HÉBRE 7 - Kalate Zambe Nnomo a Mfefe Mfefé Nkôñelan

Mélkisédék

¹ Mélkisédék ate, njôô bôt ya Salem, Ntuni Zambe a dañ e yôp, a nga tôban Abraham éyoñ a nga so wosane bejôô bôt a botane nye.

² E jam ôsu e ne na, a be'e jôé da tinane na, njôô bôt ya *zôsôô, a na, njôô ya *mvo'é.

³ E nyô a nji bi ésaa nge nyia, nge éndan, nge atata'a ya melu mé, nge asu'ulane ya ényiñe jé. Ve a ne aval ane mone Zambe, a ne *ntuni nnôm éto.

⁴ Tameka yenan abim anen môt ate a né, nye Abraham a nga ve ngap awômô ya abeñe ngabe nsa, nye ki a mbe mvamba.

⁵ Amu e ba ya bone be Lévi ba nyoñ ésaé *ntuni, be bili ngule ya nyoñe ngap awômô ayoñ été aval ane metiñ. E ne na e be bobenyañ be ne fe mvô'ô Abraham.

⁶ Ve nye, a nji lañeban e bindane biap, ve a nga bo Abraham na a ve ngap awômô, a botane nye, nyô a mbee mengaka'a.

⁷ Amu teke bisô bi too na, e nyô ya si e nye a nyoñ ébotan e be nyô ya yôp.

⁸ A e vôme nyô, e bôt ba nyoñ ngap awômô ba wu. Ve nye, ba kañete na, a vee.

⁹ Jam da su'ulan e ne na Lévi, nyô a nyoñe *ngab awômô, a nyoñe je amu Abraham e nye a nga kuse nye je.

¹⁰ Amu a mbe a ngenan a to e nyôle ésaa wé éyoñe Mélkisédék baa Abraham be nga tôban.

Beta * ntuni aval ane Mélkisédék

¹¹ Nge ésaé *ntuni mvô'ô Lévi é nga ye bo ngume nya *mvo'é amu nje é mbe tine ya *atiñ e nga teléban a tôñ avale Mélkisédék, éyoñ a nga yiane toban e mvô'ô Aron.

¹² Amu ntyendan ésaé *ntuni wo tyendé fe metiñ été été.

¹³ A e nyô ntilan wo totebane va wo sôñ, a ne wua ya ayoñe môt a nji tame bo ésaé ata'a metuna'a.

¹⁴ A ne jame ya tu'a yeme na, Nti wongan a so ayoñe Yuda, e nde Môze a nji tote jam éziñ e fete *ntuni e mintilane mié.

¹⁵ A e ne bebela na, da beta dañe yené ne ngeññ nge *ntuni mbok a so, a funa'ane Melkisédék,

¹⁶ a bo te nyoñ ésaé amu atiñe ya mbialane minsôn, ve amu ngule ya ényiñ é ne te nguleya ndaman.

¹⁷ E ngaa nyô a veban e be nye avale di:

O ne * ntuni nnôm éto, aval ane Melkisédék

¹⁸ Wôna, e nnôm *atiñ ôsusua ô nga vas amu ô mbe atek a tee mvolan.

¹⁹ Amu atiñe Môze te ngule ya ve nya *mvo'é. A na, e mbamba ndi *nlem a nga veban nye ate bia subu Zambe bebé.

²⁰ A jame te e nji boban teke minkale miziñ.

²¹ Amu nkalane minka ô nji boban ésaé *ntuni ya ba bevok, ve mfa'a wé, (Yésus) minkal mi nga boban, e vôm e nga jôbane e be nye na: Nti a nga kane ngana, a aa ye ke bulane mvus mfa? ôte, vôm a jô na: Nti a nga kane de ngana a a ye bo te jôbane je; ô ne *ntuni nnôm éto.

²² E jame te été, Yésus a nga boban éban ya mbamba élat.

²³ A na, betuni b'ôsu be mbe abui mfa'a ya tañ amu awu e nga kamane nkean ésaé wop ôsu nnôm éto.

²⁴ Ve Yésus a bili éto *ntuni nnôm éto, amu a too nnôm éto a bili éto *ntuni é ne teke akalan.

²⁵ Amu ajô te, a ne ngule ya nyii e ba ba zu e be Zambe amu nye, e nné ane a too nnôm éto, a ye'elan ajô dap.

²⁶ E nga yiane na, bi bi avale beta *ntuni te, mfufup, te bijô, teke aton, nkandan a bebo mam *abé, mbetane yôb été.

²⁷ Nyô a nji bo ane beta betuni befe, e mbe be nga taté bo be va'a metuna'a ajô mam *abé map bebien *môs ôse, a e ma ya ayoñ. Ve nye, a nga bo jame te éyoñe jia ya biyoñe bise, a mvean émien.

²⁸ Eyoñ *atiñ da telé e bôt be nji bo ngume *mvo'é beta betuni. Ve éfia ya ngana ja toteban e mvuse metiñ, ja telé e mon a nga boban ngumba nya *mvo'é nnôm éto.