LEVITIK 14 - Kalate Zambe Nnomo a Mfefe Mfefé Nkôñelan

Mboon ya fubu nzezam

¹ Nti a nga kobô Môze a jô nye na:

² Éyoñe ba ye fubu nzezam, avale di nde da ye boban: ba ye ke liti nye *ntuni,

³ éyoñe te *ntuni a kui e minkan atan a fombô nye nge môt ate a yeteya *zam.

⁴ Ntuni a ye bendé na be zuu anon abaé bevevee e too fe *mfuban, be zuu nja'a élé sédre, nalé fe mevule me ntômba nduban ôbe évele a abui izôpe.

⁵ Eyoñe te a bo na be tyi'i ônone wua *tyiñ élaba'a tyia yôb é bili mendim y'anjeñ.

⁶ Emien a ye nyoñ ônon ôvok a nja'a sédre, a mevule me ntômba me ne ôbe évele a abui izôpe a dube bie e metyi ya ônon ba te tyik;

⁷ éyoñe te a miame metyi mete biyoñe zamgbwal e nyôle môt a yiane tuneban ôkone zame wé. Mvus éte *ntuni a ye yôtane na môt ate a ntoo *mfuban wôna a ye suu vevea ônon a yele a ke afan.

⁸ Môt ate a ye sôbe mengômesane mé, a mane tyeñe mimvote mié a wobane fe mewoban ma fubu nye. Eyoñe te a bulane nyiin e minkan, ve a ye tabe e *nda éndelé jé atan tañe ngume sondô.

⁹ E môse zamgbwale, a ye beta tyeñ ésile jé, e zele jé, bivula bié a mimvote mivo'o mise, a mane sôbe mengômesane mé a woban: ataté éyoñe te a ntoo *mfuban.

¹⁰ E môse muame, môt ate a ye nyoñe mintômba mibaé mi too *mvo'é ne selem, a nyoñe fe mvean avut kili ébuu mfu'an a mbon, nalé fe étune lita mbone jia.

¹¹ Ntuni a bo ésaé melu mete a ye telé môt ate a mimveane mié asu Nti, anyiine *nda éndelé bendôba'an.

¹² A ye nyoñe ntômba wua a ve wô ane étyi'a ya *njaman abé, a ye fe ve étune lita mbon éyoñe te a bo biôme bite ndeñkolô ôsu Nti.

¹³ A ye tyi'i ntômba e vôm ba tyi'i mimvean asu *njaman abé nge ke mimvean mia di'ibane ngumba, nalé a ne na e vôm a n'étyi, amu étyi'a ya mvaane mekua avale fe ane ji ya *njaman abé bi ne asu *ntuni, ane biôm bi ne étua étyi.

¹⁴ Ntuni a ye nyoñe metyi m'étyi'a ya mvaane mekua, éyoñe te a wo'o me e *nda alo ya mbo nnôme môt a tuneban, nalé fe e nnôm ônyu ya akule wo dé ya mbo nnôm a e nnôm ônyu ya akul abo dé ya mbo nnôm.

¹⁵ Eyoñe te fe *ntuni a nyoñe mbon a sôé wô e wo wé ya mbo ngal;

¹⁶ A ye dub ônyu vié ya mbo nnôm e mbon ô ne nye akule wo dé ya mbo ngal été, a miame mbone te a ônyu tañe biyoñe zamgbwal ôsu Nti.

¹⁷ Ntuni a ye nyoñe mbon wo li'i nye wo a futi wô ndaa alo ya mbo nnôme môt a tuneban, nalé fe nnôm ônyu ya abo dé ya mbo nnôm a e nnôm ônyu ya abo dé ya mbo nnôm, e vôme fe a tameya futi metyi me ntômba asu mvaan *abé.

¹⁸ Ntuni a ye sôé mbon wo li'i nye wo e nlô môt ate a bo mam ya fubu nye asu Nti.

¹⁹ Wôna *ntuni a ye bo metuna'a ya *njaman abé a mam mese y'été, éyoñe te a su'ulan bo mimvean mia di'ibane ngumba.

²⁰ A ye ve mimvean mia di'ibane ngumba ata'a metuna'a yôp a mvean avut. Ntuni a ye beta bo mame ya vaa *abé asu môt ate, wôna a ye bo *mfuban.

²¹ Nge ntunan nzezam ô ne azoé. Môt a ne *nzôzoé a teke bi mezene ya ve mimvean mise ba sili, a ye nyoñe mone ntômba wua asu mimveane ya mvaan abé; ba ye liti nye Nti ane môt ate a ne nguleya tuneban. A ye fe nyoñe kili avut élaa mfu'an a mbon a nyoñe fe étune lita mbon,

²² adu abaé nge zum ébaé avale jôm ése émien a ne nguleya bi: ônone wua asu mimvean ya mvaan *abé, ônon ôvok asu mimveane mia di'ibane ngumba.

²³ E môse muame, a ye zuu mimvean mite mise e be *ntuni, anyiine *nda éndelé bendôba'an, asu Nti.

²⁴ Ntuni a ye nyoñ étoñe ntômba asu mimveane ya mvaane mekua a étune lita mbon éyoñe te a bo bie ndeñkolô asu Nti.

²⁵ A ye tyi'i étoñe ntômba *tyiñ, a nyoñe metyi mé, a wo'o me môt ate e ndaa alo ya mbo nnôm a e nnôm ônyu ya wo wé ya mbo nnôm a e nnôm ônyu ya abo dé ya mbo nnôm.

²⁶ A ye sôé mbon e wo wé ya mbo ngal été,

²⁷ A ye miame mbon ô ne wo wé ya mbo ngale te asu Nti biyoñe zamgbwal a ônyu ya wo wé ya mbo nnôm.

²⁸ Ntuni a ye futi mbon ô ne wo e ndaa alo ya mbo nnôme môt a tuneban, nalé fe e nnôm ônyu ya wo wé ya mbo nnôm, a e nnôm ônyu ya abo dé ya mbo nnôm, e vôme fe a nga futi metyi m'étyi'a ya mvaane mekua.

²⁹ Ntuni a ye futi mbon wo li'i nye wo e nlô ya nyô a tuneban, nalé a ye bo mame ya *njaman mfa'a wé ôsu Nti.

³⁰ Eyoñe te a ye ve ôdu wua nge zume jia ya ba be nga nyoñeban e biôm a bili été,

³¹ jôm ése a ye bo nguleya bi, ônone wua asu mimveane ya *njaman abé, wu ôvok asu mimveane mia di'ibane ngumba a mvean avut; éyoñe te *ntuni a ye bo mame ya njamane môt a tuneban ôsu Nti.

³² Atiñ da fombô nzezam ô ne te mezene ya ve biôm ba sili asu ya fubu nye nde le.

Sun ya mimfine mi nda

³³ Ane Nti a nga kobô Môze baa Aron a jô be na:

³⁴ Éyoñe mi kuiya e si ya Kanaan nje ma ve mia é bo énjenan, nge ma bo na abat sun e kui e *nda éziñ ya mfefé si mia ye bi,

³⁵ môt a ne *nda éte a ye ke kate *ntuni jame te a jô na: Me yeneya abat e *nda jam.

³⁶ Ntuni a ye bendé na biôm bise bi ne *nda été bi kui atan nté émien a ngenan teke yen abate te, éyoñe te jôm ése é ne e *nda été ja ye bo te bili mvin. Wôna *ntuni a ye nyiine *nda a fombô abate te.

³⁷ Nge e bili bibé bi too ane mekaé bilé nge ôbe évele, nge abate te da bo ébé e mfine *nda,

³⁸ Ntuni a ye kui atan a dibe *nda tañe ngume sondô.

³⁹ E môse muame, *ntuni a ye beta zu fombô éyoñ éfe: nge abat e maneya yiane mfine *nda,

⁴⁰ *ntuni a ye bendé na be vaa *mekok me maneya bili mieñgele a wua me e vôm a nji bo *mfuban e tison atan.

⁴¹ A ye bo na be mane wome mimfine mi *nda mise mfa'a y'été; ba ye wua mvin éte ése e vôm a ne te *mfuban e tison atan.

⁴² Ba ye nyoñe meko'o mefe a tyendé ma ya ôsu; ba ye fe nyoñe jôm éfe ya beta kone *nda.

⁴³ Nge abate mieñgele da beta yené éyoñ éfe e *nda a koé na be maneya vaa meko'o me nga ndaman, a koé fe na be maneya wom a beta kone mimfin,

⁴⁴ *ntuni a ye beta ke fombô: nge e ne nalé na abat e beteya fo'o kui, nalé a ne na mieñgele ate a se nguleya beta kôlô *nda: *nda éte é nji fe beta bo *mfuban.

⁴⁵ Ba yiane tyame je, to'o mevôm me bili *mekok, nge mevôm me bili bilé; wôna ba ye be'e mbuan a jôm be nga koone je *nda é maneya kutan a kee bie e vôm a ne te *mfuban e tison atan.

⁴⁶ E môt ase a nyiine *nda melu ja yiane tabe mfetan, môt ate a nji fe bo *mfuban a a ye tabe nalé a kui mamengô'é.

⁴⁷ Môt ase a bômbô e *nda éte nge di jôm éziñ été, a yiane sôbe mengômesane mé.

⁴⁸ Ve nge *ntuni a yen, éyoñ a beteya fombô *nda na abat e nji beta kui e mvuse nkonane *nda, a ye yôtane na *nda éte é ne *mfuban amu mieñgele a maneya.

⁴⁹ Mfa'a ya fubu *nda, *ntuni a ye nyoñ anon abaé, nja'a sédre, mevule me ntômba nduban ôbe évele a abui izôpe.

⁵⁰ A ye tyi'i ônone wua *tyiñ, élaba'a tyia yôp, é bili mendime ya anjeñ.

⁵¹ A ye nyoñe nja'a sédre, abui izôpe, mevule me ntômba nduban ôbe évele a ônon ôvok, éyoñe te a dube bie e metyi m'ônon a te tyi'i *tyiñ a e mendim y'anjeñ, éyoñe te a miam e *nda biyoñe zamgbwal.

⁵² Ajô te a ye tun *nda éte a metyi m'ônon, mendime y'anjeñ, ônon ô vee, nja'a sédre, abui izôpe a mevule me ntômba me n'ôbe évele.

⁵³ A ye suu vevea ônon a yele e tison atan, mfa'a y'afan. A ye su'ulane bo jame ya fubu *nda éte, a ja ye bo *mfuban.

⁵⁴ Atiñ da fombô mevale me *zam, meko,

⁵⁵ mieñgele ya mengômesan a sun ya menda,

⁵⁶ memvim, bikôba'a a mebat nde le.

⁵⁷ Atiñe te da volô mfa'a ya yemelan biyoñe bôt nge biôm bi nji bo *mfuban nge éyoñ bi ne *mfuban. Atiñ asu *zam nde le.