LEVITIK 20 - Kalate Zambe Nnomo a Mfefe Mfefé Nkôñelan

Mbia mimboon mia dutu awu

¹ Ane Nti a nga kobô Môze a jô na:

² Wo ye jô bone b'Israél na: Môte ya bone b'Israél nge mintabe mi too Israél a ye ve môte ya mvoñe jé be *zambe Molok a ye fo'o wôéban: bôte ya si jé ba ye lume nye *mekok.

³ Amu ma fe ma ye telé môt ate asu dam ngame yat a ma ye vaa nye ayoñ Israél été amu a nga ve Molok wua ya bone bé mfa'a ya ve vôme wom a n'étyi mvin a ndamane fe jôé dam e n'étyi.

⁴ Nge bôte be too si éte ba viane dime mis mfa'a môte a ve Molok wua ya bone bé a bo te wôé nye,

⁵ mamien ma ye telé asu dam e ngame môt ate yat a *nda bôte jé, a vaa nye Israél été ba be ba bese ba kañe Molok aval'ane émien.

⁶ Nge môt a ke yene bebi'i bekôn nge bekobô mame ya melu ôsu a kañe bengunemelan ba be be, ma ye telé asu dam e ngame môt ate yat a vaa nye bôte bé été.

⁷ Mia ye telé miabebien étyi a mia ye bo étyi amu me ne Nti e Zambe wônan.

⁸ Mia ye ba'ale metiñe mam a bo me: ma me ne Nti a nga tobe mia na mi bo ayoñ e n'étyi.

⁹ Môt a yo'é ésaa nge nyia a ye wôéban; amu a nga yo'é ésaa nge nyia, a ye be'e mekua ya awu dé émien.

¹⁰ Nge môt a bo *mejian a minga a ne nlu'an, nge bo *mejian a nga môt baa nye be too, fam ba minga *mejian ba ye wôéban.

¹¹ Nge fam ja jô'ôbô nga ésaa a yene soé ésaa amu mboone te, fam éte a minga ate ba ye wôéban: metyi mab ma ye bulan e be bebien.

¹² Nge fam ja jô'ôbô mbome wé, bebaane ba ye wôéban amu be boya mful'énoñ a nji yian. Metyi mab ma ye bulan e be bebien.

¹³ Nge fam ja jô'ôbô fame fok ane ba jô'ôbô minga, bebaane be boya jam e n'angôndô; ba ye wôéban a metyi mab ma ye bulan e be bebien.

¹⁴ Nge fam ja lu'u ngon a nyia ngon bebaane: mbia jame le: ba ye di'i be belale e nduan, nalé mbia jam ate a ye bo te tabe ézezañe jenan.

¹⁵ Nge fam ja jô'ôbô tit, ja ye wôéban, tite fe ja ye wôéban.

¹⁶ Nge minga a subu tite bebé a jô'ôbô je, ba ye wôé minga a tit; ba ye wôéban bebaane a metyi mab ma ye bulan e be bebien.

¹⁷ Nge fam ja nyoñe kale jé ngon ésaa nge ngone nyia, a yene je soé a je ke é yene soé jé, jam ôsone le; ba ye nyoñe meleb e bôte bab be lôô: amu môt ate a nga yene soé kale jé, a ye be'e adite mbe'e ya mekua mé émien.

¹⁸ Nge fam ja jô'ôbô minga a yene ngon a kuli soé jé, nge fam éte ja liti metyi ma kui minga ate éngengeñ, a minga ate a yene metyi, bebaane ba ye vas e zañe bôte bap.

¹⁹ Wo ye bo te yene soé monyañe nyua nge soé ésoñgo: amu wo telé môte mia nye mi ne abialé soé. Bôte ba bo nalé ba ye be'e adite mbe'e ya mbia mboone wop.

²⁰ Nge môt a lu'u nga ndômenyañ, a kuliya soé ndômenyañ atan; bebaane ba ye be'e adite mbe'e ya *abé dap: ba ye wu teke *bon.

²¹ Nge fam ja lu'u nga monyañ, nalé a ne mvin; a kuliya soé monyañ atan: ba ye bo teke *bon.

²² Ajô te mia ye ba'ale metiñe mam mese a minjôane miam a bo bie, éyoñe te si, e vôme ma kee mia na mi tabe, ja ye bo te yô mia.

²³ Mia ye bo te tôñe mimboon mi mame ya *meyoñ ma ye titan ôsu vienan; amu be nga bo mam mete mese nde me nga vini me.

²⁴ Me nga jô mia na: Mia ye nyoñe si jab a ma ye ve mia je: si menyañ a wôé bia len: ma me ne Nti, e Zambe wônan, ma me nga kandé mia a *meyoñ mevok.

²⁵ Mia ye ve nkandan e zañe betit be ne *mfuban a ba be ne te *mfuban, e zañe anon e ne te *mfuban a di e ne *mfuban, nalé mia ye bo te bo bôte benan be yené mvin amu betit, anon a jôm ése ja woñe si, mbie me nga tyili mia na bi ne mvin.

²⁶ Mia ye bo étyi asu dam, amu ma Nti, me n'étyi; me nga kandé mia a *meyoñ mevo'o na mi bo v'émbam.

²⁷ Nge fam nge minga be bili fulu ya bi'i bekôn é too be be, nge nyô ya yene mame ya melu ôsu, ba ye wôéban; ba ye lume be *mekok a metyi mab ma ye bulane be bebien.