LUKAS 1 - Kalate Zambe Nnomo a Mfefe Mfefé Nkôñelan

¹ Amu bôt abui be nga bo ésaé ya tili nkañete ya mam me nga bobane be bia,

² aval ane mam mete me né e mme bengaa y'atata'a be nga yen, be bobane bebo bisaé y'ajô Zambe a kalane bia me;

³ Ma fe, a Monti Téôfil, éyoñe me tu'aya mane yemelane mam mese ataté metata'a, me nga yene mvaé ya tili nkañete ô ne mbamba nta'an asu dôé,

⁴ ndembene wo ye bo nguleya buni miñye'elan ô nga nyoñ.

Nkatane foé abialé Yôanes Babtist

⁵ Melu Hérôde a nga too njô bôt e Yudé, *ntuni éziñ a mbe jôé na Zakari, a too e nsamba betuni Abia; minga wé a mbe mvoñe bôte Aron, jôé na Elizabet.

⁶ Bebaane bese be mbe *zôsôô asu Zambe a be mbe be tôñôk mebendé a minjôane mi Nti bise teke bijô.

⁷ Ve be nji bi mon amu Elizabet a mbe nkôkôm a bebaane bese be ntoo minnôm.

⁸ Eyoñe mboon ésaé asu Zambe ô nga kpwaane Zakari, ane nta'ane ya nsamba betuni wé ô nga liti;

⁹ avale fulu ésaé betuni é né, *asimba e nga liti na e nye a yiane ve ôtu e *nda Nti é ne étyi été.

¹⁰ Jama bôt ase a mbe meye'elan été atan, awolo mvean ôtu.

¹¹ Engele Nti a nga yené be nye a tele e mbo nnôm ata'a metuna'a ôtu.

¹² Ñyenan a nga yene nye, Zakari a nga bo fe'e ne vema, a woñ ô nga bi nye.

¹³ Ve éngel a nga jô nye na: a Zakari, te ko woñ, amu Zambe a yalaneya meye'elane môé. Minga wôé Elizabet a ye biaé monafam a wo ye yôlé nye jôé na: Yôanes

¹⁴ Wo ye vak a fôn amu nye, a ézu'u bôt ja ye vak amu abialé dé.

¹⁵ Amu a ye bo beta môt asu Nti; a ye bo te nyu woon nge ényunyui be nga jini a a ye jaé ne lut a Mfufube Nsisim aso abume nyia wé.

¹⁶ A ye bulan abui bone b'Israél e be Nti e Zambe wop;

¹⁷ a ye wulu ôsu e mise me Zambe si a *nsisim a e ngul Elie, asu ya bulane minleme b'ésaa e be bone bap a ya'ale beenlô abéé na be fas ane bezôsôô be bôt nalé ate a ye kôm ayoñe bôt e ne nkômesan asu Nti!

¹⁸ Zakari a nga jô éngele na: Ma ye yeme jame te a jé? Amu me ntoo nnôme môt a e minga wome ke abui mimbu.

¹⁹ Engele a nga yalane nye na: Me ne Gabriél me tele asu Zambe. Me nga lômban asu ya kobô wo a kate wo e mbamba foé nyô.

²⁰ Yaa, wo ye ku mvuk a wo ye bo te nguleya beta kobô a kui e môse jame te da ye boban, amu ô nji buni mejô mam e mme ma ye tôéban éyoñe jap.

²¹ Bôt be mbe be yange'e Zakari a be mbe be kamek na a langan e *nda Zambe été.

²² Eyoñ a nga kui atan, a mbe te nguleya kobô be a be nga yeme na a nga yen ébubua éziñ e *nda Zambe été; a mbe a bo'o be mendem a mo, a too mvuk.

²³ Eyoñe mboon ésaé wé ô nga man, a nga bulane jale dé.

²⁴ Mvus éte, Elizabet a nga nyoñ abum; a nga solé de ngon étan; a mbe a jô'ô émiene na:

²⁵ Jame Nti a boya ma nde di, éyoñ a nga wua mise mé be ma, asu ya telé jam e mbe e va'a ma ôson e mise me bôte na e man.

Nkatane foé abialé Yésus

²⁶ E ngone Saman, Zambe a nga lôm éngele Gabriél e tison éziñ ya Galilé jôé na Nazarét,

²⁷ e be ngone minga é nga bili *atiñ aluk a fam jôé na Yôsep, e mvoñe bôte David; ngone minga é mbe jôé na Marie.

²⁸ Engele a nga nyiine be nye a jô nye na: Va'ak, a wo ô bili Mvame Zambe, mia Nti mi ne!

²⁹ A nga bo fek ne vema amu mejô mete, a sili'i émien atinane ya mebatane mete.

³⁰ Ane éngele a nga jô nye na: Te ko woñ a Marie, amu ô biya ma'a be Zambe.

³¹ Tame yene na wo zu nyoñ abum, wo ye biaé monafam, wo ye yôlé nye jôé na Yésus.

³² A ye bo beta môt a ba ye loone nye na e Mone Nyô a dañ ôyabe yôp. Nti, nyô a ne Zambe, a ye ve nye éto njôane David ésaa wé;

³³ a ye jôô *nda bôte Yakob nnôm éto, a e njôane wé wo ye bo teke man.

³⁴ Ane Marie a nga jô éngele na: Jame te ebien da ye boban aya, amu me ngenane te yeme fam?

³⁵ Engele a nga yalane nye na: Mfufube Nsisim a ye zu be wo a e ngule Nyô a ne ôyabe yôp ja ye buti wo éjijine jé si, ajô te nyô a ye bialé a ye bo étyi, a ye lobane na e Mone Zambe.

³⁶ Tame yen Elizabet, évuvumane jôé, nye fe a ntoo abume monafam éto nnôme jé été, e ngon ébiene nyô é ne nye nyô Saman, e nyô be mbe be lo'one nkôkôm.

³⁷ Amu e mfa'a Zambe teke jôm é ne kate boban.

³⁸ Marie nye na: Ke me ne e mbo ésaé Nti a ne minga, mam mese me boba'ane fo'o ma aval ô maneya jô. Ane éngele a nga kôlô be nye.

Marie a ke jom Elizabet

³⁹ Melu méte, Marie a nga ji'a kôlô a ke e si minkô, e tison éziñe ya Yuda.

⁴⁰ A nga nyiin e *nda Zakari a batan Elizabet.

⁴¹ E nga bobane na éyoñe Elizabet a nga wô'ô mebatane me Marie, mon a nga san abume dé a Elizabet a nga jaé a Mfufube Nsisim.

⁴² A nga bôé beta ñyôn a jô na: Ô ne ébotan a dañe binga bese! Ebuma ya abume dôé fe é ne ébotan!

⁴³ Da vebane be ma aya na Nyia Nti wom a zu be ma'

⁴⁴ Amu éyoñe mebatane môé ma te wô'é melo mam, e nde mon a te sane ma abum.

⁴⁵ Mvom é bo'o be nyô a nga buni: e jam e nga jôbane be nye e so'o be Nti da ye boban!

⁴⁶ E nde Marie a nga jô na: E nleme wom wo kañe Nti

⁴⁷ a nsisime wom ô ne njalan a mefôn amu Zambe Nyii wom,

⁴⁸ amu a nga kee mise méé e be mbo ésaé wé a ne minga a suu émiene si. Ajô te ataté éyoñe ji, miaé mi bôte mise mia ye yôtane na me ne mvom.

⁴⁹ Amu na e Nyô a ne ngul ése a boya ma beta be mam, e jôé dé e ne étyi.

⁵⁰ E nde fe na e nleme mvame wé wo ke e be ba bese ba ko nye woñ ataté miaé bôte wu a kui miaé bôte wu.

⁵¹ A nga litiban a e ngul ése ya wo wé; a nga tyamelan e bôt be bili ôsimesane mebun e *nlem.

⁵² A nga wua mingungu e bito minjôane biabe si. Ayôme bôt e nde a viane bete yôp.

⁵³ A nga jalé bewô'ô zaé akum, a viane ke suu minkukum teke jôme mo.

⁵⁴ A nga zu volô Israél, mbo ésaé wé, amu a nga simesane mbaa nleme wé,

⁵⁵ aval a nga kobô beésa bangan, asu Abraham a e mvoñe bôte jé, akekui nnôm éto.

⁵⁶ Marie a nga tabe valé baa Elizabet bebé ngon élaa, mvus éte, a nga bulan e jale dé.

Abialé Yôanes Babtist

⁵⁷ Mbôl éyoñe Elizabet a nga yiane biaé é nga kpwaan, e nde a nga biaé monafam.

⁵⁸ Awô'ô bôte ba bômane nye a bivuvuman be nga wô'ô na Nti a jaléya nye a mvame jé, be nga vak a nye.

⁵⁹ Eyoñe môse muam ô kuiya, e nde be nga zu asu ntyi'an atyele mon a be nga kômbô yôlé nye e jôé ésaa na: Zakari.

⁶⁰ Nyia nye na: Momo! A ye lobane na Yôanes.

⁶¹ Be nye na: Teke môt éziñe ya bivuvumane biôé a be'e jôé te.

⁶² Be nga kobô ésaa a mve'elan mam a mo, be sili'i nye na: be yôlé mone jôé na za'

⁶³ E nde a sili mon akok a tili bifia bina été na: Jôé dé e ne Yôanes; ane bese be nga kam.

⁶⁴ Awolo te ebien, anyu dé a ôyame vié bi nga bo *mvo'é: a kobô'ô, a va'a Zambe akéva.

⁶⁵ Ane woñ ô nga bi e ba bese be nga too mefôla ma bôman mete; e si minkôl ése ya Yudé, be mbe be kobô'ô ajô ya mam mete mese.

⁶⁶ E bôte bese be nga wô'ôtane me, be nga kpwele me e minleme miap; be kele ba silane na: Mone nyô a ye ñhe bo avale mon avé? A bebela na wo Zambe ô mbe a nye.

Jia Zakari

⁶⁷ Esaa wé, Zakari, a mbe njalan a Mfufube Nsisim, a nga kulu mejô a jô'ô na:

⁶⁸ E Nti, e Zambe Israél a bo'o ébotan, amu a zuya jome bôte bé a tôé nkôtane wé;

⁶⁹ a nga bo na ngungule Nyii bôt ô bialé bia e *nda bôte David e mbo ésaé wé.

⁷⁰ E nne a nga kate foé nalé anyu mimfufube bekulu mejô béé ya kôba:

⁷¹ Nyian wo kôté bia e be besiñe bangan a e mo ba bese ba vini bia.

⁷² A nga liti mvame jé e be b'ésaa bangan *a simesan e mfufub élate wé

⁷³ e ngana a nga kan Abraham ésaa wongan na: a ye ve bia afôla ya kañe nye woñe momo,

⁷⁴ éyoñ a maneya wôlé bia e mo besiñe bangan,

⁷⁵ e mbunan été a e *zôsôô été, émien a fombô'ô bia, nté ôse bi vee.

⁷⁶ E mfa'a wôé, a mone mon, wo ye lobane na nkulu Mejô Nyô a dañ ôyabe yôp, amu wo ye wulu ôsu, e mise me Nti, asu ya kôme mezene mé,

⁷⁷ asu ya ve bôte béé ñyemane ya nyian wo so amu njamane mam *abé.

⁷⁸ Jame te da so édo'o mbamba nleme Zambe wongan: Amu édo'o mbamba nleme te nje ôteté ya jôbe da tôô ô zuya jome bia ô so'o yôp.

⁷⁹ Oteté ôte ô nga yené e be ba be nee dibi a e nsisiñ awu été, asu ya ya'ale medaa mebo mangan e zene *mvo'é été.

⁸⁰ Mfa'a mongô, a nga yaé a nsisime wé ô nga yeme ngu; a nga too e mevôme bôt be nji tabe akekui e *môs a nga litiban e be Israél.