HÉBRE 5 - Kalate Zambe Nnomo a Mfefe Mfefé Nkôñelan

Hé 7:26-28; Eza 50:5-6

¹ E beta *ntuni ase a nyoñeban a so'o e be bôt a ne ntelane ya bo Zambe ésaé asu bôt. Esaé jé é ne na, a ve mimvean a metuna'a, amu mam *abé.

² Amu émien a ne mbôma'ane a *meve'ele, a bili ngule ya yeme wô'ô ba be nji yem a ba ba kop.

³ Amu nalé a yiane ve metuna'a ya *abé mfa'a wé émien a mfa'a bôt.

⁴ Môt a nji yiane ve émiene duma te, ba nyoñe de amu nloon Zambe, aval ane a nga bo mfa'a Aron.

⁵ Avale te fe Krist a nji ve émiene duma ya bo beta *ntuni. A nga nyoñe de e be nyô a nga jô nye na: Ô ne mone wom, den, me biaéya wo,

⁶ avale fe ane njôan ôvo'o na: O ne *ntuni nnôm éto aval ane Melkisédék.

⁷ Nye ate, nté ényiñe wé ya si va a nga bo meye'elan a minja'an, a beta ntat, a milik e be nyô a mbe ngule ya nyii nye awu. A a nga nyoñ éyalane meye'elan, amu nsuan émiene si.

⁸ Mon, aval ane a mbe, amu mintaé mié, a nga yé'é mewôk a bo njalane be émien.

⁹ Ajô te a nga bo tine nyiane ya nnôm éto e be ba ba wô'ô nye.

¹⁰ A Zambe a nga yôtane nye beta *ntuni aval a ne Mélkisédék.

Edo'o ya ényiñe mbunan

¹¹ Bi bili mam abui ya kobô ajô di, a mfaéan éfufup ya été ô ne ayaé, amu mi ne ôte'etek ya wôk.

¹² Mi nga yiane bo beye'ele a so ayab éyoñ. Ve mia beta yi na, be ye'ele mia mame ya atata'a mejô me Zambe. Amu nalé mi ngenane mi yi ve menyañ, saa benyaa bidii.

¹³ Nyô ase a ngenan a yi'ane menyañ, a se ngule ya tu'a fase jé é ne *zôsôô, a jé é ne ékotekot. Amu a ne nkeñelé mon.

¹⁴ Ve benya bôtô ba di benya bidii, amu, a mbane ya bo nalé, be mbili ngule ya yemelane jôm é ne *abé a ji é ne mvaé.