HÉBRE 3 - Kalate Zambe Nnomo a Mfefe Mfefé Nkôñelan

Yésus a dañe Môze a Yasua

¹ Ajô te, a mimfufup mi bobejañ, mia mi bili ngap nloone ya yôp, simesa'ane *nlôman a beta *ntuni ya mmemane mbunane wongan, Yésus.

² Nyô a nga telé nye, a too nye ndi, aval ane Môze a nga too e *nda jé ése été.

³ Ve na e duma a nyoñ da dañe di Môze amu, mezene mese, nlôñe *nda a wum a dañe *nda ébien.

⁴ Nda ése é bili môt a nga lôñe je. A e nyô a nga bo mame mese, a ne Zambe.

⁵ Amu Môze a mbe étabe ndi ya ngume *nda wé, aval ane mbo ésaé mfa'a ya ba'ale mame mese ma ye jôban e melu ôsu.

⁶ Ve Krist nye a ne mon, a too fe *nda jé. Bia bi ne *nda jé nge bia ba'ale mbunan a ndi *nlem bia va'a bie akekui asu'ulan. Nyiane ya awo'one Zambe amu mbunan.

⁷ Amu ajô te, aval ane mfufup Nsisim a jô: den nge mia wô'ô tyiñe jé,

⁸ te boone minleme mienan ayet, aval ane melu me mbenane njôan a ôlun, e môse *mebôbela'a e *nkôte si,

⁹ éyoñ be éso benan be nga bôbôlô ma, a kômbô ve'ele ma, a be nga yene mimboon miam nté ya mimbu mewôme nyiin.

¹⁰ Ajô te me nga yaa miaé bôt ôte. A me nga jô na: Asimesan dap da yale feñ éyoñ ése, be nji ke wôk e jame ma yange be be.

¹¹ Amu me kaneya ngana ayaa dam été na: Ba ye fo'o bo te nyiin awo'one dam été.

¹² Taba'ane ntye, a bobejañ, na, môt éziñe ya be mia a bi mbia *nlem a ayete *nlem da ye kandé nye baa vevea Zambe.

¹³ Ve leba'an *môs ane *môs, wua a nyô mbok, nté ôse e ne jôbane na: dene ya mimfufube mintilan a fombô bia, nde môt éziñe ya be mia a ye bo te bo ayete *nlem a medu'an me *abé.

¹⁴ Yaa, bi ntoo bemvôé be Krist, nge bia tu'a ba'ale ndi minlem bi nga nyoñ aso atata'a,

¹⁵ éyoñ e ne njôane na: den nge mia wô'ô tyiñe jé, te boone minleme mienan ayet, aval ane melu me mbenane njôan.

¹⁶ Nde beza mbe be nga wôk, a be nga soñe Zambe? Ye sa ba bese be nga kôlô Ejipte Môze a wulu'u be'

¹⁷ A beza mbe a nga yaa be nté mimbu mewôm menyin? Ye sa ba be nga bo *abé mbe bete mimbim mi nga ku *nkôte si'

¹⁸ A beza mbe a nga kane ngana na, ba ye bo te nyiin awo'on dé été, ye sa bôte melo bete'

¹⁹ A bia yene na, be mbe te nguleya nyiin amu ayete minleme dap.