LEVITIK 26 - Kalate Zambe Nnomo a Mfefe Mfefé Nkôñelan

Bibotan a biyo'é

¹ Te boone miabebien bengunemelan, nalé fe te telan éve'ela'a éziñ é ne nkpwelan e mfa'a wônan, nge akôn, a mia ye bo te telé éve'ela'a ako'o éziñ e si jenan a kute meboñe si na mia kañe je: amu ma me ne Nti e Zambe wônan.

² Mia ye ba'ale besabate bam a mia ye semé vôme wom a n'étyi: ma me ne Nti

³ Nge mia ba'ale metiñe mam a ba'ale fe mebendé mam a bo me,

⁴ ma ye ve mia mveñ éyoñ ja yian, si ja ye yô bidi bié, a bilé ya fé bia ye wum bibuma biap.

⁵ Ntya'ane bidi wônan wo ye kui éyoñe ya mmiatan bibuma, a mmiatane bibuma wo ye kui éyoñe ya mmiasane mvoñ; mia ye di bidi a jaé, a mia ye tabe si jenan teke jôm ja tyelé mia minleme yôp.

⁶ Ma ye futi *mvo'é e si jenan, mia ye ke ôyo teke môt a ndeñele mia; ma ye jaa betit be n'ayok e si jenan, a bita bia ye bo momo e si jenan.

⁷ Besiñe benan ba ye mate mia a ba ye ku a meyo me nkpwaté mekoñ ôsu vienan.

⁸ Bôte betane ya be mia ba ye titane bôte ntet, a bôte ntete ya be mia ba ye titane bôte toyini awôm, a besiñe benan ba ye ku a nkpwaté mekôn ôsu vienan.

⁹ Ma ye kôñelane be mia a bo na mi fôé, ma ye bo mia abui a ba'ale élat bia be mia.

¹⁰ Mia ye di bidi mi kôaneya ayap, a mia ye tyendé minnôm bidi a mimfefé.

¹¹ Ma ye bo étaba'a jam e zañe jenan a nleme wom wo ye bo te wô'ô mia *abé.

¹² Ma ye wulu e zañe jenan a bo e Zambe wônan a mia e bôte bam.

¹³ Ma me ne Nti e Zambe wônan a nga vaa mia si y'Ejipte mi bo te beta bo belo bap. Me nga mane tii mengata'a ya ébôñeté jenan a bo na mi wulu minlô mi tele

¹⁴ Ve nge mia bo te wôk a te bo mebendé mam mese,

¹⁵ nge mia ben memvinda mam a nge nleme wônan wo vini minjôane miam a bo te bo mebendé mam a tyam élate jam,

¹⁶ avale di nde ñhe ma ye bo: ma ye wosane mia a éndeñela'a: awu, ôkone tit; nalé mise menan ma ye ndaman a minleme mienan mia ye bok; mia ye miase mvoñ e zesé amu besiñe benan mbe ba ye je mane min.

¹⁷ Ma ye kôñelane mia asu dam e ngame yat a besiñe benan ba ye bôme mia ôsu vienan; ba ba siñe mia ba ye bebe mia minlô yôp, a mia ye mate teke môt a titane mia.

¹⁸ Ve nge a kui éyoñe te mi nji wô'ô ma, ma ye ve mia meleb a lôte biyoñe zamgbwal amu minseme mienan.

¹⁹ Ma ye bu'u mebune ya ngule jenan, ma ye bo yôbe denan ayet ane étyé a si jenan aval ane mvot.

²⁰ Ngule jenan ja ye man e zesé, si jenan ja ye bo te fe yô bidi, a bilé ya si teke fe wume bibuma.

²¹ Nge mia bo ma ntib a bo te wô'ô ma, ma ye bibi mia a lôte biyoñe zamgbwal aval ane minseme mienan mi né.

²² Ma ye lôme betite ya fé be ne ayok be wôé bone benan a jiane mimbam biyeme mienan a li'i mia ve tyôtyoé; mezene menan ma ye bo bilik.

²³ Ve nge, akôsa bo nalé, mi nji kômbô na me lebe mia, ve viane ke ôsu a bo ntib,

²⁴ ma fe ma ye bo mia ntib a ma ye bibi mia a lôte biyoñe zamgbwal amu minseme mienan.

²⁵ Nkpwaté mekôn wo kun élate jam wo ye vii mia yôp; éyoñ mia ye tube bitisone bienan, ma ye lôme bim ézezañe jenan, a mia ye ku e mo besiñe benan.

²⁶ Eyoñe ma ye kuli mia zaé, binga awôm ba ye yame belet jenan e mbum wua a soo je é too anyenyam avale mia ye di ve teke jaé.

²⁷ Ve nge, akôsa bo nalé, mi nji wô'ô ma, ve viane ke ôsu a bo ma ntip,

²⁸ ma fe ma ye bo mia ntib a ayo'o ese a ve mia meleb a lôte biyoñe zamgbwal amu minseme mienan.

²⁹ Mia ye di minsône mi bobefame benan a minsône mi bobebinga benan.

³⁰ Ma ye tyame bito bienan ya bikôndô'ô yôb a tyame bengunemelane benane ya *zambe jôp, a vise mimbime mienan e mimbim bengunemelane benane yôp, a nleme wom wo ye vini mia *abé.

³¹ Bitisone bienan bia ye bo ne sangaññ a mevôme menan ya nkañan ma ye bo ve si si, a ma ye bo te beta vebe mbamba ényume ya mimboone mienan.

³² Mamien ma ye sa si jenan, nalé besiñe benan ba ye tabe été ba ye bo fe'e ne vema.

³³ Ma ye mialane mia e *meyoñ été a nkpwaté mekôn wo ye zu mia mvus. Si jenan ja ye bo élik avale fe ane bitisone bienan.

³⁴ Eyoñe te si jenan ja ye bi awo'on nté ôse ja ye bo élik, a mia ki mi ntoo mesi besiñe benan: si ja ye wo'on a bi ava'a ya besabate bé.

³⁵ Nté ôse si ja ye bo ne sangaññ, ja ye bi awo'on é nji ke tame bi éyoñe ya besabate benan.

³⁶ E bôt ba ke ôsu a nyiñ e mesi besiñe bap, ma ye jalé minleme miab a biyebe. Ba ye tube zesé éduñ ôkaé évuñulu ja fô'ô; ba ye mate ane ba mate nsiñ a bili nkpwaté mekôn, a ba ye ku teke na môt éziñ a titane be.

³⁷ Bôt ba ye ku ba bevo'o yôb ane éyoñe bôt ba tub ôsu nkpwaté mekôn teke na ba titane be. Mia ye bo te tebe ôsu besiñe benan.

³⁸ Mia ye mane wu ézezañe *meyoñ ma ye kee mia minkôm a si besiñe benan ja ye mine mia.

³⁹ E bôte ya be mia ba ye nyiñ ba ye wu amu minseme miab.

⁴⁰ Ba ye meme bikobe biab a bi b'ésaa bap, melo be nga bo mfa'a wom a ntip be nga bo ma.

⁴¹ Ma fe ma ye bo be ntib a kee be si besiñe bap. Eyoñe te minleme miab mi ne melo mia ye sili mibiene si. A ba ye ya'ane mvôla ya bikobe biap.

⁴² Ma ye simesan élat me nga bo a Yakob, ma ye simesan élat me nga bo a Izak a élat me nga bo a Abraham, a ma ye simesan e ngaka'a me nga bo mfa'a ya si.

⁴³ Ba ye li'i si a si ja ye vak a besabate bé, nté bôt ba ye bo momo été; ba ye ya'ane mvôla ya bikobe biab amu be nga bene minjôane miam a minleme miab mi nga yene memvinda mam *abé.

⁴⁴ V'éyoñ ba ye tabe si besiñe bap, ma ye bo teke bene be a ma ye bo teke vini be a kui vôme ya jiane be, vôme ya tyam élate bia be be, amu me ne Nti e Zambe wop.

⁴⁵ Amu nyiane wop, ma ye simesan élat me nga bo a bimvame biap, ji me nga vaa be si y'Ejipte *meyoñ bikuu me lôô na me ne e Zambe wop: ma me ne Nti.

⁴⁶ Mevinda, minjôan a metiñe Nti a nga telé e zañe jé a bone b'Israél e nkôle Sinayi a anyu Môze mme le.