, e nde a zu a jô na: A Nti, ye jame te teke ndeñele wo na mojañ a li'i ma me bo ésaé étam? Jô'ô ñhe nye na a volô ma.

⁴¹ Nti a nga yalane nye na: A Maata, Maata, e *nlem ô tyele wo yôp a abui mam da ndeñele wo.

⁴² Ve jame da étam é ne mfi: Marie a tobeya e ngap é ne mvaé ba ye bo te vaa nye je.