KALATE METATAʼA 3 - Kalate Zambe Nnomo a Mfefe Mfefé Nkôñelan

¹ E betite bese ya fé Nti, nyô a ne Zambe, a nga té, nyo nje é nga dañe mefek. E nga jô minga na: Ye Zambe a nga tu'a fo'o jô na: Mia ye bo te di biôme bia so e bilé bise ya afup'

² Minga a nga jô nyoo na: Bia di ngab ébuma bilé ya afup.

³ Ve mfa'a ébuma ya élé é ne ézezañ afup, Zambe a nga jô na: Mia ye bo te di je, a mia ye bo te nnambe je, nalé momo mia ye wu.

⁴ Ane nyo é nga jô minga na: Teke fo'o bebé na mia ye wu!

⁵ Ve Zambe a yeme na: E môse mia ye di je, mise menan ma ye kuiban, a na mia ye bo ane bezambe ba yeme mvaé a *abé.

⁶ Minga a nga yene na élé é mbe mvaé ya di, abeñe ya yen é yi'ane fe ve mfasan. A nga nyoñ ébuma y'été a di je; a nga ve fe je nnôme wé baa nye be mbe, a a nga di je.

Ayaa Zambe

⁷ Ane mise me be bebaé me nga kuiban; be nga yeme na be mbe soé. Be nga loé bebiene menja'a a mekaé me figié.

⁸ Wôna be nga wô'ô tyiñe Nti, nyô a ne Zambe, e nye a mbe a kelek a wulu afup e mone mfebe ya mamengô'é. Fam a e minga wé be nga ke sobô asu Nti, nyô a ne Zambe, ézezañe bilé y'afup.

⁹ Nti, nyô a ne Zambe, a nga loone fam a jô nye na: Ô ne vé'

¹⁰ Nye na: Ma te wô'ô tyiñe jôé afub été a ma te ko woñ, amu me ne soé, e nde ñhe ma te sobô.

¹¹ Nti, e nyô a ne Zambe, a nga jô na: Za a te kate wo na ô ne soé? Ye ô diya jôm éziñe ya élé me nga kamane wo na ô bo te di'

¹² Fam é nga yalane na: Ke minga ô nga tooé e fefele jam e nye a te ve ma jôme ya élé ane ma ke ma te je di.

¹³ Wôna Nti, nyô a ne Zambe, a nga jô minga na: Amu jé wo te bo jame te? Minga a nga yalane na: Nyo ja te du'u ma, ane ma ke ma te je di.

¹⁴ E nde Nti, nyô a ne Zambe, a nga jô nyo na: Amu wo te bo jame te, wo ye yo'oban e biyeme bise été a betite bese ya fé été. Wo ye woñ a abume dôé a wo ye di mbuluk melu mese y'ényiñe jôé.

¹⁵ Ma ye futi ziñ e zañe jôé a minga, e zañe mvoñe jôé a e mvoñe jé: Enjéé ja ye fite wo nlô a wo wo ye lôbe nye étimekili.

¹⁶ A nga jô minga na: Ma ye bo mebume môé njuk, wo ye biaé e nju'u été minkômbane miôé mia ye timbi e be nnôme wôé. Ve nye a ye jôô wo.

¹⁷ A nga jô fame na: Amu wo te bo tyiñe nyô ngale mewôk a na wo te di jôme y'élé me nga kamane wo na te di, si ja ye yo'oban amu wo wo ye soo bidi biôé été e nju'u été, melu mese y'ényiñe jôé.

¹⁸ Si éte ja ye kui wo biyo a fafôlô a wo ye di bilo'o ya fé.

¹⁹ Wo ye di bidi a édudu'u ya asu dôé akekui wo bulane si e vôm ô nga nyoñeban; amu ô ne mbuluk, a wo ye bulane mbuluk.

²⁰ Fam é nga yôlé minga wé na Eve; amu a mbe nyia bevevee bese.

²¹ Nti, nyô a ne Zambe, a nga bo Adam baa minga wé mengômesan m'ékôp, e mme a nga jalé be.

²² Nti, nyô a ne Zambe, a nga jô na: Eyoñe ji, ane môt a ntoo ane wua ya be bia, asu ñyemane mvaé a *abé, nsa'ala'ane na a same wo wé na a nyoñe fe jôme ya élé ényiñ, a di je a nyiñ nnôm éto.

²³ Nti, nyô a ne Zambe, a nga titane nye afub Eden na a bo ésaé si, e vôm a nga nyoñeban.

²⁴ Eyoñ a maneya titane môt, a nga tooé Bekerubim mfa'a jôbe da tôô afub Eden nalé fe nkaba'a nduane nkpwaté mekôn wo tyiñelan, asu ya ba'ale *zen élé ényiñ.