KALATE METATAʼA 2 - Kalate Zambe Nnomo a Mfefe Mfefé Nkôñelan

Môse zamgbwale wo teléban étyi

¹ Avale te e nde yôp a si a minsamba bitétéa miabe mise bi nga mane téban.

² E môse zamgbwale ésaé ése Zambe a nga bo é nga man, a a nga wo'on e môse zamgbwale ya ésaé ése a nga bo.

³ Zambe a nga botane môse zamgbwale a telé wô étyi, amu *môs ôte e ñwô Zambe a nga wo'on mfa'a ésaé ya biôme a nga té.

Fam a minga Eden été

⁴ Atata'a yôp a si, éyoñe bi nga téban e nde di: Eyoñe Nti, nyô a ne Zambe, a nga bo yôp a si, teke

⁵ mon élé éziñe ya fé a mbe a too si, nge élo'o éziñe ya fé é mbe é faaneya: amu Nti, nyô a ne Zambe, a ngenan te bo na mveñ é noñe si, a teke môt éziñ a mbe na a bé bidi si.

⁶ Ve ndutuu a mbe a vamek e si a ve si ése émumun.

⁷ Nti, nyô a ne Zambe, a nga kôme môt a mbulu'u ya si; a nga vuñulu nye mfep ényiñ e mimbile mi môé, a môt a nga bo ététéa é vee.

Atiñe Zambe

⁸ Wôna Nti, nyô a ne Zambe, a nga bé afup Eden, e mfa'a jôp da tôô, a tooé môt a nga kôm été.

⁹ Nti, nyô a ne Zambe, a nga bo na bilé mevale mese bi ne abeñe ya yen a mvaé ya di bi faa si, nalé fe élé ényiñ ézezañ afup, a élé ñyemane mvaé a *abé.

¹⁰ Ôsôé ô mbe ô so'o Eden asu ya ve mendim afup, akôlô ya valé, ô nga kabane mefase menyin.

¹¹ Afas ôsu jôé na Pisôn; e nde da bômane sii Avila ése e nne ba koone or été

¹² e nyô a ne abeñ abui, nalé fe bedelium a ako'o ôniks.

¹³ Ôsôé baa ô ne jôé na: Giyôn; e ñwô wo bômane sii Kus ése.

¹⁴ Jôé ôsôé lale é ne Hidékél; e ñwô wo lôt Asiri mfa'a jôp da tôô. Osôé nyini ô ne Efrat.

¹⁵ Nti, nyô a ne Zambe, a nga nyoñe môt a tooé nye afub Eden na a bé bidi été a ba'ale fe de.

¹⁶ Nti, nyô a ne Zambe, a nga ve môt abendé di na: Wo ye bo nguleya di jôm ése ja so bilé ya afup;

¹⁷ ve wo ye bo te di jôme ja so élé ñyemane mvaé a *abé, amu e môse wo ye di je, wo ye wu.

Nyôlane biôme môé a ntéane minga

¹⁸ Nti, Nyô a ne Zambe, a nga jô na: E nji bo mvaé na fam é tabe étam; ma ye bo nye e mvolô baa nye ba fombane mesu.

¹⁹ E Nti, nyô a ne Zambe, a nga kôme betite bese ya mefan a anone ya yôp a tyia. A nga bo na bi zu be môt a yen aval a ye loone bie, nalé ate ététéa ése é vee ja ye be'e e jôé môt a nga yiane yôlé nye.

²⁰ Môt a nga yôlé mon éyem ase jôé, nalé fe anone ya yôp a betite bese ya mefan; ve mfa'a môt, a nji bi mvolô a mbe nyô baa nye ba fombane mesu.

²¹ E nde ñhe Nti, nyô a ne Zambe, a nga bo na ôyo melom ô ku môte yôp, nye ve ke ôyo; a nga nyoñe jia ya bivese bi mvaé bié a dibe vôm ate a minsôn.

²² Nti, nyô a ne Zambe, a nga kôme minga wua a évese mvaé a nga nyoñe fam a zuu nye be fam.

²³ A fam é nga jô na: Eyoñe ji é ne ji évese ya bivese biam e nsône ya minsône miam. E nye ba ye loone minga. Amu a nga nyoñebane be fam.

²⁴ Ajô te fam ja ye li'i ésaa wé a e nyia wé, a a ye lat a e minga wé a ba ye bo e nsône wua.

Fam a minga ba tyam atiñe Zambe

²⁵ Fam baa minga wé be mbe soé bebaane, ve be nji wô'ô nalé ôson.