HÉBRE 6 - Kalate Zambe Nnomo a Mfefe Mfefé Nkôñelan

Hé 10:26-31; 12:15-17

¹ Ajô te nkelan ôsu a tôñe nye'elan wo yiane benya bôtô, te beta ba'alane nye'elane mame ya atata'a ajô Krist. E ne na, nli'an ajô biwuwua mimboon

² a mbunane Zambe, nye'elane ya nduan, *mbetane mo, ñwômane miñwuan, a ntyi'ane mejô ya asu'ulan.

³ E jam bia ye bo e nde le, nge Zambe a kañese.

⁴ E vo'o bo na, e bôt be nga tame nyoñ éfufup *môs éziñ, be tye'e mveane ya yôp, be nyoñe ngap ya mfufup Nsisim,

⁵ be wô'ô mvaé ya abui ajô Zambe a mengule ya éyoñ ja zu, ve be kpwelé.

⁶ E ne ayaé na be kôñelan éyoñe baa, e too na ba beta tyelé Mone Zambe élé yôp amu nkôñelane wop wo bo nye jôm ba ta.

⁷ Eyoñe si ja nyu mendime me mveñ ja noñ éyoñ ése, a faa bilo'o bia volô, e ba ba bo ésaé si éte, ja nyoñ ébotan jé e be Zambe.

⁸ Ve nge ja viane faa biyo a ndôé, ja ye bo tee mfi, bebé ya yo'oban a su'ulane di'iban.

Hé 10:23-24, 32-36

⁹ Ve mia, a bôt ma nye'e, bia tu'a buni a jô na, mi ne nya zene, e nyô ya nyian.

¹⁰ Zambe a nji bo ékotekot. A se ngule ya vuane mboone wônan a nye'an mi nga liti asu jôé dé, a bo mimfufub ésaé e melu mvus, a ja'an a zu kui éyoñe ji.

¹¹ Ve bia kômbô na môt ase ya e be mia a ke ôsu a ve ngule ya bi ndi nleme ya meyaé mé a kui suk,

¹² teke tek, ve vu ba ba nyoñe ngap ya ngaka'a, amu mbunan a ndi *nlem.

Ngaka'a Zambe a ndi nlem

¹³ Eyoñ Zambe a nga ve Abraham ngaka'a, amu, e môte mfe a dañe nye a nji bo avale ya na a kane ngana asu dé, a nga kane ngana e be émien

¹⁴ a jô na: Yaa, ma ye jalé wo a bibotan, ma ye bo wo beta mvoñe bôt.

¹⁵ Eyoñ Abraham a nga bo mbane ya yange, ngaka'a é nga tôéban e mise mé été.

¹⁶ Bôt ba kane ngana a jôé ya môt a dañe bebien. Mfa'a ya mane bisô, nde be wô'ô kane ngana.

¹⁷ A *zen éte, amu Zambe a kômbô liti bôte bebela ntyi'ane wé, a wô'ô kane ngana.

¹⁸ Avale te mame mebaé me ne teka'atyendé, e mme mete Zambe a se ngule ya laa minsos, ma ve bia beta ngule minlem, bia, e ba be nga li'i mame mese, amu ngaka'a ya ndi *nlem.

¹⁹ Ndi minlem éte, é ne bia ane étyé ba telé je besitima ya *nsisim, nya ñyemetane, nje ja tulan éndelé yat,

²⁰ e vôme Yésus a nga nyiine señe jangan ane asuzo'o, a too beta *ntuni nnôm éto, aval ane Mélkisédék.