LEVITIK 10 - Kalate Zambe Nnomo a Mfefe Mfefé Nkôñelan

Nduane Nti a bone b'Aron bebaé

¹ Bone b'Aron môé na Nadab a Abihu, be nga nyoñ, môt ase, Esua da'a, nde be nga bo'é nduan a futi ôlobinda été yôp; be nga zuu avale nduan afe asu Nti, a mboone te ô sela'ane wu Nti a nga bendé.

² Ajô te nduan é nga so ôsu be Nti a mane di'i be: nde be nga wu asu Nti.

³ Ane Môze a nga jô Arone na: Nde te ma ye teléban étyi e be ba ba subu ma bebé, a ma ye wum e vôm ayoñe bôt ese é né, nalé Nti a jô. Aron a nga tabe évôl.

⁴ Môze a nga loone Mikaél a Eltsafan mona Uziél ndômenyañe Aron a jô be na: Za'an mi be'e be a kee be ôyab a vôm y'étyi.

⁵ Nde be nga zu be'e be e biwomane biab'été, a kee be e minkan atan, avale Môze a nga jô.

⁶ Môze a nga jô Aron, Eléazar a Itamar mon Arone na: Te mia vaa mintôme nlô, nalé fe te nyabane mengômesane menan, éyoñe te mia ye bo te wu éyoñe mia dutu ayaa Zambe e b'ékôane bôt ése. Bobenyoñe ya *nda bôt Israél ése ba ye yôn amu bôte Nti a maneya wôé a nduan.

⁷ Mia ye bo te kôlô anyiine *nda éndelé bendôba'ane, mi za mane wu: amu mi ne ba be ne ñwo'one mbone Nti: be nga bo ane Môze a nga jô.

⁸ Ane Nti a nga kobô Arone na:

⁹ Wo ye bo te nyu woon nge ényunyui é ne ngul abui, wo a bone bôé, éyoñe mia nyiine *nda éndelé bendôba'an, éyoñe te mia ye bo te wu. Da ye bo mvinda ya biyoñ bise e miaé mienan mise.

¹⁰ Nalé mia ye bo nguleya kandé jôm é n'étyi a ji é nji bo étyi, jôm é nji bo *mfuban a ji é ne mfuban;

¹¹ A Ye'ele bone b'Israél memvinda mese Nti a nga ve be e be Môze.

¹² Ane Môze a nga jô Aron a *mebuka'a me bone bé, Eléazar a Itamare na: Nyoñane *mebuka'a ya mimvean mia di'ibane nduan asu Nti, a di me mfôm ata'a metuna'a, jôm ja vusu momo été: amu é ne jôm é n'étua étyi.

¹³ Mia ye di me e vôme wob a n'étyi; jame di e ne mvinda mfa'a wôé a bone bôé, ajô mimvean mia di'ibane nduan asu Nti: amu jame Nti a nga bendé ma nde le.

¹⁴ Mia ye fe di e vôm a ne *mfuban: wo, bobefame bôé a bobebinga bôé. Mia ye di ôngône be nga ve a énam be nga vaa: amu bi ne mia mvean, bi too fe mvinda asu dôé a bone bôé, e mimveane ya nlatane ngbwa bone b'Israél.

¹⁵ Bone b'Israél ba yiane zuu énam a ôngôn, bi bete mengab me n'avoñ ba di'i ata'a metuna'a yôp. Eyoñe be maneya bo mame ya liti biôme bite asu Nti, mengabe mete ma ye bo asu denan amu me ne émenan biyoñ bise, avale Nti a nga bendé.

¹⁶ Môze a nga jeñe nnôm ékela a ne mveban asu *njaman abé; a koé na be maneya di'i nye. Eyoñe te a nga yaa Eléazar a Itamar, bone b'Aron be nga li'i a jô be na:

¹⁷ Amu jé mi nga bo te di étyi'a ya *njaman abé e vôm a n'étyi? Amu é ne jôm é n'étua étyi, a Nti Nye a nga ve mia je, nalé mia ye be'e ékobe ya ngum nsamba bôt, éyoñe te mia ye bo jame ya *njaman abé asu Nti.

¹⁸ Mi lôô fe na be nji ke kee metyi mé e vôme y'étyi été: mi nga yiane di je e vôm y'étyi été, avale Nti a nga bendé ma.

¹⁹ Aron a nga jô Môze na: Ke ô lôô na den nye ba te ve mimveane miab asu *njaman abé a mimveane miab mia di'ibane ngumba asu Nti; nalé fe na e mvuse ya jam da te kui be ma, nge me nga ye di étyi'a ya *njaman abé den, ye jame te e nga ye yené mvaé e mise me Nti'

²⁰ Môze a nga wôk a kañese mejô mete.