HÉBRE 9 - Kalate Zambe Nnomo a Mfefe Mfefé Nkôñelan

Njaman * abé e nnôm a e mfefé Elat

¹ Elat ôsu é nga bili metiñ asu nkañan a *nda bisulane ya *si nyô.

² Nda éndelé é nga lôñeban, e nyô ôsusua e vôm a ne étyi, e vôm ébi éfufup é mbe, tawôlô a fembé mimvean.

³ Wôna e mvus éndelé évok, *nda éndelé fe babone je na, e nyô ja dañe dañ étyi,

⁴ é bili jôm ba di'ôlobinda mboon a or, a éwolo élat ése ñyañane or. Ewolo te été, vie'e or ô nga bili maan, *ntum Aron ô nga samban e be tawôlô ya élat.

⁵ Ewolo yôp, bitôto'o bitétéa bi nga buti vôm ba ve metuna'a ya *abé a éjijine jap. Bi se ngule ya liti ayôme mam ese va.

⁶ Eyoñ mana mese me maneya kômban, betuni be wô'ô ke vôm a ne étyi éyoñ ése a bo ésaé jap.

⁷ Ve mfa'a *nda éndelé baa, beta *ntuni étam, mbu ôse, nye a wô'ô nyiine vôm a dañe dañ étyi na, a ve metuna'a mfa'a wé émien a mfa'a bôt.

⁸ Mfufube Nsisim a nga kômbô liti na, zene ya vôm a dañ étyi é ngenane te tame litiban, nté *nda éndelé ôsu é ngenan.

⁹ Jame te é ne éfunan ja liti na mimvean a *bityi'a betuni ba liti asu Zambe bi se nguleya kui bôt ba ve bie e nya étéé a yiane mone môte ya nleme wop.

¹⁰ Mam mete me ne mebendé ya minsôn, me nambe'e ve bidi, menyu, mewoban mevale meva, mme ba yemete bôte na be bo, akekui mfefé nkômane mam wo ye boban.

Ñyemetan élat a metyi me Krist

¹¹ Ve Krist a nga zu ane *ntuni nnen ya akum da zu; a nga tulan e *tabernakel a dañ anen a dañe fe abeñ, e nye a nji ke lôñeban a mo me môt, nalé a ne na e nyô a nji bo nyô ya ntéane biôme wu;

¹² a nga nyiin éyoñe jia ya biyoñ bise e vôm a n'étyi, saake a metyi beyôme bikela nge ma bone benyak, ve a metyi mé émien.

¹³ Amu, nge metyi beyôme bikela a beyôme benyak asub étoñe ngale nyak, e mme ba miam e nyôle ba be ne mvin, ma tune be na be bo *mfuban e minsôn,

¹⁴ kô fé metyi me Krist, nyô a nga ve émien teke ayeñe be Zambe a Nsisim ô too nnôm éto, ma ye fubu mone môte ya nleme wongan mfa'a biwuwua mimboone na bi saane vevea Zambe!

¹⁵ Ajô te nde Krist a ne ntebezañe ya mfefé élat, amu awu dé e nga boban ane ngôtô ya mintyamane metiñ mi nga boban éla ôsu; nalé ate ba Zambe a nga loon ba ye nyoñ akum e too nnôm éto, e nde a nga ve émbéé ngaka'a. Be ne nguleya nyoñ akume te amu awu w nga boban a kôté bôt a bikobe biap be nga bo éyoñe te be ngenan éjôé ya élat ôsu si.

¹⁶ E vôme kalate élik a né, da yiane na e litibane na nyô a nga bo nye a wuya.

¹⁷ E ne bebela na kalate élik a se nguleya bo ésaé nté ôse nyô a nga bo nye a ngenan a vee.

¹⁸ Ajô te élat ôsu ébien é nji ke bo ésaé te na metyi me taté kui.

¹⁹ Osusua, Môze a yôtan ôsu bôte bese, mebendé avale me mbe ntilan e kalate metiñ. Wôna a nga nyoñe metyi me bone benyak a mendim, a miame bie e kalate metiñ e nyôle bôte bese, a bela'an abua izôp a évele léñ.

²⁰ A nga jô na: Jôme ji é ne metyi ma yemete élate Zambe a nga bendé mia na mi ba'ale.

²¹ Môze a nga miame fe metyi e *nda éndelé a e biôme bise ba belane bie asu nkañan.

²² Ane metiñ ma jô, bebé na jôm ése ba fubu je a metyi: nkulane metyi momo, njamane fe momo.

²³ Bifunan bebebela ya yôp nne be nga yiane tuneban avale te. Ve bebebela bebiene ya yôp ba yi *bityi'a bia dañ abeñ.

²⁴ Amu Krist a nji ke nyiin e vôma étyi a ne nlôñan bôt, ny'ate a nga ye bo fo'o v'éfunane ji é ne nyaa. A nga nyiine yôb ebien, e vôm a litiban éyoñe ji ôsu Zambe asu dangan.

²⁵ E be beyude *ntuni nnen a nyiin éyoñe jia mbu ôse e vôm a n'étyi a bili metyi betit. Ve Krist a nji ke nyiin asu ya ve émien abui biyoñ.

²⁶ Nge nalé wôna a nga yiane tôban minjuk abui biyoñ ataté ntéane si. Bebela a ne na a nga yené éyoñe jia ya biyoñe bise, éyoñe biyoñ bi ntoo bebé ya man, asu ya vaa *abé a mvean émien ane étyi'a.

²⁷ Môt ase a ne ntelane na a wu éyoñe jia, mvus éte, a nga yange ntyi'ane mejô Zambe.

²⁸ Avale te fe Krist a nga veban étyi'a éyoñe jia, asu ya vaa *abé bôt abui, a ye yené éyoñe baa, saafe asu ya vaa *abé, v'asu ya nyii ba ba yange nye.