KÔLÔS 3 - Kalate Zambe Nnomo a Mfefe Mfefé Nkôñelan

Mfefé ényiñ e be Krist

¹ Nge mia be Krist mi nga wômô ñhe, jeñane mame ya yôp, e vôme Krist a too e mbo nnôme Zambe.

² Bômba'an évevé asu mame ya yôp, saa ñhe ma ya si.

³ Mi ne fo'o ñwuan, a ényiñe jenan é solô a Krist e be Zambe.

⁴ Eyoñe Krist, ényiñe jenan, a ye yené, wôna mia fe mia ye yené njalan a étôtok mia be nye.

⁵ Ajô te wôéane mame ya *si nyô me ne be mia: ébamba, mvin, ntulane mam ôkup, mbia minkômban a ôzañ akum ôte, ñwô ô ne nkañane bengunemelan.

⁶ E mam ma dutu ayaa Zambe e be bone ba bene njôan mme le.

⁷ Melu mvus mi nga wulu e mam mete été, éyoñe mi mbe mi nyiñik me été.

⁸ Eyoñe ji, mia fe va'ane ñhe mam mete mese be mia: ayaa, ñwô'an ôlun, évô, meta, mbia *minkobô mia kui e menyu menan.

⁹ Minsos mi bo'o te yené ézezañe jenan. Amu mi vaaya nnôme môt a mimboone mié,

¹⁰ a mi jaéya mfefé môt, nye ate, asu ya bi ñyeman, a ne te jô'é mboone mfefé éfunane a nté wé.

¹¹ Vôm ate, mone Grék a nji bo nge mone Beyude, ntyi'an atyel, ndimi mam nge ñyeme mam, *ôlo nge *nti, ve Krist a ne mam mese e be bôte bese.

¹² Amu mi ne mintobane mi Zambe a nga nye'e a telé étyi, jaane ñhe minleme mia wô'ô bôt éngôngo, *mvam, nsuubane si, nje'eban a njiban.

¹³ Mi jiba'an, bana a ba bevok; a nge môt éziñ a bili nyô mbo'o ajô, mi jama'ane mia mia; avale Nti a nga jamé mia, mia fe bo'one nalé.

¹⁴ E mam mete mese yôp, jaane nye'an: élat ja dañe mvaé nje le.

¹⁵ E *mvo'é Krist é jô'ô minleme mienan nje éte mia bese mi nga loban na mi bo nyôle jia. Nyiñan e mvean akéva été.

¹⁶ Ajô Krist e tabe'e be mia afo'o dé ese été. Mi yéka'an a mi leba'an, bana a ba bevok, njalan a fek. Yi'ane Zambe mvean akéva wônan, e minleme mienan été, a besam, a bia Nsisim wo ve ngule ya yia.

¹⁷ E jam ese mi ne jô nge bo, bo'one de a jôé Nti Yésus, a ve Zambe akéva amu nye.

Nda bôte bekristen

¹⁸ A beyal, su'ane mia bebiene si e be beyôme benan, aval ane da yian e be Nti.

¹⁹ A beyôm nyeka'ane benyo beyal, a te mia wô'ô be ôlun.

²⁰ A *bon, va'ane bebiaé benane mewôk mfa'a ya mam mese. E jame Nti a yene mvaé e nde le.

²¹ A bebiaé, te boone na benyo *bon be wô'ôlun be za bili ate'e minlem.

²² A belo, wô'ane bemasa benane ya *si nyô mfa'a ya mam mese. Bo'one be bisaé, saa ke amu na ba fombô ane mia saé, aval ane nge mia kômbô yené mvaé e be bôt, ve amu nje'ebane minleme ya ba ba ko Nti woñ.

²³ Aval ésaé ese mia bo, bo'one je ane nge mia bo je Nti, saa bôt.

²⁴ Mi yeme na mia ye nyoñe ngabe be Nti ane ma'ane menan. Masa a ne Krist. Mia bo nye bisaé.

²⁵ E nyô a yené ékotekot, a ye nyoñe ma'ane ya ékotekote jé, a teke ôbangam éziñ ô ne be nye.