KALATE METATAʼA 5 - Kalate Zambe Nnomo a Mfefe Mfefé Nkôñelan

Mvoñe bôt Adam Ataté Adam a kui Noé

¹ Kalate mvoñe bôt Adam e nye nyô: E môse Zambe a nga té Adam, a nga bo nye a funa'ane Zambe.

² Fam a minga a nga té be, a nga botane be a loone be na Môt, éyoñe be nga téban.

³ Adam a too mimbu 130, a nga biaé monafam a funa'ane nye, aval éyeka'a jé é né, a a nga yôlé nye jôé na Sét.

⁴ Mimôs mi Adam, mvus abialé Sét, mi mbe mimbu 800; a a nga biaé bobefam a bobebinga.

⁵ E nté ôse y'ényiñe jé ô mbe mimbu 930; wôna a nga wu.

⁶ Sét a nga biaé Enos a too mimbu 105.

⁷ E mvus abialé Enos, Sét a nga nyiñe mimbu 807, a a nga biaé bobefam a bobebinga.

⁸ E nté ôse y'ényiñe jé ô mbe mimbu 912; wôna a nga wu.

⁹ Enos a nga biaé Kénan a too mimbu 70.

¹⁰ E mvus abialé Kénan, Enos a nga nyiñe mimbu 815, a a nga biaé bobefam a bobebinga.

¹¹ E nté ôse y'ényiñe jé ô mbe mimbu 905; wôna a nga wu.

¹² Kénan a nga biaé Mahalalél a too mimbu 70.

¹³ E mvus abialé Mahalalél, Kénan a nga nyiñe mimbu 840, a a nga biaé bobefam a bobebinga.

¹⁴ E nté ôse y'ényiñe jé ô mbe mimbu 910, wôna a nga wu.

¹⁵ Mahalalél a nga biaé Yéréd a too mimbu 65.

¹⁶ E mvus abialé Yéréd, Mahalalél a nga nyiñe mimbu 830 a a nga biaé bobefam a bobebinga.

¹⁷ E nté ôse y'ényiñe jé ô mbe mimbu 895, wôna a nga wu.

¹⁸ Yéréd a nga biaé Hénok a too mimbu 162.

¹⁹ E mvus abialé Hénok, Yéréd a nga nyiñe mimbu 800, a a nga biaé bobefam a bobebinga.

²⁰ E nté ôse y'ényiñe jé ô mbe mimbu 962, wôna a nga wu.

²¹ Hénok a nga biaé Matusalem a too mimbu 65.

²² E mvus abialé Matusalem, Hénok a nga wulu baa Zambe mimbu 300, a a nga biaé bobefam a bobebinga.

²³ E nté ôse y'ényiñe jé ô mbe mimbu 365.

²⁴ Hénok a nga wulu baa Zambe, wôna a nga jeñeban amu Zambe a nga vaa nye.

²⁵ Matusalem a nga biaé Lemék a too mimbu 187.

²⁶ E mvus abialé Lemék, Matusalem a nga nyiñe mimbu 782, a a nga biaé bobefam a bobebinga.

²⁷ E nté ôse y'ényiñe jé ô mbe mimbu 969, wôna a nga wu.

²⁸ Lemék a nga biaé monafam a too mimbu 182.

²⁹ A nga yôlé nye na Noé, a jô'ô na: Nyôna a ye volô bia minlem e mfa'a ngule bisaé bi mo bia ju'u bie e si Nti a nga yo'é nyô.

³⁰ Lemék a nga nyiñe mimbu 595 mvus abialé Noé, a a nga biaé bobefam a bobebinga.

³¹ E nté ôse y'ényiñe jé ô mbe mimbu 777, wôna a nga wu.

³² Noé a nga biaé Sem, Kam a Yafet a too mimbu 500.