HÉBRE 1 - Kalate Zambe Nnomo a Mfefe Mfefé Nkôñelan

Mebatan

¹ Zambe, éyoñ a maneya kobô be ésaa bangan e melu kôa, biyoñ abui a mezen mevale meva, e be bekulu mejô,

² a nga kobô bia e melu ma su'ulane ma e be mone wé. A nga telé nye miene élik ya mame mese, a a nye fe, a nga té bimo.

³ Mon ate a faé éfufup ya étôto'o Zambe, a liti'i fe avale Zambe a né. A be'e biôme bise a ajô dé e ne ngu; éyoñ a maneya bo metuna'a ya mam *abé, a nga tabe si e mbo nnôme ya éjijine Zambe e mevôme ma dañ ôyabe yôp,

⁴ amu nkôñ ôyabe wé a dañe beéngele, nde a nga nyoñe jôé da dañ éndap ane ngap.

Mone Zambe a dañe beéngele

⁵ Mbé ya beéngele a nga tame jôô nye na: O ne Mone wom, e môse wu, ma, me biaéya wo' A fe na: Ma, ma ye bo nye ésaa, a nye a ye bo me mon'

⁶ Ve éyoñ a lôme ntôle mone *si nyô, a kobô na: be éngele be Zambe bese be kute meboñe si asu dé!

⁷ Mfa'a beéngele a jô na: Nyô a bo beéngele bé bivuñulu, a bebo bisaé bé nkaba'a nduan.

⁸ Ve mfa'a mon a jô na: éto njôane jôé, a Zambe, é too nnôm éto! A na: Ntume ya *zôsôô ô ne ntume ya éjôé jôé.

⁹ O nga nye'e *zôsôô a vini *abé, ajô te a Zambe, e Zambe wôé a ve wo ñwo'one mbone mevak, ve saa bemvôé bôé.

¹⁰ A na: Wo, aso atata'a, a Nti, ô nga bo si, yôp e ne ésaé ya mo môé.

¹¹ Bise bia ye jañ, ve wo ô too to, yaa, bise, aval ane ngômesan, bia ye yômbô,

¹² a aval ane ba bo alô'ô, wo ye vuluku bie, aval ane ngômesan, yaa, bia ye tyendéban, ve wo, ô ne ve avale da a mimbu miôé mia ye bo te tyi'i étun.

¹³ A, *mbé ya beéngele a nga tame jôô nye na: tabe'e si e mbo nnôme wom, akekui ma ye bo besiñe bôé ételé mebo jôé'

¹⁴ Ye bese be nji bo minsisim mia bo bisaé a minlôman ya ésaé, mfa'a mvaé ya ba ba yiane nyoñe nyian ane ngap'