HÉBRE 2 - Kalate Zambe Nnomo a Mfefe Mfefé Nkôñelan

Foé mfi ya nyian

¹ Ajô te bia yiane nyoñe foé bi nga wôk a ésemé, nge bi nji kômbô ku.

² Amu nge foé beéngele be nga kat é nga tôéban, a nge *ntyaman atiñ ôse a mboone melo ôse bi nga nyoñe *melep,

³ wôna bia bebien bia ye fam aya nge bia bi avale nyiane di éngbwemese? Nyian, wu Nti a nga taté kat, ô tabe ñyemetane be bia a ba be nga wô'ô wô,

⁴ a Zambe a nga suk ngaa wop a mendem, a mesimba, a bitua bi mame mevale meva, a mimvean mi Mfufube Nsisim ane nkômbane wé ô né.

Monyañe bôt

⁵ Amu saa beéngele mbe a nga bo si ya melu ôsu, nje bia kobô je. Njôan ô nga vebane vôm éziñ ô to na:

⁶ môt a ne jé, ane wo simesane nye' Nge mone môt ane wo mvamane nye'

⁷ O nga sili nye si tyôtyôé a beéngele: ô nga jalé nye étôtok a duma;

⁸ ô nga telé biôme bise e mebo mé si, a telé nye njôô biôme bise, teke jôm É nga li'éjôé jé si é too atan, akôsa bo bi ngenan tu'a yen ane biôme bise bi ne e njôane wé si,

⁹ ve bi lôô lôô na: Nyô a nga siliban e si ôyôme nté e be beéngele, Yésus Krist, a ne njalan a étôtok a duma éyoñe ji, amu mintaé ya awu a nga jibi, a a nga tye'awu mfa'a môt ase.

¹⁰ E ne *zôsôô na, Zambe, nyô a nga té a ba'ale biôme bise, a bo Yésus e nyô a yian, a zene ya mintaé, nde a ye zuu *bon abui be nyoñe ngap ya étôto'o jé. Amu Yésus a ne nyô a kee be nyian.

¹¹ Amu nyô a fubu, a e ba ba fuban, be ne ésaa wua. Ajô te a nji wô'ôson ya loone be bobenyañ a kobô fe na:

¹² ma ye kañete jôé dôé e be bobejañe bam ézezañ ésulan été, ma ye kañe wo,

¹³ a na: Ma ma ye jaé ne lut a ndi *nlem e be nye, a fe na: Me nyô, a bone Zambe a nga ve ma.

¹⁴ Ajô te, amu *bon be bili metyi a minsôn, nye fe avale da, a nga bo ane be, nde a ye tyam nyô a nga bili ngule ya awu, amu awu dé, e ne na, Satan,

¹⁵ a kôté, ba e mbe bete, amu woñe ya awu, be nga lôt nté ényiñe wob ôse, éto belo été.

¹⁶ Amu na, saa beéngele mbe a nga zu volô, ve mvoñe bôt Abraham.

¹⁷ A na, a nga yiane funane bobenyañe bé mimfa'a mise, nde a ye bo beta *ntuni a ne *mvam, a too fe nyô a bili *tyiñ e be Zambe mfa'a ya vaa mam *abé ya ayoñ.

¹⁸ Amu éyoñ émien a nga jibi *meve'ele, a bili ngule ya volô ba ba tôbane meve'ele