LEVITIK 5 - Kalate Zambe Nnomo a Mfefe Mfefé Nkôñelan

¹ Nge môt éziñ a maneya wô'ô mbemen e be ba bese be ne bengaa ya jam éziñ, ve a bene kate jam a nga yen nge wôk, a ye be'e étom y'abé dé.

² Nge môt a nambe jôm éziñ é be'e nsem e fu'an: to'o mbime tit é ne mvin, é too nyô y'afan nge nyô ya nlam, nge mbime tite ja nyi'itan é ne mvin, émien a ntoo fe mvin a a wuabaneya mekua été.

³ Jam afe na: Nge môt a nambe môt éziñ a be'e mvin ja kôan é too aval ese é né, ve jame te da kui be nye fu'an; éyoñ a yemeya de, a ye be'e mekua y'été.

⁴ Nalé fe na nge môt a kobô jam éziñ e fiañga yôp, émien te tu'a tabe ntyele ya jam a kobô, éyoñe te a kane ngana ya bo mbia jam, nge ke mbamba jam, ve mvus a su'ulane yeme de, a ye be'e mekua ya jame da y'été.

⁵ Ajô te môt a ye be'e mekua ya jame da ya mam me maneya totebane ma, a ye mem *abé dé mfa'a ôte.

⁶ Asu ya nyoñe *njaman ya *abé dé, môt ate a yiane zuu ngale ntômba nge ékela, be ve je metuna'a e be Nti: éyoñe te a ye nyoñe *njaman. A *ntuni a ye bo mame ya *njaman abé asu dé.

⁷ Nge a nji bi jôme ya kuse ngale ntômba nge ékela e mo mé, a amu *abé e nga toé nye e mekua été, a ye ve Nti adu abaé nge bezum bebaé, ônon wua asu metuna'a ya *abé, wu ôvok asu metuna'a ma di'ibane ngumba.

⁸ A ye zuu bie e be *ntuni, éyoñe te *ntuni a ye taté ve wu ô ne étyi'a asu *njaman abé, a bo'o wô *tyiñ, ve teke té nlô.

⁹ Ntuni a ye miame metyi e mimfine ya ata'a metuna'a: metuna'a ya *njaman abé mme le.

¹⁰ Onon ôvok wo ye bo étyi'a ja di'ibane ngumba, aval ane ñye'elan ô né. Nalé ate nye *ntuni a ye bo asu môt ate mfa'a ya mame ya *njaman ya *abé a nga bo: a *abé te da ye jambane nye.

¹¹ Nge a nji bi ngul ya kuse adu abaé nge zum ébaé amu *abé dé, a ye ve kili mbamba avut ébaé é bo metuna'a ya *njaman abé. A ye bo te futi mbon été nge meyemete m'élé me ne mbamba menyum, amu me ne metuna'a asu *njaman abé.

¹² A ye zuu avute te e be *ntuni, a *ntuni a ye jalé mbamba avut ate e wo wé, e too jame ya simesan; a ye di'i mbamba avut ate ata'a metuna'a yôb a bo jôm ja bebe e yôb ya metuna'a ma di'ibane nduan asu Nti: mbamba avut ate a ntoo metuna'a ya *njaman abé.

¹³ Avale te nde *ntuni a ye bo asu môt ate mfa'a mame ya *njaman ya *abé a nga bo, é nnambe'e jame da ya mam mete, a *abé te da ye jambane nye. Jôm ja ye buk ja ye bo ane mveane ya mefup asu Nti.

Metuna'a ya vaa mekua

¹⁴ Ane Nti a nga kobô Môze na:

¹⁵ Éyoñe môt éziñ a ye bo ékob é n'anen a bo *abé e fu'an a nyoñane biôm bi ne ntelan étyi e be Nti, a amu mekua mé mfa'a Nti, a ye zuu nnôme ntômba be nga nyoñ e mbame biyem a to nyôle *mvo'é ne selem, womien wo ye tote tañe besikel a yiane kui, ve sikel a yiane bo nyô ba belane nye *nda y'étyi.

¹⁶ Môt ate a ye fe bulane jôm é nga ndaman étyi ya *tabernakel a beté fe e ngabe tane ya tañe jôme te é ne kui; éyoñe te a kalane je *ntuni. Ntuni a ye bo mam ya *njaman abé asu dé a nnôme ntômba a nga veban ane étyi'a ya vaa mekua, a mekua mete ma ye jambane nye.

¹⁷ Nge môt éziñ a bo *abé a ntyaman abendé da ya mebendé me Nti e fu'an, ve bo mam me nji yian a ye be'e mekua a adite ya ékobe jé.

¹⁸ A ye zu liti *ntuni nnôme ntômba asu metuna'a ya vaa mekua; a ye nyoñe nye e mbame biyem, a too *mvo'é ne selem a tañe jé é too avale womien wo ye tyik. Asu dé, *ntuni a ye bo mame ya *njaman ékobe jé a nga bo e fu'an, a ékobe te ja ye jambane nye.

¹⁹ Metuna'a mete me ne ma ya vaa mekua. Môt ate a nga futi fo'o émien e mekua été asu Nti.

²⁰ Ane Nti a nga kobô Môze na:

²¹ Éyoñe môt éziñ a ye bo *abé a bo jam e ne te yian mfa'a Nti, éyoñ a laa môt a ne nye bebé minsos ajô jôm a nga naan e be nye, nge tañ éziñ a nga ve nye mo, nge wup, nge ñwôlane môt ba nye be too jôm a ngul,

²² nge nkatane na a nji ke yene jôm é nga jañ, nge nkalane minkal mi n'ékotekot ajô nseme wua ya minsem mise môt a ne bo,

²³ éyoñ a ye bo *abé nalé a be'e mekua, a ye bulane jôm a nga wup, nge wôlé a ngul, jôm be nga kee nye a ba'ale,

²⁴ nge ke jôm éziñ nje a nga kalane je minkale mi n'ékotekot. A ye bulane je ngum a beté fe e ngabe tane y'été, éyoñe te a kalane je môt a ne je e *môs ôbien a ye ve metuna'a mé ya vaa mekua.

²⁵ Amu mekua mé mfa'a Nti, a ye zuu *ntuni nnôme ntômba a too *mvo'é ne selem, nyoñan e mbam été, tañe jé é too nyô wo ye ve: metuna'a mete me ne ma ya vaa mekua.

²⁶ A *ntuni a ye bo mame ya *njaman asu Nti mfa'a wé, a mekua mete ma ye jambane nye aval ese me né.