LEVITIK 25 - Kalate Zambe Nnomo a Mfefe Mfefé Nkôñelan

Mbu si ja yiane wo'on

¹ Ane Nti a nga kobô Môze e nkôle Sinayi a jô na:

² Kobô'ô bone b'Israél a jô be na: Éyoñe mia ye nyiin e si ma ye ve mia, mia ye jô'é si é wo'on nté éziñ amu ma.

³ Tañe mimbu misaman mia ye bé mefube menan, tañe mimbu misaman, mia ye fe sebe ndi'i woone ya mefube menan a faté bibuma y'été.

⁴ Ve mbu zamgbwale ô ne *sabat, awo'on e ne ngumba asu si, *sabat mfa'a Nti: wo ye bo te bé afube dôé, nge sebe afube ndi'i woone dôé.

⁵ Wo ye bo te kôan bidi bia faa bibien e bekusa bôé, nge tyi'i bisanté bibuma ya afube ndi'i woone dôé e ne te nseban: amu mbu ôte wo ye bo mbu awo'on e ne ngumba asu si.

⁶ Amu awo'one si ja ye bi da ye bo mia na mi bi jôme ya di: Womien, mbo ésaé wôé a ne fam, nyô a ne minga, mbo ésaé a nyoñe ma'an a beyeñ be too be wo.

⁷ Biôm bise bia yô si éte bia ye fe bo bidi asu mimbam biyeme miôé a betite ya si jôé.

Mbu ya nkôtan

⁸ Mia ye jô'é mimbu zamgbwal tañe biyoñ zamgbwal mi lôt, nalé a ne na mimbu mewôm menyin a ébu,

⁹ wôna e *môs awômô ya ngone zamgbwale wo ye bo môse ba bulu minsem, ajô te mia ye loñe toñ a ayenga aval ane si jenan ése ja ye wôk.

¹⁰ Nalé ate mia ye telé mbu mewôm metane étyi a bôte bese ya si ba ye nyoñ éto fili jap. Mia ye yôlé mbu te jôé na mbu mefôn. Eyoñe te, môt ase ya be mia a ye bo ngul ya bulan e *nda bôte jé a nyoñe mesi mé.

¹¹ Mbu mewôm metane wo ye bo mia mbu mefôn, mia ye bo te bé jôm, nge kôane jôm é nga faa mefub te na é nga béban, a mia ye bo te faté bibuma ya afube ndi'i woon é ne te nseban.

¹² Amu mbu mefône le: mia ye yene wô étyi. Mia ye di bidi mefube mebien ma ye yô.

¹³ Mbu ôte, môt ase a ye bulane nyoñe mesi mé.

¹⁴ Nge mia kuane monyoñe jôm éziñ, nge kuse jôm éziñ e mo mé, te litane nye njuk.

¹⁵ Eyoñ mia ye kus nge kuan, mia yiane simesan mimbu mi lôteya, ataté mbu mefôn ô nga su'ulan, a fombô fe mimbu ya kôane bidi mi li'iya a kui mbu mefôn wo zu.

¹⁶ Tañe nkuan ja ye bet nge mimbu mi ngenan abui a kui mbu mefôn y'ôsu; a tañe nkuan ja ye sis nge mimbu mite mi li'iya tyôtyoé. Amu tañe biyoñ ya nkôane bidi nje ba kuan.

¹⁷ Môt éziñ ya be mia a ye bo te dian e môte mbok, a wo ye ko Zambe wôé woñ, amu me ne Nti e Zambe wônan.

¹⁸ Bo'on ane metiñe mam ma jô a tuka'a ba'alan miñye'elan mia so be ma, éyoñe te mia ye nyiñ teke woñ éziñ e si éte:

¹⁹ Si ja ye yô bidi bié, mia ye di a jaé a mia ye tabe été teke woñ éziñ e *nlem.

²⁰ Nge mia sili miabebiene na mbu zamgbwale ôse bia ye di jé amu bi nji bi nkañesane ya bé nge kôane bidi ya mefube mangan,

²¹ yemane na ma ye botane mia mbu samane na ô yô bidi mi ne belane bie tañe mimbu mila.

²² Mia ye beta bé bidi mbu muame, ve mbu ôte mia ye nyiñ a bidi mi nga kôan mbu samane; mia ye nyiñ a minnôme bidi mite a kui mbu ébulu, mbu mia ye kôane bidi ya mbu muame.

²³ Ba ye bo te kuane si akuanakuan, amu si é n'énjam, amu mi ne e vôme wom ane mintabe a ane beyeñ.

²⁴ Ajô te e si ése ma ye ve mia, atiñe da ve nkañesane ya beta kôté éfuse si be nga kuan da ye veban.

²⁵ Nge monyoñ a ntoo azoé a a kuan éfuse ya si jé, môt a bili nkañesan ya kôté, nalé a ne na évuvuman ja dañe nye bebé, a ye zu kôté éfuse si monyañ a nga kuan.

²⁶ Nge môt a nji bi môt a yiane kôté éfuse si jé, v'émien a yene mezene ya kôté je,

²⁷ a ye lañe mimbu ataté éyoñ a nga kuane si, e tañe moné ja yian a mimbu mi li'iya a kui mbu mefôn nje a ye bulane môt a nga kus éfuse si, a émien a ye bulane nyoñe je.

²⁸ Nge a bo te bi mezene ya kôté éfuse si jé, éfuse si a nga kuan ja ye bo jôme môt a nga kuse je a kui mbu mefôn, e mvuse éte nje môt a nga kuane si a ye bulane nyoñe je.

²⁹ Nge môt a kuane *nda ya tison é ne mbôma'an a mimfin, a ye bi ngule ya kôté je éyoñe ngume mbu ô lôteya, ataté *môs a nga kuane je; ngule ya kôté *nda ja ye tabe ngume mbu.

³⁰ Ve nge *nda éte, nyô é ne tison é ne mbôma'an a mimfin ja bo te kôtéban te na ngume mbu ô kpwaan, *nda éte ja ye bo nyô môt a nga kuse je a bôte ya mvoñe bôte jé. Ja ye bo te kôlô e mo mab e mbu mefôn.

³¹ Menda ya minlam mi nji bo mbôma'an a mimfin ma ye bo aval ane bifuse mesi ya si éte; be ne ngul ya kôté me éyoñ ése, a dañedañe na ma ye vas e mo me môt a nga kuse me e mbu mefôn.

³² Belévit be bili ngule ya kôté menda ya bitisone biab éyoñ ése.

³³ To'o e mone Lévite mbok nye a nga kuse *nda jia y'été, ja ye bulane bo e ndaa môt émien a ne je e mbu mefôn amu menda mete étam mme me ne ngab Belévit be bili ézezañe bone b'Israél.

³⁴ Be se ngul ya kuane mefub me ne mefôla ma bômane bitisone biab amu me ne mefube mab nnôm éto.

Mvolane minzôzoé mi bôt

³⁵ Nge monyoñ a kuiya azoé e fefele jôé a biôme ya nyiñe bie bi nga jemban, wo ye volô nye to'o a ne *ntabe nge nneñ, nalé mia nye mia ye nyiñ.

³⁶ Wo ye bo te sili nye nsenge ng'abet, amu wo ye ko e Zambe wôé woñ, a mia monyoñ mia ye ke ôsu a tabe vôme wua.

³⁷ Wo ye bo te kôlé nye moné a nsenge nge kôlé nye bidi biôé ô sili'i nye abet.

³⁸ Ma me ne Nti, e Zambe wôé a nga soo mia si y'Ejipte, a ve mia si ya Kanaan na me bo e Zambe wônan.

Bone b'Israél be ne belo ba yiane kôtéban

³⁹ Nge monyoñ a ntoo *nzôzoé e fefele jôé a a kañese kuan émien be wo ane mbo ésaé, wo ye bo te ve nye bisaé bi *ôlo.

⁴⁰ A ye tabe be wo ane mbo ésaé a nyoñe ma'an, aval ane nneñ; a ye saane wo a kui e mbu mefôn.

⁴¹ Eyoñe te a ye kôlô be wo, émien a bone bé, a a ye bulan e *nda bôte jé, éli'i b'ésaa bé.

⁴² Amu be ne bebo bisaé bam me nga vaa si y'Ejipte. Ba ye bo te kuane be ane ba kuan alo.

⁴³ Wo ye bo te belane nye a njet ése, ve wo ye ko Zambe wôé woñ.

⁴⁴ Wo ye nyoñ *ôlo a mbo ésaé minga wé e be *meyoñ ma bômane mia: é nne mia ye kus *ôlo a mbo ésaé minga wé e be be.

⁴⁵ Mi ne fe kuse be be so'o e be bone bikule bi nga zu tabe si jenan, nge so *meyoñ me ne e si jenan me té'é be be: ba ye bo jôme jenan.

⁴⁶ Eyoñ mi wuya, mia ye li'i be ane élik e be bone benan; mia ye ba'ale be ane belo nnôm éto. Ve mfa'a bobenyoñ, bone b'Israél, môt éziñ ya be mia a ye bo te tibi monyañe yôb a njet ése.

⁴⁷ Nge *ntabe, nge nneñ a too e *nda jôé a bili akum a monyoñe wôé ki a kui azoé e fefele jé a kuan émien e be *ntabe ate nge e be nneñ a too e *nda jôé, nge e be môte mfe ya ayoñe *ntabe ate,

⁴⁸ monyoñ ate a ne ngul ya kôtéban éyoñ be maneya kuse nye. Wua ya bobenyañ a ne ngul ya kôté nye.

⁴⁹ Ndômenyañ nge mona ndômenyañ, nge wua ya bivuvuman bia dañe nye bebé, a ne ngul ya kôté nye. Nge a bi mezen, a ne fe ngul ya kôté émien.

⁵⁰ Eyoñe te ba môt a nga kuse nye ba ye lañ ataté mbu a nga kuan émien a kui mbu mefôn. Tañe moné a ye ya'an ja ye lu'an a tañe mimbu é li'iya a kui mbu mefôn. Tañe moné ya mbu ôse ja ye bo ane nyô ba ya'ane mbo ésaé.

⁵¹ Nge mimbu mi ngenan abui, a ye bulane beta ngabe ya tañ be nga kuse nye.

⁵² Ve nge mimbu mi li'iya tyôtyoé a kui mbu mefôn, éyoñe te a ye bo tañ, a a ye bulan, asu ngôtô wé, tañe ja yian a mimbu mite.

⁵³ Nté ôse a ngenan a too e be môt a nga kuse nye, masa wé a ye belane nye ane mbo ésaé a nyoñe ma'an, a te kañese na masa ate a tibili nye a njet mise môé me lôô.

⁵⁴ Ve nge a bo te kôtéban a zene jia ya mezene ma, a ye kôlô e mbu mefôn, émien a bone bé.

⁵⁵ Amu bone b'Israél be ne bebo bisaé bam, bebo bisaé bam me nga vaa si y'Ejipte: ma me ne Nti e Zambe wônan.