LEVITIK 1 - Kalate Zambe Nnomo a Mfefe Mfefé Nkôñelan

Etyi'a ba di'i ngumba

¹ Ane Nti a nga loone Môze a kobô nye, *tyiñ é so'o e *nda éndelé bendôba'an na:

² Kobô'ô bone b'Israél a jô be na: Éyoñe môte wua ya be mia a kômbô ve Nti mvean éziñ, a ye ve wô ô so'o mbame benyak nge mbame mintômba a bikela été.

³ Nge mveane wé ô ne étyi'a ja di'ibane ngumba ô so'o mbame benyak, a ye ve nnôm a ne *mvo'é ne selem; a ye ve nye anyiine *nda éndelé bendôba'an, nalé étyi'a te ja ye nyoñebane be Nti.

⁴ Môt ate a ye beté wo wé e nlô étyi'a Nti a maneya kañese asu *njaman abé dé.

⁵ A ye tyi'i étoñe nya'a *tyiñ asu Nti; betuni, bone b'Aron, ba ye ve metyi a miame me mbôma'an a ata'a metuna'a e ne anyiine *nda éndelé bendôba'an.

⁶ A ye soé étyi'a ja di'ibane ngumba ékôp a ba je mefuse mefus.

⁷ Bone b'Aron Ntuni ba ye futi nduan ata'a metuna'a a wua nja'a e nduan été.

⁸ Betuni, bone b'Aron, ba ye bôé mefus, nlô a avoñ e nja'a é ne mfutane nduan ya ata'a metuna'a yôp.

⁹ Ba ye sôbe *miñya a mimbiaé mi tit, a wua ya betuni a ye di'i biôm bite bise ata'a metuna'a yôp: étyi'a ja di'ibane ngumba e nduan nje le é too fe mbamba menyum e be Nti.

¹⁰ Nge mvean ô n'étyi'a ja di'ibane ngumba wo so e mone mbame biyem, mintômba nge bikela, a ye ve nnôm a ne *mvo'é ne selem,

¹¹ a ye tyi'i nye *tyiñ asu Nti ata'a metuna'a akôé, a betuni, bone b? Aron, ba ye miame metyi mé mbôma'an a ata'a metuna'a.

¹² Ntuni a ye ba nye mefus, nlô a avoñ bi too f'été; éyoñe te a bôé biôme bite e nja'a a nduan ya ata'a metuna'a yôp.

¹³ Miñya a mimbiaé bia ye sôban a mendim. Eyoñe te *ntuni a ye ve biôme bite bise a di'i bie ata'a metuna'a yôp. Etyi'a ja di'ibane nduan ngumba nje le é too mbamba menyum e be Nti.

¹⁴ Nge mveane wé a ve Nti ô ne étyi'a ja di'ibane ngumba ô so'o anon, a ye ve adu nge bezum.

¹⁵ Ntuni a ye ve ônon ata'a metuna'a yôp. A ye bok a té wô *tyiñ a jaé, a di'i wô ata'a metuna'a yôb a miate metyi y'été mbôma'ane ata'a metuna'a.

¹⁶ A ye vaa ngok a mesaé a wua ônon ôbien bebé ata'a metuna'a mfa'a jôb da tôô e vôm ba kut asup.

¹⁷ A ye nyabe vie mfa'a ya mefab ve teke té me, éyoñe te *ntuni a ye di'i ônon ata'a metuna'a yôp, e nja'a é ne nduane yôp. Etyi'a ja di'ibane ngumba e nduan nje le é too mbamba menyum e be Nti.