LEVITIK 4 - Kalate Zambe Nnomo a Mfefe Mfefé Nkôñelan

Etyi'a ya nyoñe njaman

¹ Ane Nti a nga kobô Môze a jô na:

² Kobô'ô bone b'Israél na: Éyoñe môt éziñ a ye bo *abé e fu'an a ntyaman abendé da ya mebendé me Nti, ve bo e jam é ne te yian:

³ Nge *ntuni a ne *ñwo'one mbon nye a nga bo *abé, a a zule mekua e be bôt amu *abé te, a ye ve Nti étoñe nnôme nyak é too *mvo'é ne selem amu *abé a nga bo asu ya nyoñe *njaman.

⁴ A ye zuu nnôme nyak anyiine *nda éndelé bendôba'ane, ôsu Nti, a ye beté wo wé e nlô nnôme nyak ate, a tyi'i nye *tyiñ asu Nti.

⁵ Ntuni a ne *ñwo'one mbon a ye nyoñe metyi me nnôme nyak a zuu me e *nda éndelé bendôba'an été;

⁶ a ye dub'ônyu vié e metyi, a a ye miame me biyoñe zamgbwal asu Nti, éndelé é tyele e zañe *nda éndelé bendôba'an éfas é lôô vôm a n'étyi.

⁷ Ntuni a ye wo'o metyi e minla'a mi ata'a metuna'a ya ôlobinda a nyume mvaé e ne asu Nti, e *nda éndelé bendôba'an été; a ye miame metyi me nnôme nya'a mese e mbôka'a y'ata'a metuna'a ma di'ibane ngumba e n'ayiine *nda éndelé bendôba'an.

⁸ A ye vaa avoñ ese ya nnôme nyak da veban asu *njaman abé, avoñ ése é yale *miñya a avoñ ese e ne *miñya,

⁹ mimbañ mi ôtam mibaé a avoñ da bômane mie, di é yale mevel a ndalebôbô é yale ések, nje a ye kandé bebé a mimbañ mi ôtam:

¹⁰ a vaa bie e be nnôme nyak, aval fe ane étyi'a ya nlatane ngbwa, *ntuni a ye di'i bie ata'a metuna'a ma di'ibane ngumba.

¹¹ V'ékôbe nnôme nyak, minsône mié mise, nlô wé, mimbiaé mié, *miñya mié a mebi mé,

¹² a ye kee ngume nya'a ôse e minkan atan, e vôm ba kut asup, a di'i wô nduan e nja'a yôp: a wo ye mane dik avis asube yôp.

¹³ Nge bôte bese y'Israél mbe be nga bo *abé e fu'an te na bebien be yeme nalé a ntyaman abendé da ya mebendé me Nti ve bo mam me ne te yian a ve bebiene mekua,

¹⁴ a éyoñ *abé te e kulaneya, bôte bese ba ye ve nnôme nyak e metuna'a asu *njaman abé a zuu nye ôsu ya *nda éndelé bendôba'an.

¹⁵ Bemvendé be bôt ya nsamba ba ye beté mo mab e nlô nnôme nyak asu Nti, a ba ye tyi'i nnôme nya'a *tyiñ asu Nti.

¹⁶ Ntuni a ne *ñwo'one mbon a ye zuu metyi me nnôme nyak e *nda éndelé bendôba'an été;

¹⁷ Ntuni a ye dub'ônyu vié e metyi a miame me biyoñe zamgbwal asu Nti, ôsu éndelé ja kandé vôm a n'étyi a vôm a dañ étyi.

¹⁸ A ye wo'o metyi e minla'a mi ata'a metuna'a e ne asu Nti e *nda éndelé bendôba'an été. Metyi ma buk a ye sôé mese mbôka'a ata'a metuna'a ma di'ibane ngumba, nde e n'anyiine *nda éndelé bendôba'an été.

¹⁹ A ye vaa avoñ ese e be nnôme nyak ate a di'i de ata'a metuna'a yôp.

²⁰ A ye belane nnôme nyak ate avale fe a belane nyô a veban asu *njaman abé; a ye bo avale da. Avale di nde *ntuni a ye bo asu *njaman abé wop, a *abé te da ye jambane be.

²¹ A ye kee nnôme nyak e minkan atan a di'i nye avale a nga di'i nnôme nya'a ôsu. Metuna'a mete me ne asu *njaman abé ya bôt.

²² Nge évet éziñ y'ayoñ nje ja ye bo *abé e fu'an a ntyaman abendé da ya mebendé me Nti, e Zambe wé, ve bo mam me nji ke yian a ve émiene mekua,

²³ éyoñ a yemeya *abé a nga bo, a ye ve nnôm ékela a too *mvo'é ne selem.

²⁴ A ye beté wo wé e nlô nnôm ékela, a tyi'i nye e vôm be wô'ô tyi'i étyi'a ja di'ibane ngumba asu Nti: Etyi'a te é ne asu *njaman abé.

²⁵ Ntuni a ye nyoñe metyi ya étyi'a ja veban amu *njaman abé a ônyu vié, a ye wo'o me e minla'a mi ata'a metuna'a ma di'ibane ngumba.

²⁶ A ye di'i avoñ ese ata'a metuna'a yôp avale fe ba bo avoñ étyi'a ya nlatane ngbwa. Avale te nde *ntuni a ye bo mfa'a évet éte asu *njaman ya *abé dé, a da ye jambane nye.

²⁷ Nge môt éziñ y'ayoñ a bo *abé e fu'an a ntyaman abendé da ya mebendé me Nti ve bo mam me nji ke yian a wua émien e mekua été,

²⁸ nge ba bo nye na *a yem abé a nga bo, a ye zuu ngale ékela a too teke ayeñ asu *abé a nga bo.

²⁹ A ye beté wo wé e nlô étyi'a ja te veban asu *njaman abé; a ye tyi'i éyem éte *tyiñ vôme metuna'a ma di'ibane ngumba.

³⁰ Ntuni a ye nyoñe metyi ya étyi'a éte a ônyu vié a wo'o me e minla'a mi ata'a metuna'a ma di'ibane ngumba a sôé metyi mevo'o mese e tin ata'a metuna'a si.

³¹ A ye kandé avoñ ése avale ba kandé avoñ étyi'a ya nlatane ngbwa, a ye di'i de ata'a metuna'a, a da ye bo di mbamba menyum e be Nti. Avale te nde *ntuni a ye bo mame ya *njaman abé asu môt ate, a *abé te da ye jambane nye.

³² Nge a ve ngale ntômba asu *njaman abé, a ye ve nyô a ne *mvo'é ne selem.

³³ A ye beté wo wé e nlô étyi'a ja veban asu *njaman abé; a ye tyi'i je *tyiñ é ne étyi'a asu *njaman abé e vôm ba wôé *bityi'a bia di'ibane ngumba.

³⁴ Ntuni a ye nyoñe metyi ya étyi'a asu *njaman abé a ônyu vié, a ye wo'o me e minla'a mi ata'a metuna'a ma di'ibane ngumba a sôé metyi mevo'o mese e tine ata'a metuna'a si.

³⁵ A ye kandé avoñ avale ba kandé di ntômba e metuna'a ya nlatane ngbwa, a a ye di'i de ata'a metuna'a e too jôm ja bebe e étyi'a ja di'ibane nduane yôp asu Nti. Avale te nde *ntuni a ye bo mfa'a môt ate asu *njaman ya *abé a nga bo, a *abé te da ye jambane nye.