KALATE METATAʼA 4 - Kalate Zambe Nnomo a Mfefe Mfefé Nkôñelan

Kan baa Abél

¹ Fam é nga jô'ôbô Eve e minga wé; a nga nyoñ abum a biaé Kan. A nga jô na: Me biaya fam a e mvolane Nti.

² A nga beta biaé Abél monyañ. Abél a nga bo mba'ale mbame bone biyem, kane ki mbéé mefup.

³ E mvuse nté éziñ, Kan a nga zuu bibuma ya si ane mvean e be Nti.

⁴ Abél, nye fe, a nga zuu mintôle ya mbame bone biyeme wé a avoñe dap. Nti a nga yen Abél a e mveane wé mvaé;

⁵ v'a nji yene Kan a mveane wé mvaé. Kan a nga dañe wô'ô ôlun a asu dé e nga biban.

⁶ Nti a nga jô Kane na: Wo wô'ô ôlun amu jé? A asu dôé e ne mbiban amu jé'

⁷ Nge wo bo mvaé, wo ye beta telé nlô wôé tetele, ve nge ô nji bo mvaé, *abé e ne ñyametan e *mbé wôé, a minkômbane mié mia lumbu be wo; ve wo jô'ô de.

⁸ Ve da Kan a nga kobô monyañ Abél a e mbôlô be mbe mefup, Kan a nga tebe monyañe ngame yat a wôé nye.

Kan baa Zambe

⁹ Nti a nga jô Kane na: Monyoñ Abél a ne vé? Nye na: Me nji yem; ye ma me ne mba'ale mojañ'

¹⁰ E nde Zambe a jô na: Jé wo te bo? Tyiñe metyi me monyoñ ja yôn ataté si été a kui be ma.

¹¹ Eyoñe ji, wo ye yo'oban ôyap, a si ja te yooé anyu dé a nyoñe metyi me monyoñ e wo wôé été.

¹² Eyoñe wo ye bé bidi si, ja ye bo te beta ve wo mefo'o mé. Wo ye bo nyô a ndeñendeñ ô nyeñemba'an e si nyôna été.

¹³ Kan a nga jô Nti na: Adite ya ékobe jam é dañeya ngule ya jibi.

¹⁴ Wo titane ma den ôyap a si ba senan; ma ye yiane sobô ôyap a asu dôé, ma ye bo nyô a ndeñendeñ *a ko woñ e *si nyô, a nge môt éziñ a koone ma, a ye wôé ma.

¹⁵ Nti a nga jô nye na: Nge môt éziñ a wôé Kan, ba ye kune nye biyoñe zamgbwa. A e Nti a nga futi ndem e be Kan ndembene bôte ba ye koone nye ba ye bo te wôé nye.

¹⁶ Wôna Kan a nga kôlô vôme Nti a né a ke tabe e sii Nôd, e mfa'a jôbe da tôô Eden.

Mvoñe bôte Kan

¹⁷ Kan a nga yeme ngal; nye ve bo abum a biaé Enok. Wôna a nga lôñe tison a yôlé je jôé monafame wé Enok.

¹⁸ Enok a nga biaé Irad, Irad a nga biaé Mewuyaél, Mewuyaél a nga biaé Metusaél, Metusaél a nga biaé Lemék.

¹⁹ Lemék a nga lu'u binga bebaé, wua jôé na Ada, nyô baa na Sila.

²⁰ Ada a nga biaé Yabal; e nye a ne émvame beba'ale biyem be ne te tabe ngume vôm.

²¹ Monyañ a mbe jôé na Yubal; e nye a ne émvame ba bese ba bôme ntyam ateba a mfañ.

²² E mfa'a Sila, a nga biaé Tubal-Kan, nyô a mbe a luik bivôl bise bi ne mvot a étyé. Kale Tubal-Kan é mbe Nama.

²³ Lemék a nga jô beyale na: Ada baa Sila, vô'ôla'ane tyiñe jam! Binga be Lemék, ke'an alo e nkobô wom! Me nga wôé môt asu aveñe dam a mon asu mimba'a miam.

²⁴ Ba ye kune Kan biyoñe zamgbwa, a Lemék biyoñe mewôme zamgbwa a zamgbwa.

²⁵ Adam a nga beta jô'ôbô nga; a nga biaé monafam a yôlé nye jôé na: Sét; amu ngal a nga jô na: Zambe a beteya ve ma mvoñe bôte fe éjiane Abél e nye Kan a nga wôé.

²⁶ Sét fe a nga biaé monafam jôé na Enos. Eyoñe te ñhe be nga taté na ba loone jôé Nti.