LEVITIK 13 - Kalate Zambe Nnomo a Mfefe Mfefé Nkôñelan

Akon y'ékôbe nyôl

¹ Nti a nga kobô Môze baa Aron a jô be na:

² Éyoñe môt éziñ a ye bi mvin ékôbe nyôle jé nge ékôba'a, nge abat da su'ulane bo fôle *zam ékôbe yôp, ba ye zuu môt ate be *ntuni Aron, nge be wua ya bone bé be ne betuni.

³ Ntuni a ye fase fôl é ne ékôbe nyôl. Nge mimvot y'été mi ntoo éfumulu a nge fôl ébien é ntoo édok a dañ ékôp, wôna fôl éte é ntoo *zam. Eyoñe *ntuni a maneya fas, a ye mialane foé na môt ate a nji beta bo *mfuban.

⁴ Nge éfumulu abat é n'ékôbe nyôl é nji ke dañ édok a mimvot y'été teke éfumulu, *ntuni a ye fete môt ate e *nda été tañe melu zamgbwal.

⁵ E môse zamgbwale, *ntuni a ye beta fase môt ate. Nge fôl é nji ke nen a yian ékôbe nyôl, *ntuni a ye beta fete nye éyoñe baa tañe melu zamgbwal.

⁶ E môse zamgbwale, *ntuni a ye beta fase nye. Nge fôl éte é ntoo abôl teke yian ékôbe nyôl, *ntuni a ye yôtane na môt ate a ne *mfuban: jôme te é n'ékôba'a, môt ate a ye sôbe mengômesane mé wôna a ye bo *mfuban.

⁷ Ve nge ékôba'a ja mane yian ékôp, éyoñe te a maneya liti émien e be *ntuni na a lañebane *mfuban, a ye beta ke yené e be *ntuni éyoñe baa,

⁸ na a fase nye. Nge ékôba'a é maneya yian ékôp, *ntuni a ye yôtane na a nji ke bo *mfuban: a kone *zam.

⁹ Eyoñe fôle *zam ja ye kui e nyôle be môt éziñ, ba ye zuu nye be *ntuni na a fombô nye.

¹⁰ Nge éfumulu mvim ja yené ékôbe nyôl, a nge mvim éte é veñesaneya mimvote ya vôm ate éfumulu a na minsône ya vôme mvim é né mia yô,

¹¹ *zam éte é ne nyô é tabeya ayab ékôb be môt ate. Ntuni a ye yôtane na a nji bo mfuban; a ye bo te fete nye e *nda été amu a nji bo *mfuban.

¹² Nge *zam ja kui a mane yian ékôbe nyôl ése ya môt a be'e fôl, ataté nlô a kui mebo, e vôm ase ntuni

¹³ a ye fase nye, a yene tyi'ibi, nge *zam ja mane yiane nyôl ése, *ntuni a ye yôtane môt a be'e fôle na a ne *mfuban, amu nyôle jé ése é ntoo éfumulu, nde môt ate a ne *mfuban.

¹⁴ Ve *môs be ne yene minsôn mia yô e nyôle jé, môt ate a nji fe bo *mfuban.

¹⁵ Eyoñe *ntuni a yeneya minsôn mia yô, a ye yôtane na môt ate a nji bo *mfuban: amu minsôn mia yô mi nji bo *mfuban, *zam nje le.

¹⁶ Nge minsôn mia yô mia tyendé a bo éfumulu, môt ate a ye ke be ntuni

¹⁷ na a fase nye; nge fôl é ntoo éfumulu, *ntuni a ye yôtane na môt ate a ntoo *mfuban.

¹⁸ Nge môt éziñ a nga kone jot e mane yet,

¹⁹ nge éfumulu mvim ja kui e vôme jot e nga too, nge abat e n'éfumulu da bo ne vé, môt ate a ye ke yene *ntuni.

²⁰ Ntuni a ye fombô môt ate. Nge abat e n'édok a dañ ékôp, a mimvote ya valé bifumulu, *ntuni a ye yôtane na a nji bo *mfuban: fôle *zam nje le é nga kui e vôme jot e nga too.

²¹ Nge *ntuni a lôô na éfumulu mimvot é nji bo abat été, a na abate te e nji bo édok a dañ ékôbe nyôl, e ntoo fe abôl, a ye fete môt ate e *nda été tañe melu zamgbwal.

²² Nge abat da mane yiane nyôl, *ntuni a ye yôtane na môt ate a nji bo *mfuban: fôle *zam nje le.

²³ Ve nge abat e tele vôme wua teke mialan: évele jot nje le; *ntuni a ye yôtane na môt ate a ne *mfuban.

²⁴ Nge môt a te di'i e nduan, ateme na abate da faé e fumu fe, nge na abat e ne ôbe évele da kui e vôme ndi'an ô né,

²⁵ éyoñe te *ntuni a ye fombô nye. Nge mimvot mi ne abat été mi ntoo éfumulu, a abat e too fe édok a dañ ékôp, *zam nje ñhe le é kuiya e vôm a ne ndi'an: *ntuni a ye yôtane na môt ate a nji bo *mfuban: fôle *zam nje le.

²⁶ Ve nge *ntuni a yene na bifumulu mimvot bi nji bo abat été, nalé fe na abat ebien e nji bo édok a dañ ékôbe nyôl, a na abat e ntoo abôl, *ntuni a ye fete môt ate e *nda été tañe melu zamgbwal.

²⁷ E môse zamgbwale, *ntuni a ye fombô nye. Nge abat e maneya yian ékôp, *ntuni a ye yôtane na môt ate a nji bo *mfuban: fôle *zam nje le.

²⁸ Ve nge abat e tele vôme wua, nge e nji ke yian ékôbe nyôl, a nge e nji ke bo abôl, ndôle nduan nje le: *ntuni a ye yôtane na a ne *mfuban amu éfele nduan nje le.

²⁹ Nge fam nge minga a be'e fôl e nlô nge éyezel,

³⁰ *ntuni a ye fombô fôl éte. Nge é n'édok a dañ ékôbe nyôl, mimvot mi ne nyôle mfô a tyôtyoé mi too f'été, *ntuni a ye yôtane na môt ate a nji bo *mfuban: meko le, zame ya nlô nge éyezel nje le.

³¹ Nge *ntuni a yene na fôle meko é nji bo édok a dañ ékôbe nyôl, a na mimvot mi n'évindi mi nji bo été, a ye fete môt ate e *nda été tañe melu zamgbwal.

³² E môse zamgbwale, *ntuni a ye fombô fôl. Nge meko me nji ke mialan a nge mimvot mi ne nyôle mfô mi nji bo été, nalé fe teke édok a dañ ékôbe nyôl,

³³ môt ate a ye tyeñeban, ve te nambe e vôme meko me né, a *ntuni a ye fete nye e *nda été éyoñ éfe tañe melu zamgbwal.

³⁴ E môse zamgbwale ñwô ñhe *ntuni a ye fombô meko. Nge meko me nji ke yian ékôbe nyôl, a nge me nji bo édok a dañ ékôbe nyôl, *ntuni a ye yôtane na a ne *mfuban. A ye sôbe mengômesane mé a a ye bo *mfuban.

³⁵ Ve nge meko me nga su'ulane yian ékôb a koé be yôtaneya na a ne *mfuban,

³⁶ *ntuni a ye fombô nye, a nge meko me maneya yian ékôp, *ntuni a ye bo te beta jeñ nge mimvot mi ne nyôle mfô mi n'été: môt ate a nji bo *mfuban.

³⁷ Ve nge meko ma yené na me nji ke nen, a na mimvot mi ne bivindi mi too été, meko mete me yeteya, a môt ate a ntoo *mfuban, a *ntuni a ye yôtane na môt ate a ntoo *mfuban.

³⁸ Eyoñe fam nge minga a ne teme na bifumulu mebat bi ntoo nye nyôl,

³⁹ *ntuni a ye fombô nye. Nge ékôbe nyôle jé é bili mebat me too ôbe éfumulu, tone le é kuiya nye nyô: yeme na a ne *mfuban.

⁴⁰ Nge fam éziñ ja ye bo te fe ésil e nlô, môt ate a ne ayane nlôa môt, a ne *mfuban.

⁴¹ Nge éfase ya mvom asu nje é ne nye te k'ésil, a ne ayan asu môt.

⁴² Ve nge fôl é ne nye éfas ayane ya dol nge asu, fôl éte é too ôbe évele, yeme na zame le é vameya nye éfas ayane ya *doo nge asu.

⁴³ Ntuni a ye fombô nye. Nge fôl éte ja kui mvim é too ôbe évele éfas ayane ya dol nge asu, avale da fe ane zame ya ékôbe nyôl,

⁴⁴ môt ate a ntoo nzezam, a nji bo mfuban; fôl é ne nye e nlô.

⁴⁵ Nzezam wo kone fôl wo ye jaé mengômesan me too nyaban, nlô fe ô too nsoé; a ye fe solé éfas asu jé ya si a yôtane na: Te *mfuban! Te *mfuban!

⁴⁶ Nté ôse a ye kone fôl, a ye bo te *mfuban. A amu a nji bo *mfuban, a ye tabe étam, a étaba'a jé ja ye bo e minkan atan.

Miengele

⁴⁷ Eyoñe mebat me mieñgele ma yené e mengômesan me ne mboon a mevule me ntômba nge a ndombo,

⁴⁸ nge yené biyé nge besanglis be ne mboon a mevule me ntômba nge ndombo, nge yené e bikôb nge biôm bi ne mboon a ékôp,

⁴⁹ nge mebate mete me ne bebé ane nyôle mekaé bilé nge ôbe évele yeme na me ne mebat ba yiane liti *ntuni.

⁵⁰ Eyoñe *ntuni a maneya fombô jôm é bili mebat a ye fete je tañe melu zamgbwal.

⁵¹ E môse zamgbwale ñwô a ye beta fase mebate me mieñgele mete. Nge mieñgele a maneya yiane ngômesan ése a mevôm mese, nge yian ékôb nge jôm é nga boban a ékôp, yeme na mieñgele ate a ne nyô a se nguleya beta vas: jôme te é nji beta bo *mfuban.

⁵² Ntuni a ye di'i ngômesan, éyé nge sanglis a ne mboon a mevule me ntômba nge ndombo, nge jôm é ne mboon a ékôp. A amu mieñgele ate a se nguleya vas, ba yiane fo'o di'i jôme te e nduan.

⁵³ Ve nge *ntuni a yene na mieñgele a nji ke yiane ngômesan, éyé, sanglis, nge jôm é ne mboon a ékôp,

⁵⁴ a ye bendé na be sôbe jôm é nga bili mieñgele, éyoñe te a fete je éyoñe baa tañe melu zamgbwal.

⁵⁵ Ntuni a ye beta fombô mieñgele mvuse ya be maneya sôbe ngômesan: nge mieñgele a nji tyendé nge mialan, jôme te é nji fe bo *mfuban, ba ye di'i je e nduan, to'o na mieñgele a nga bi je été nge atan.

⁵⁶ Ve nge *ntuni a yene na mieñgele a ntoo abôl éyoñ be maneya tu'u nye, éyoñe te a vaa afôla ngômesan, ékôp, éyé nge sanglis e nga bili mieñgele.

⁵⁷ Eyoñe ayab éyoñ e lôteya, nge abate mieñgele da beta yené e ngômesan, éyé, sanglis nge jôm é ne mboon a ékôp, yeme na mfefé mieñgele le wo kui. Jôm é bili abat ja yiane di'iban éyoñe te.

⁵⁸ Eyoñe be maneya sôbe jôm é nga bili mieñgele: ngômesan, éyé, sañglis nge jôm é ne mboon a ékôp, a abate mieñgele te da kôlô, ba yiane beta sôbe sôbe jôme te éyoñe baa, nalé ja ye bo *mfuban.

⁵⁹ Miñye'elan mia fombô mebate me mieñgele ma yené e mengômesane mevule me ntômba nge ndombo, e biyé, besanglis nge biôm bi ne mboon a ékôp mmie le. Miñye'elane mite mia volô *ntuni a yôtane na jôm é biliya é ne *mfuban nge momo.