LEVITIK 9 - Kalate Zambe Nnomo a Mfefe Mfefé Nkôñelan

Aron a bone bé ba taté mvean metuna'a

¹ E môse muame, Môze a nga loone Aron ba be *bon a bemvendé y'Israél.

² Nde a nga jô Arone na: Nyoñ'étoñe nyak ane étyi'a ya *njaman, a nnôme ntômba asu étyi'a ja di'ibane ngumba, nyôna a nyô mbok be too *mvo'é ne selem, éyoñe te wo ye liti bie asu Nti.

³ Wo ye kobô bone b'Israél na: Nyôñane nnôm ékela asu metuna'a ya *njaman, étoñe nyak a étoñe ntômba bi ntoo mbu wua, *mvo'é ne selem, asu étyi'a ja di'ibane ngumba.

⁴ Nya'a jia a nnôme ntômba wua asu metuna'a ya nlatane ngbwa, nalé mia ye ve bie metuna'a asu Nti, ô laté fe mveane ya mefup ô too mfu'an a mbon. Amu Nti a ye yené be mia den.

⁵ Nde be nga zuu biôme Môze a nga bendé ôsu ya *nda éndelé bendôba'an. Ane bôte bese be nga subu bebé a tebe tetele asu Nti.

⁶ Eyoñe te Môze a nga jô na: Jame Nti a nga bendé nde di, bo'one de, éyoñe te étôto'o Nti ja ye yené be mia.

⁷ Ane a nga jô Arone na: Subu'u bebé ata'a metuna'a, va'a metuna'a môé ya *njaman a étyi'a jôé ja di'ibane ngumba, bo'o mame ya *njaman asu dôé a ékôane bôt; va'a fe mveane ya ngum ayoñ bôt ôse a bo mame ya *njaman asu dab avale Nti a nga bendé.

⁸ Ane Aron a nga subu bebé ata'a metuna'a a tyi'i étoñe nya'a *tyiñ asu *abé dé émien.

⁹ Wôna bone bé be nga kalane nye metyi, ane a nga dub'ônyu été a wo'o me e minla'a mi ata'a metuna'a; metyi me nga buk, a nga sôé me e tin ata'a metuna'a si.

¹⁰ A nga di'i avoñ, mimbañ mi ôtam, ndalebôbô é yale ése'e étyi'a ya *njaman abé, bise ata'a metuna'a yôp, avale Nti a nga bendé Môze.

¹¹ Ve a nga di'i minsôn a ékôp e nduan e minkan atan.

¹² A nga tyi'i étyi'a *tyiñ asu mvean wo di'ibane ngumba; wôna bone b'Aron be nga kalane nye metyi, nde a nga sôé me mbôma'an ata'a metuna'a.

¹³ Be nga kalane nye étyi'a mvean wo di'ibane ngumba, é too mbaane mefus, nlô ô too fe été: a nga di'i bie ata'a metuna'a yôp.

¹⁴ A nga sôbe *miñya a mimbiaé, a di'i bie ata'a metuna'a bi bete mvean wo di'ibane ngumba yôp.

¹⁵ Wôna a nga ve mveane ya ngum ayoñ bôt ôse. A nga nyoñ nnôm ékela é nga veban asu *njaman abé ya bôt, a tyi'i nye *tyiñ a ve nye asu *njaman abé, avale fe ane étyi'a ôsu.

¹⁶ A nga ve mvean wo vebane ngumba aval ane ñye'elan ô né.

¹⁷ A nga liti mvean avut a jalé wô e wo wé, éyoñe te a nga di'i wô ata'a metuna'a ô too jôm ja bebe e mvean wo di'ibane ngumba yôp.

¹⁸ A nga tyi'i nnôme nyak a nnôme ntômba, bi bo metuna'a ya nlatane ngbwa asu bôt. Bone bé be nga kalane nye metyi, ane a nga sôé me mbôma'an ata'a metuna'a,

¹⁹ nalé fe mevoñe me nnôme ntômba; be nga kalane fe nye njem, a avoñ e yale *miñya, mimbañ mi ôtam a ndalebôbô y'ések be nga vaa be nnôme ntômba;

²⁰ nde be nga beté mevoñ mete angône yôp, be nga di'i me ata'a metuna'a yôp.

²¹ Aron a nga bo jam da liti nkalan ôngôn a éname ya mbo nnôm e be Nti, avale Môze a nga bendé.

²² Eyoñe te Aron a nga same mo mé e vôme bôt be nga tele a botane be. Wôna a nga sise si éyoñe te a maneya bo mimveane ya *njaman, mi mia di'ibane ngumba a mimveane ya nlatane ngbwa.

²³ Môze ba Aron be nga nyiin e *nda éndelé bendôba'an. Eyoñ be nga kui atan, be nga botane bôt.

²⁴ Nde nduan é nga so ôsu be Nti a mane di'i mvean wo di'ibane ngumba a avoñ ya metuna'a ata'a metuna'a yôp. Bôte bese be nga yene jame te: be nga bete metyiñe yôp a mevak, be nga ku si bubutu.