LEVITIK 19 - Kalate Zambe Nnomo a Mfefe Mfefé Nkôñelan

Avale Zambe a kômbô na be bo nye ésaé

¹ Ane Nti a nga kobô Môze a jô na:

² Kobô'ô ékôane bôt ése y'Israél na: Mia ye bo étyi, amu ma Nti, e Zambe wônan, me n'étyi.

³ Môt ase ya be mia a ye semé nyia a ésaa a ba'ale fe besabate bam, ma me ne Nti Zambe wônan.

⁴ Mia ye bo te kôñelan e be azezambe nge bo miabebien bive'ela'a bi azezambe a nyeman étyé. Ma me ne Nti e Zambe wônan.

⁵ Eyoñe mia ve Nti mimveane ya nlatane ngbwa, va'an mie avale da yiane na mi nyoñebane *mvo'é be ma.

⁶ Ba ye di étyi'a e môse ja veban nge *môs wo tôñe valé. Jôme ja buk a kui môse lale ja ye di'ibane nduan.

⁷ Nge ba di je e môse lale, étyi'a te é ntoo jôm é ne te *mfuban a me se nguleya kañese je.

⁸ Môt a ye di je a yiane yeme na a ndaman étyi ya jôm é ne ma mvean a émien a ye be'e mekua ya ékobe jé; môt ate a ye vaseban e zañe bôte bé.

⁹ Eyoñe mia ye kôane bidi e si jenan, wo ye li'i vôm éziñ y'été teke kôane bidi ya valé, nalé fe na wo ye bo te bulan ke kôane jôm é ne nli'ane mvus.

¹⁰ Wo ye bo te kolé bisanté bi ne nli'an afube mindi'i dôé, nge to'é mefese mese me ne nkuan été. Wo ye li'i éngôngole môt a *ntabe biôm bite. Ma me ne Nti, Zambe wônan.

¹¹ Mia ye bo te wup; môt ase ya be mia a ye bo te laane môt ba nye be too minsos nge du'u nye.

¹² Mia ye bo te kane ngana minsos a jôé dam, amu ô za ndaman étyi ya jôé e Zambe wôé. Ma me ne Nti.

¹³ Wo ye bo te wôlé môte mia nye mi too jôm a ngu nge wube jôm éziñ. Wo ye bo te ba'ale ma'an me mbo ésaé e *nda jôé a kui mametyé.

¹⁴ Wo ye bo te kobô ndôndok nkobô *nkpwala a ésas, a te bôé ndindim jôme ya kolé wô ôbak ôsu. Ve wo ye ko Zambe wôé woñ, ma me ne Nti.

¹⁵ Te boon ékotekot ntyi'ane mejô été: te ko môt a n'atek éngôngol é ne te yian nge semé beta môt ésemé é ne te yian, ve mia ye tyi'i bôte mia be be mi too mejô teke ôbangam.

¹⁶ Wo ye bo te ndeñe mfuk e bôte bôé été. Te ve'ele bo na môte mia nye mi too a nyoñe meleb y'awu amu bibôta mejô biôé asu betyi'i mejô: ma me ne Nti.

¹⁷ Te siñe monyoñ e nleme wôé été, ve ô va'a nye bijô nalé wo ye bo te be'e mekua ya *abé dé.

¹⁸ Te kune womien a te ba'ale bone ya ayoñe dôé ôviti'i *nlem, ve wo ye nye'e e môt a too wo bebé ane wo nye'e womien: ma me ne Nti.

¹⁹ Mia ye fe ba'ale memvinda ma, te kañese na mevale me tite mebaé me yam; nalé fe te miase mvoñ mevale mebaé afube dôé été; a wo ye bo te jaé ngômesan é too ntiñan a minsiñga mevale mebaé.

²⁰ Nge fam éziñ ja fulane minga, nge minga ate a ne mbo ésaé a bili *atiñ aluk a fame fe ve a nji bi éto fili, ba ye lume bebaé v'aleman, ve saa melebe y'awu, amu minga ate a nji bi éto fili.

²¹ Amu mekua mé, fam ja te jô'ôbô minga ate ja yiane zuu nnôm ékela e be Nti, anyiine *nda éndelé bendôba'an asu mveane ya mvaane mekua.

²² Eyoñe te *ntuni a ye bulu nsem asu dé asu Nti, amu *abé a nga bo; a ye bulu nseme te a nnôm ékela a nga veban asu mveane ya mvaane mekua, wôna *abé a nga bo da ye jambane nye.

²³ Eyoñ mi nyiiya si ya Kanaan a bé bilé bia wum bibuma mevale mese, mia ye yene bibuma y'été bi too te *mfuban tañ mimbu mila a mia ye bo te di bie.

²⁴ Bibuma bia ye wum e mbu nyini, mia ye ve ma bie ézezañe abô'ô meva'a été.

²⁵ Mbu tane mia ye di bibuma ya bilé bite, nge mia bo nalé nkôane bidi wônan wo ye nenenen, ma me ne Nti, e Zambe wônan.

²⁶ Te diane minsôn mi tit e vôm émiene ya mi nga kuli je metyi. Te boone mame ya majik nge bo mame ya bemvi'i.

²⁷ Te tyembane ntyi'i e minlô nge tyeñe meku'u ya zele jôé.

²⁸ Te tenane mimbak e menyôle ane ndeme ya meyep, nge kpwele bikanga e bikôbe bienan: ma me ne Nti.

²⁹ Te sili ngo jôé si éyoñ wo tindi je na é bo ébamba amu na ngume si ôse ô za nyiin ébamba été a bo mbia jôm e mise me Nti.

³⁰ Mia ye ba'ale besabate bam a semé vôme wom a n'étyi: ma me ne Nti.

³¹ Te kean e be ba ba loone minsisim bekôn nge bi'i mam ma ye boban melu ôsu, mi za ve miabebien mvin a be: ma me ne Nti, e Zambe wônan.

³² Wo ye tebe tetele asu ya nyô nlô ô ntoo ne fuum a semé éto nnôme jé. Wo ye ko Zambe wôé woñ: ma me ne Nti.

³³ Nge *ntabe wo zu tabe e si jenan mia be be, te belan wô ane e ne te yian.

³⁴ Mia ye belan e *ntabe ô too be mia ane bialébialé ya zañe jenan; wo ye nye'e nye ane womien, amu mi nga too mintabe e si y'Ejipte: ma me ne Nti e Zambe wônan.

³⁵ Mia ye bo te bo ékotekot to'o e ntyi'ane mejô été, to'o éyoñ mia ve'e nté a ndam, nge adit nge abim.

³⁶ Mia ye belane minlôt mi ne zôsôôô, metyi minlôt me ne zôsôôô, nkoé ô ne zôsôôô, a viek ô ne zôsôôô: ma me ne Nti e Zambe wônan, Nyô a nga soo mia si y'Ejipte.

³⁷ Mia ye ba'ale memvinda mam mese a minjôane miam mise a bo mie: ma me ne Nti.