LEVITIK 11 - Kalate Zambe Nnomo a Mfefe Mfefé Nkôñelan

Atiñ ya betit be ne * mfuban a ba be ne te mfuban

¹ Nti a nga kobô Môze ba Arone na:

² Kobô'ô bone b'Israél a jô be na: E betite bese ya si, bana mbe mia ye di.

³ Mia ye di tit ése é bili ébo'os é too nsalan, mbiaé fe ô too nsalan a a bo'otô'ô nyalak.

⁴ Ve bana mbe mia ye bo te di akôsa bo na ba bo'otô nyalak nge na be bili ébo'os é too nsalan: kamel, amu a bo'otô nyalak ve ébo'os te nsalan: mia ye yene je ane tit é ne te mfuban;

⁵ nyôk é too *mekok, amu ja bo'otô nyalak ve ébo'os te nsalan: mia ye yene je ane tit é ne te mfuban;

⁶ Liévre, amu a bo'otô nyalak ve ébo'os te nsalan: mia ye yene nye ane tit é ne te mfuban;

⁷ ngôé, amu é bili ébo'os é too nsalan nalé fe mbiaé, ve te bo'otô nyalak: mia ye yene je ane tit é ne te *mfuban.

⁸ Mia ye bo te di minsône miap: mia ye yene be ane betit be ne te *mfuban.

⁹ Betite bese ba nyiñe mendim, bana mbe mia ye di: Ba bese be bili mengap a bibas be too e mendim, to'o mañ nge bone b'asôé.

¹⁰ Ve ayôme betit ése é too mendim a jôm ése ja nyiñ e mendim, to'o mañ nge bone b'asôé, ba bese be nji bi mengap nge bibas, ba ye bo mbia be biôm mfa'a wônan.

¹¹ Ba ye bo mbia be biôm mfa'a wônan, mia ye bo te di minsône miap a mia ye yene mimbime miab ane mbia be biôm.

¹² Betite bese be ne e mendim te mengap nge bibas, ba ye bo mbia jôm mfa'a wônan.

¹³ Mfa'a ya anon, dina nde mia ye yen ane mbia jôm, a mia ye bo te di de: jun, ébandôé a ndôé mañ;

¹⁴ ze yôp a fufu ôbam a di da funane nye;

¹⁵ éngbwañ a anon ese da funane nye;

¹⁶ a éngutu, a mvômvôt, a élolé mañ a ôbam avale dé;

¹⁷ a nyôk, nsoñemeto'o a nduk;

¹⁸ akuñ e be'e bitombo, ngôkoé a ntememvoé;

¹⁹ Bingobingo, Sôsolôsôé a ônon ôse ô ne ane je, hupe a Ôngem.

²⁰ Mone tit ase a be'e mefab a wulu'u a mebo menyin, a ye bo mbia jôm mfa'a wônan.

²¹ Ve bone betit bese be be'e mefap be wulu'u a mebo menyin, mia ye di e ba be be'e mevale mebo mebaé: ma ba wulu me a ma ma volô be na be yôô.

²² Bana mbe mia ye di: Étandak, mba'asan, mbu a aselek, jôm ése y'été é too avale dé.

²³ Bone betite bevo'o bese be be'e mefab a mebo menyin, ba ye bo mbia jôm mfa'a wônan.

²⁴ Be ne bo mia na mi yené te *mfuban, a môt ase a ye nambe mimbime miap, a ye bo te *mfuban a kui mamengô'é,

²⁵ a môt ase a ye be'e mimbime miap a ye sôbe mengômesane mé a tabe fe te *mfuban a kui mamengô'é.

²⁶ Tit ése ébo'os é ne nsalan ve mbiaé ô too te nsalan, nalé fe te bo'otô nyalak, mia ye yene je ane nyô é ne te *mfuban.

²⁷ Betite mekule bese, mia ye yene be ane te *mfuban: môt ase a ye nambe mimbime miap a ye bo te *mfuban a kui mamengô'é,

²⁸ a môt ase a ye be'e mimbime miap a ye sôbe mengômesane mé a tabe te *mfuban a kui mamengô'é. Mia ye yene be ane betit be ne te *mfuban.

²⁹ Bone betit ba woñe si bana mbe mia ye yen ane te *mfuban: kpwañesan, fôô a nsoo, jôm ése y'été avale dé;

³⁰ afaé, nka'a, kuu, ôngôtô a jôngô ô.

³¹ Mia ye yene be ane te *mfuban e bone betite bese été: môt ase a ye nambe be, éyoñ be wuya, a ye bo te *mfuban a kui mamengô'é.

³² Jôm ése jôme ya mimbime miab ja ye nambe ja ye bo te *mfuban: ékanda, ngômesan, ékôbe tit, nkuta, élaba'a ése ba belane je: ba ye futi jôme te mendim é tabe fe te *mfuban a kui mamengô'é, ja ye bo *mfuban éyoñe ngô'é é lôteya.

³³ Jôm ése ba ye koone je élaba'a é ne mboon a tyia été a jôm éziñe ya mimbime betite mite é too été, ja ye bo te *mfuban, a mia ye bôé élaba'a te.

³⁴ Adi ese ba di, mendim ya élaba'a te me too nsôan été ma ye bo te mfuban; jôm ése ba nyu avale élaba'a te ese ja ye bo te *mfuban.

³⁵ Jôm ése ngabe ya mbime wob ja ye ku yôp ja ye bo te mfuban; ja'ane mbum nge ntaka'a ya di, ba ye tyame bie. Bi ne te *mfuban, a mia ye yene bie ane te *mfuban.

³⁶ Ve jame da na anjeñ a ébé bi ne mboon mfa'a ya ba'ale mendim bia ye bo mfuban; ve nyô a ye nambe mbime wop a ye bo te *mfuban.

³⁷ Nge jôm éziñe ya mbime wob ja ku e mvoñ ja yiane béébane yôp, mvoñ éte é ngenane mfuban;

³⁸ ve nge be nga jini mvoñ éte mendim, a jôm éziñe ya mbime wop é kpwelé je yôp, mia ye yene mvoñ éte ane te *mfuban.

³⁹ Nge tite jia ya betite mia di ja wu, môt a ye nambe mbim a ye bo te *mfuban a kui mamengô'é;

⁴⁰ môt a ye di avale mbime te a ye sôbe mengômesane mé a tabe te *mfuban a kui mamengô'é.

⁴¹ E mone tit ase a woñe si a ye bo mbia jôm: ba ye bo te di nye.

⁴² Mia ye bo te di to'o ve wua ya bone betit ba woñe si, nge ba ba vutan a mebum, nge ba ba wulu a mebo menyin nge a abui mebo, amu be ne mbia jôm.

⁴³ Te boone miabebiene mbia jôm amu bone betite bete bese ba woñ; a te boone miabebien te *mfuban a be, nge ve miabebiene mvin a be.

⁴⁴ Amu me ne Nti, e Zambe wônan: mia ye telé miabebien étyi, a naa mia ye bo étyi amu me n'étyi; a mia ye bo te bo miabebiene mvin a bone betite bete bese ba woñe si.

⁴⁵ Amu me ne Nti a nga soo mia e si y'Ejipte na me bo e Zambe wônan, a mia ye bo étyi, amu me n'étyi.

⁴⁶ Atiñe da fombô betit, anon, bevevee be biôme bese ba fô'ôsan e mendim a biôme bi vee bi woñe si, nde le,

⁴⁷ mfa'a ya kandé jôm é ne te *mfuban a jôm é ne *mfuban, tite ba di a nyô be ne te di.