HABAKUK 2 - Kalate Zambe Nnomo a Mfefe Mfefé Nkôñelan

¹ Ma fe ma zu tebe e vôm me wô'ô mombô. Ma zu tebe ôzomezome *nda yôp. Ma zu fombô, me yene jame Nti a ye jô ma a jam ma ye yalan ajô ya minja'ane miam.

Eyalane Nti

² Ane Nti a nga yalane me na: Tili'i ñyenan jam, kpwele de e *mekok, éyoñe te ba ye lañe wô tyi'ibi tyi'ibi.

³ Amu ñyenane te ô bili ngum éyoñ ô ne ntelan. Nyenane te ô mbeme tôéban teke medu'an. Nge wo bo te ji'a tôéban, yange'e, amu wo ye fo'o tôéban, teke selan. A éyoñe ya ntôéban ja ye bo te subu ôsu.

⁴ Tame yene nleme ya môt a tibili bôt ô ne mvusan, ô se ke *zôsôô abume dé été, ve zôsôa môt a ye nyiñ amu mbunane wé.

Mevale biyo'é metan

⁵ E ne bebela na woon a ne nkoñe bôt. Nalé fe môt a ne mebun teke tabe ne séé, a ndamé éngoñe jé ane vôme ya miñwuan, a ne teke jaé ane awu. A dutu *meyoñ me bôt mese e b'émien,

⁶ ye balé bete bese ba ye bo te bo nye jôme *nkana' Jôme éwovioé a asoé ba' Ba ye jô na: Bidim a môt a kôane biôm Bi nji bo émbié. A kui éyoñ évé' Za a beté adite mbe'e ya memvôla mé!

⁷ Ye bôt ô bili memvôla ba ye bo te kôlô si atemetem' Ba ba ye fô'ô wo, ye ba ye bo te vee ôyo' Wo ye bo jôme jabe ya nsa!

⁸ Amu ô nga sa *meyoñ me bôt abui, ajô te *meyoñ me bôte mevo'o mese ma ye sa wo, amu metyi me môt, amu évô ô nga bo e si jangan, tison a bôte bese be too été.

⁹ Bidim a môt a jeñ ékotekote mvaé asu ya *nda jé, nalé ate a ye lôñe dumba'a dé e mebôbône minkôle yôp na bidim bi bo te kui e vôm a né.

¹⁰ Yene na ô tyi'iya asu ôsone ya *nda jôé; éyoñ ô nga wôé abui *meyoñ me bôt ényiñe jôé le ô nga selan.

¹¹ Amu akok da yôn e mfine *nda, a ntu'a wo yalane de e mfa'a ya andil.

¹² Bidim a môt a lôñe tison a nkulane metyi, nyô a lôñe tison a mboone mbia be mam.

¹³ Ye jame di e nji so e be Nti ya *minsamba mewosan na: Meyoñ me bôt ma jalé mebien njuk asu nduan, a minsamba mi bôt mia wu nju'u zesé'

¹⁴ Amu *si nyô ja ye jaé a ñyeman étôto'o Nti, avale f'ane mendim ma yandan édo'o mañ.

¹⁵ Bidim a môt a nyuu môt ba nye be too jôm a te sôé nsu, a bo nye na a sok a tebe sôsoé!

¹⁶ Yeme na ô jaéya a ôson, sa ñhe a duma; womiene fe ô ntoo ve nyu a tebe sôsoé! Elaé ayaa Nti ya mbo nnôme wé ja ye kôñelan *abé be wo; duma dôé da ye bili ôson!

¹⁷ amu évô ô nga bo Libañ ja ye late wo a abuk, a jôme mimbame betite miôé mi nga tibi ja ye bu'u be a woñ, amu nkulane metyi me môt, amu évô é nga boban e si, e tison a e be bôt be too été.

¹⁸ Ngunemelan ja volô jé ane mbo biôm a mo a kpwele je, nalé fe éve'ela é ne mboon a nyeman étyé ja ye'ele minsos. Ane môt a nga bo je a tabe je ndi a kui vôme ya bo azezambe e ne teke kobô'

¹⁹ bidim a nyô a jô élé na: Tebe'e tetele! A ako'o e too évôle na: Ve'e ôyo! Ye ako'o te e ne ye'ele jôm' To'o e bili or nge argent. Te k'éve'ela'a nsisim ako'o te e bili.

²⁰ Ve Nti ke a ne e Nda Zambe jé é n'étyi, si ése é kpwa'a ne kubuk asu dé!