HÉBRE 8 - Kalate Zambe Nnomo a Mfefe Mfefé Nkôñelan

Mfefé * nda Zambe a mfefé Elat

¹ Amu tin ajô bia kobô é ne avale beta Ntuni te, e nyô a nga tabe e mbo nnôme ya éto ntômba e yôb été,

² aval ane mbo ésaé ya nya vômô a ne étyi; a nya *nda éndelé, nlôñane Nti émien, saa môt.

³ Beta *ntuni ase a telébane na, a ve mimvean a metuna'a. Ajô te e ne mfi mfa'a wé na a bi jôm éziñe ya ve.

⁴ Nge Krist a nga too *si nyô, ve a nji ke ye bo *ntuni. Amu e ba ba ve mimvean ane metiñ, be bili éto;

⁵ ve ésaé bôte bete ba bo, é ne asu éve'ela, nkpwase ya benya mame ya yôp aval ane Môze a nga nyoñ abendé Zambe, ane a ye wulu ndaa éndelé. E nga jôban e be nye na: fombô'ô, wo ye bo jôm ése, aval e nga litiban e be wo nkôle yôp.

⁶ E ne été na, a ne ésaé ja dañ ja veban e be nye. Amu a ne ntebe zañe ya élat ja dañe mvaé, nje éte nta'ane mam ô tele mbôka'a ya mbamba *mintiñetan.

Foé ya ntyendane élat

⁷ Nge élat ôsu é nga ye bo tee bijô, e ji ye bo ajô na be tyendé je a e ji baa.

⁸ Ane bijô, nde Zambe a jô na: e melu ma zu, nalé Nti a jô, ma ye bo mfefé élat a *nda bôt Israél a Yuda.

⁹ Saa aval ane ji me nga bo a beésa bap e môse me nga bi be wo a vaa be e si ya Ejipte. Amu bebien be nji yemete ntabane ya élate jame, ma fe me nga li'i be, nalé Nti a jô.

¹⁰ Amu jina é ne élat ma ye bo a *nda bôt Israél e mvuse melu mete, nalé Nti a jô, ma ye futi metiñe mam e ñyemane wob été ma ye tili asimesane dap e minleme miap. Ma ye bo Zambe wop, a ba ye bo e bôte bam.

¹¹ Môt ase ya be be a ye bo te beta ye'ele môt ba nye be too, nge monyañe wé na: Yeme Nti amu bese ba ye yeme ma, ataté nyô a ne tyôtyoé, a kui nyô a ne anen,

¹² amu ma ye jamé minkobane miap, a ma ye bo te simesan mam *abé map.

¹³ Eyoñ a kobô ajô mfefé élat, amu a nga bo ji ôsu nnôm. Amu e jôm ja yômbô é ne bebé ya bo momo.