HÉBRE 10 - Kalate Zambe Nnomo a Mfefe Mfefé Nkôñelan

Susu'a benya metuna'a

¹ Metiñe beyude me nji bo njalan a nya éve'ela ya benya biômô. Me ne ve nsisiñe ya mbamba be mam ma zu e melu ôsu. Me vo'o bo ba ba subu Zambe bebé nya *mvo'é. Me ne bo de aya a metuna'a me ne éyoñ ése ve avale da, a ma vebane mbu ane mbu'

² Nge ba ba kañe Zambe avale te be nga ye bo *mfuban éyoñe jia mfa'a ya minkobane miap, ve be nga ye jô'é mveane metuna'a.

³ E jam e né e ne na metuna'a ma volô bôt na be simesane mam *abé map mbu ane mbu.

⁴ Amu metyi beyôme bikela me se ngule ya vaa mam *abé.

⁵ Amu ajô te Krist éyoñ a nga nyiine *si nyô, a nga jô Zambe na: ô nji kômbô étyi'a, nge mvean; ve ô nga ve ma nyôô.

⁶ Ô nji kañese mvean ba di'i ngumba, nge *bityi'a asu *abé.

⁷ Eyoñe me nga jô na: Ô lôô, ma zu, e mvulekane kalate été, e ne ntilan ajô dame na, asu ya bo nkômbane wôé, a Zambe.

⁸ A taté jô na: ô nji kômbô a ô nji kañese nge *bityi'a, nge mimveane ya mefup, nge mimvean ba di'i ngumba, nge *bityi'a asu *abé mbie bia veban ane metiñ ma jô.

⁹ Wôna a jô na: Tame yen, ma zu asu ya bo nkômbane wôé. Nalé a ne na a tyam nkañan ôsu a telé wu baa.

¹⁰ E nne bi nga tuneban a zene ya nkômban ôte a mveane nyôle Yésus Krist éyoñe jia ya biyoñe bise.

¹¹ Ntuni ase a tebe tetele *môs ôse a bo bisaé bié, a ve avale metuna'a da mbane mban, mme mete me se nguleya vaa mam *abé.

¹² Ve nye, éyoñ a maneya ve susu'a metuna'a ése, a tabe si mbo nnôme Zambe nnôm éto.

¹³ A taté éyoñe te, a yange na besiñe bé be silibane si a bo ételé mebo jé.

¹⁴ A zene ya avale metuna'a étam a nga bo ba a nga fubu ngume nya *mvo'é nnôm éto.

¹⁵ Jame te nde Mfufup Nsisim a kate bia. Amu éyoñ a maneya jô na:

¹⁶ élate ji nje ma ye lat a be e mvuse melu mete. Nti a nga kobô na: éyoñ ma ve metiñe mam, ma ye tili me e minlem a asimesane dab été.

¹⁷ A ma ye bo te beta simesane mam *abé map.

¹⁸ Amu vôme *njaman wo yené, be nji beta bo mimvean amu *abé.

Melep asu ñyemane ngu e mbunan été:

¹⁹ Ajô te, a bobejañ, amu bi mbili nya ndi nleme ya nyiine vôm a ne étyi amu metyi me Yésus,

²⁰ bi bili mfefé *zen a nga yoé bia, wo tulan éndelé zañ, e ne na, e nyôle jé.

²¹ Amu bi bili éwôlô *ntuni ntelane *nda Zambe,

²² e nsuba'ane ñhe bebé e be Zambe a minlem mi ne tee medu'an, a nya mbunan a minleme *mfuban teke bijô e mone môt ya *nlem été a menyôl me ne nsôban a mfubane mendim.

²³ E ntuka'a biane ndi minleme jangane ngu amu bia buni na, Zambe a ne nyô a tôé mintiñetane mié.

²⁴ E momba'an, wua asu ba bevok, a volan, a liti nye'an a mboone mam me ne mvaé.

²⁵ E mbo'one te jô'é fulu ya sulane vôme wua aval ane ba bevok ba bo. Ve bia yiane leban, a dañedañ na mi lôô e môse Nti ô ntoo bebé.

²⁶ Amu nge bia vañe bo *abé éyoñ bi maneya yeme benyaa mejôô, metuna'a mefe ajô *abé me nji fe bo.

²⁷ A li'i fo'o bia ve angôndô ntyi'ane mejô a ayôñe nduan da ye di'i bikangekange.

²⁸ Ye môt éziñ a tyame metiñe me Môze? Teke nkoon éngôngo nge bengaa bebaé ba bo'olô, a ne fo'o nye ve awu.

²⁹ Abime mbia ayaa avé, éyoñ mia tu'a simesan, da ye yiane nyô a tibi Mone Zambe a mebo éyoñ a ndaman metyi ya élat, e mme mete a nga tuneban a me, a biasé Nsisime *mvam'

³⁰ Bia yeme de, nyô a nga jô na: Akuna'a e ne éndam, ma ma ye ya'ane bôt! A na: Nti a ye tyi'i bôte bé mejô.

³¹ E ne angôndô ya ku e mo me vevea Zambe.

³² Simesa'ane binyiñe bienan e melu mvus. Angôndô adit a mintaé mewosan mi nga jibi éyoñ mi maneya bi éfufup.

³³ Eyoñ éziñ mi nga wu meta a ékpwe'ele, éyoñ éziñ mi fulan a ba ba tôbane mame mete.

³⁴ A mi nga nyoñe ngap mintaé, mimbôk, a kañese jañele akume denan a mevak a ndi *nlem na mia ye nyoñ akum da libi da dañ abeñ.

³⁵ Te jañelane ndi minleme jenan, é bili beta be ma'an.

³⁶ Da sili na mi bi abui njiban nde mia jalé nkômbane Zambe, a nyoñe jôme ngaka'a.

³⁷ A li'iya ve ôyôme nté wôna, nyô a zu a ye so. A aa ye ke langan.

³⁸ E *zôsôô môte wom a ye nyiñ a mbunan. Ve nge a bulane mvus, nleme wom wo ye bo te yene nye mvaé.

³⁹ Ve bia, bi nji bo ba ba bulane mvus a sup, ve ba ba buni amu nyiane ya minsisime miangan.