LEVITIK 22 - Kalate Zambe Nnomo a Mfefe Mfefé Nkôñelan

Bôt be nji yiane di mimvean mi n'étyi

¹ Ane Nti a nga kobô Môze a jô nye na:

² Kobô'ô Aron a bone bé na be bo te nambe mimvean mi n'étyi ya jôé dam: ma me ne Nti.

³ Jô'ô be na: É miaé mia zu, nge môt éziñe ya *nda bôte betuni a ye subu bebé a mimvean mi n'étyi bone b'Israél ba ve Nti a too te *mfuban, ba ye vaa nye te beta bo ésaé jam Ma me ne Nti.

⁴ Môt ase ya mvoñ Aron a kone *zam nge menyôlôk, a ye bo te di mimvean mi n'étyi akekui a ntoo *mfuban. Avale te fe e né mfa'a nyô a nambe môt a ne mbilane mvin amu nnambane mbim, a nyô meyôm me nga kui atan.

⁵ Môt a ye nambe jôm ja nyi'itan a ntoo mvin, nge nambe môt a be'e nsem wo selan, aval ese nsem ôte ô né

⁶ môt ate a ye tabe te *mfuban a kui mamengô'é; a ye bo te di mimvean mi n'étyi, ve a ye wobane mendim.

⁷ Eyoñe jôb e dimiya, a ye bo *mfuban, a éyoñe te a ye di mimvean mi n'étyi, amu bidi bié le.

⁸ A ye bo te di tit ja te wu ntui, nge mbilize amu é za ve nye mvin: ma me ne Nti.

⁹ Betuni ba yiane bo e jam ma bendé be, to'o ajô mam bidi. Nge ba ndaman étyi ya bidi, ba ye wu. Ma me ne Nti. A ma ma telé be étyi ésaé jam été.

¹⁰ Môt ase a nji bo *ntuni a se nguleya di mvean ô n'étyi. E môt a ne nneñ be *ntuni, a nyô a saé asu ma'an be nye ba ye bo te di mvean ô n'étyi.

¹¹ Ve mbo ésaé *ntuni a nga kus a moné a ne ngul ya di, nalé fe nyô a nga bialé e *nda jé été; bebaane ba ye di bidi bié.

¹² E ngone *ntuni é nga lu'u môt a nji bo *ntuni, a ye bo te di ngab be nga kandé e mimvean mi n'étyi été.

¹³ Ve ngone *ntuni é ne nli'ane nkus nge na be nga suu te mon, é bulane b'ésaa aval ane melu a nga too mongô, é ne ngul ya di bidi bi ésaa. Ve nyô a nji bo *ntuni a se ngul ya di.

¹⁴ Nge môt a di mvean ô n'étyi e fu'an, a ye ya'ane *ntuni e tañe mvean wo yiane kui a bete fe ngabe tane ya tañ éte.

¹⁵ Betuni ba ye bo te ndaman étyi ya mimvean mi n'étyi e mie bone b'Israél be nga kandé asu Nti.

¹⁶ Nge ba di mie éyoñ be nji bo nkômesan, be betéya bone b'Israél étom bitul a nje ja sili nkôman. Ma me ne Nti, a ma ma telé betuni étyi ésaé jam été.

Ntobane * bityi'a asu metuna'a

¹⁷ Ane Nti a nga kobô Môze a jô na:

¹⁸ Kobô'ô Aron, bone bé a bone b'Israél bese a jô be na: Môt ase ya *nda Israél, nge mintabe y'Israél a ye ve Nti mimvean mia di'ibane ngumba, mi too jôm émien a nga tiñeti, nge jôm a ve ane nleme wé ôbien wo kômbô,

¹⁹ a ye nyoñe nnôm a ne teke ayeñ e benyak, e bitoñ mintômba a bitoñe bikela été, éyoñe te ma ye bo nye mvaé.

²⁰ Mia ye bo te ve étyi'a é bili éyem éziñ amu ma ye bo te kañese je asu denan.

²¹ Nge môt a ve Nti éyeme ya beta mbam nge mone mbam ane mveane ya nlatane ngbwa, amu a tôé jam a nga tiñeti nge na a bo ane nleme wé ôbien wo kômbô, ja yiane bo *mvo'é ne selem, éyoñe te ja ye nyoñebane *mvo'é.

²² Mia ye bo te ve éyeme é too ndim, mbu'ane vôm éziñ, ébu'a ntyi'an, é be'e étut, é kone zamengôla nge bikôba'a, mia ye bo te ve je ane mvean wo di'ibane nduan asu Nti ata'a metuna'a yôp.

²³ Nge tit éziñ: nyak, ntômba nge ékela é bili éyem éziñ, nge na bibu'a bié biziñ bi nji yaé ane da yian, be ne ve je ane mvean *nlem ôbien wo kômbô, ve saa ane mveane ya tôé ntiñetan.

²⁴ Mi nji yiane ve Nti tit mimbañ mi abin mi ne nko'on, ntya'an, ntéan nge ntyi'an, a mia ye bo te tube betite *miak avale te e si jenan.

²⁵ A te kusane avale betite te e mo bikuu a ve ma be, ma, e Zambe wônan, ane *bityi'a. Mvaan be nga vaa be bibu'a ya nyôl wo futi be e ngabe betit be mbili ayeñ, ajô te me se fe nguleya kañese éyoñ mia ve ma be.

²⁶ Ane Nti a nga kobô Môze a jô nye na:

²⁷ Éyoñe mone nyak, ntômba nge ékela a ndôme bialé, a yiane nyiñe fefele nyia tañe ngume sondô. Ataté môse muame, ma kañese na be ve ma nye ane mvean wo di'ibane nduan.

²⁸ Ve mi nji yiane wôé ngale nyak, ngale ntômba nge ngale ékela baa mon môse wua.

²⁹ Eyoñe mia ve Nti étyi'a ya mvean akéva, mia ye ve je avale da yiane na é nyoñebane *mvo'é.

³⁰ Ja ye diban e *môs ôbien ja te veban; mia ye di je jôm te kui mametyé: ma me ne Nti.

³¹ Mia ye ba'ale mebendé mam a bo me: ma me ne Nti.

³² Mia ye bo te ndaman étyi ya jôé dam é n'étyi, nalé ma ye bo étyi e bone b'Israél été: ma me ne Nti a nga tobe mia mi bo ayoñ e n'étyi.

³³ A me nga vaa mia si y'Ejipte na me bo e Zambe wônan: ma me ne Nti.