KÔLÔS 4 - Kalate Zambe Nnomo a Mfefe Mfefé Nkôñelan

¹ A bemasa, bela'ane belo benan e *zôsôô été, a bo be e mam ma yian, mi yeme na mia fe mi bili Masa e yôb été.

Mebendé a mebatan

² Bo'one mbane meye'elan. Bômba'an évevé ajô te a mvean akéva.

³ Ye'elane fe ajô dangan na Zambe a yoé bia *mbé ya nkobô asu ya kañete ndimba jame Krist, nje fe me nga ka'abane je ngata'a,

⁴ me kañete je ane ma kômbô.

⁵ Taba'an ane da yian e mise me bôt be nji bo bekristen. Bela'an mbamba éyoñ ate.

⁶ Mejô menan me bo éyoñ ése ma me *mvam, ntyitan a nku, asu ya yeme yalane môt ase ane da yian.

Mejô ma su'ulan

⁷ Mfa'a ya ényiñe jame mamien, mia ye bi mefoé mese ya été a Tisik, e mojañ ma nye'e, mbamba mbo ésaé, a ébe mbo ésaé e be Nti.

⁸ Ma lôme mia nye, fo'o ve amu na a kate mia mefoé mangan a ve mia ngule minlem.

⁹ Onézime, mbamba a étua édima mojañ, baa nye ba zu. Ane wua ya be mia. Ba ye kate mia mam mese ma lôte va.

¹⁰ Aristark, bia nye bi ne mimbôk a batane mia, nalé fe Mark, mone monyañe Barnabas. Mi nga nyoñe mefoé ajô dé. Nge a zuli be mia, mi nyoñe nye *mvo'é.

¹¹ Avale te fe Yésus nyô ba loone na Justus a batane mia. Mbe étam, e Beyude été, bia be be bi nga bo ésaé asu éjôé Zambe. Be nga volô ma *nlem.

¹² Epafra, a ne fe wua ya be mia, a batane mia; mbo ésaé Yésus Krist ate, a nji jô'é wosan ajô denan a zene ya meye'elan na, mi tebe ne sim, nya *mvo'é asu ya ve nkômbane Zambe mewôk.

¹³ Me ne ngaa wé na, a nyoñe nju'u abui ajô denan, ajô ba ya Laôdisé a ba ya Hiérapôlis.

¹⁴ Lukas, mvôé jangan, *dokita, a batane mia a Démase fe.

¹⁵ Mi bata'ane ma bobejañe ya Laôdisé a Nimfa, a keké é wô'ô sulane *nda jé.

¹⁶ Eyoñe mi lañeya kalate wom, mi bo'o na be lañe fe nye e keké ya Laôdisé. Lañan, mfa'a wônan, e nyô a ye so Laôdisé.

¹⁷ Wôna, katane Arkip na: Ba'ale'e ésaé ô nga nyoñe be Nti, a jeñe zene ya tu'a bo je.

¹⁸ Mebatane ya wo wom, ma Paul, e mme ma: mi simesa'an bengôkobe bam. Mvam é tabe'e be mia!