LEVITIK 12 - Kalate Zambe Nnomo a Mfefe Mfefé Nkôñelan

Atiñe da fombô minga a ndôme biaé

¹ Nti a nga kobô Môze na:

² Kobô'ô bone b'Israél a jô be na: Éyoñe minga a ye bo abum a biaé monafam, a ye bo te *mfuban tañe melu zamgbwal; a ye bo te *mfuban avale fe ane melu ya a yene ngon.

³ E môse muame, mon a ye tyi'iban atyel.

⁴ A ye beta tabe melu mewôm melaa a melaa, mfa'a ya fubu émien amu metyi mé; a ye bo te nambe jôm é ne ntelan étyi, nge ke vôm y'étyi akekui mimôse ya ntunane wé mi ntoo njalan.

⁵ Nge a biaé monaminga, a ye tabe te *mfuban tañe sondô ébaé, avale fe ane melu a yene ngon; A ye tun émien amu metyi mé tañe melu mewôme zamgbwal.

⁶ Eyoñe melu ya ntunane wé me maneya, to'o a nga biaé monafam nge monaminga, a ye zu ve Ntuni étoñe ntômba é ne mbu wua anyiine *nda éndelé bendôba'an, asu mvean wo di'ibane ngumba; nalé fe zum nge ôdu asu mveane ya *njaman abé.

⁷ Ntuni a ye liti bie asu Nti a bo mame ya *njaman abé asu dé, nalé a ye tuneban amu metyi me nga kui nye atan. Atiñe minga a biaé monafam nge monaminga nde le.

⁸ Nge jôme ya kus étoñe ntômba é ne momo e mo mé, a ye nyoñ adu abaé, nge zum ébaé, jia asu mimvean mia di'ibane ngumba, nyô fok asu mveane ya *njaman abé. Ntuni a ye bo mame ya *njaman asu dé, a a ye bo *mfuban.