HABAKUK 3 - Kalate Zambe Nnomo a Mfefe Mfefé Nkôñelan

Meye'elan me * nkulu mejô Habakuk

¹ Meye'elan me *nkulu mejô Habakuk a nga ye'elan me too ane jia du:

² A Nti, me wô'ôya jam ô nga jô, a Nti, ma ko mimboone mi mam miôé woñ kel'ôsu a bo nalé mimbu mia zu! Ane mimbu mia lôt, bo'o na bôt be yeme mie ve ayaa dôé été, ô simesa'ane nkoon éngôngole wôé.

³ Zambe a so Téman, Nyô a n'étyi a so nkôle Parañ. Nyô a n'éjijin a buti yôp, si ése é jaéya a duma dé.

⁴ A faé an'éfufup; minkôkô mia téé nye wo; ngule jé é solô nje le!

⁵ Ebubua ôkon ja wulu ny'ôsu, ôkone tit wo so nye mebo si,

⁶ a tebe a ve'e si. A fombô a bo na *meyoñ me bôt me si'an; minkôle mi too nnôm éto mia kandan, a bone minkôle ya melu kôa ba nyemé. Avale te fe bone mezene ya melu kôa.

⁷ Me lôô menda bindelé ya Kusan me ntoo zesé jôm, bitaba'a ya si Madian bia fô'ôban,

⁸ Ye Nti a yaa asôé' Ye ayaa dôé da fombô asôé' Ye ayo'o dôé da fombô mañ, éyoñ wo bet e bikabela biôé yôp, e bevagoñe bôé yôp'

⁹ Mfane wôé ô ntoo nsoé, mengana môé me ne mekoñe ya nkobô wôé. Wo sale si a asôé.

¹⁰ Minkôle mia yene wo ve fô'ôban, ôkôse mendim wo lôt, édo'o yee ja bete tyiñe jé a bete mo mé yôp.

¹¹ Jôp a ngon ba tebe vôme wua, ba taté dulu a éfufube ya mekoñe môé, a minkôkô ya akoñe dôé.

¹² Wo tyi'ilane si a ayo'o ese, wo ko'o *meyoñ me bôt a ayaa ese,

¹³ wo kui atan asu ya nyii ayoñe bôte dôé, asu ya nyii e môte wôé a ne *ñwo'one mbon. Wo bu'u ôtondé ya *nda mbo mam *abé, wo tyame je ne meñ.

¹⁴ Wo tube nlô bivete biap a mekoñe mabe mebien, mme ma kubu ma nyô an'ôkôs asu ya bu'u ma, be bete'e metyiñ a mevak, aval'ane nge ba min éngôngole môt asoé.

¹⁵ Ô yoéya bikabela biôé *zen e mañ, e avise beta mendim été.

¹⁶ Me wô'ôya, a biôme y'abum été bi li'ibaneya, éduñe te é boya na biyaé biame fe bi fô'ôban. Bivese biam bi nga mane duñ, ma nyeñeban teke fô'ôsan, me yange'e *môs ôlun, ñwô môt a dili bita a ye zu wosane ayoñ.

¹⁷ Amu figié aa ye ke be'e sam, teke nkôane bibuma e mefub mindi'i mi woon. Nwuman ôlivié a ye wum wo ye bo ate'e nyô, mefup ma ye bo te yô bidi, mintômba a bikela bia ye man e mebemba été. Nalé fe teke benyak e mevôme map be wô'ô di.

¹⁸ Ve ma ma ye vak e be Nti, ma ye fôn e be Zambe ya nyiane wom.

¹⁹ Nti, éñwom, a ne e ngule jam, a kôñelane mebo mam me funane ma minkok a a bo na me wulu mevôm me n'ôyabe yôp. A évete beyia bia! E jia ji é yi'aba'an a memvet.