GALATI 6 - Kalate Zambe Nnomo a Mfefe Mfefé Nkôñelan

Volavolane * bebuni , mboone mvaé

¹ A bobejañ, nge da kui na ba dilane môt éziñ a bo'o *abé, mia bôte ya Nsisim mi beta'a sôane avale môte te *zôsôô, a nsisime ya évôvoé; ve ô tabe'e ntye, amu womien fe ô ne ngule ya tôbane *meve'ele.

² Mi beka'ane mimbe'e mi ba bevok, nalé ate mia ye jalé metiñe me Krist.

³ Amu nge môt a buni na a ne jôm éziñ, éyoñ a nji bo je, a du'u émien.

⁴ Ve môt ase a fombô'ô mboone wé; nde, nge a yene éfia ya wumu je, da ye bo ve mfa'a wé émien, saa mfa'a môte mfe.

⁵ Amu môt ase a yiane be'e mbe'e wé émien.

⁶ E môt ase a nyoñe ñye'elane ya ajô Zambe, a va'a ngab éziñe ya biôme bié e be nyô a ye'ele nye.

⁷ Te du'uban, Zambe a nji bo nyô ba kpwe'ele, amu jôme ése môt a mias, nje fe a ye kôan.

⁸ Nyô a mias mfa'a ya minsône mié émien, a ye kôane bibuma minsôn mia wum, e ne na, awu. E môt a mias mfa'a ya Nsisim, a ye kôane bibuma Nsisim a wum, e ne na, ényiñe ya melu mese.

⁹ E mbo'ane mvaé te tek. Amu bia ye kôane e mbamba éyoñ, nge bia bo te kat.

¹⁰ Nde, nté bi bili éyoñe ya bo, e mbo'on ésaé mfa'a mvaé bôte bese, e dañedañ, e ba be ne ba ya *nda mbunan.

Krôa Krist a mfefé ététéa

¹¹ Tameka yenan aka'a beta bikanga ma tili mia ba a wo wome mamien!

¹² E bôt ba kômbô bo miñyené mfa'a ya minsôn, mbe ba tindi mia ajô ntyi'ibane metye. Susu'a jam ba sôñ a ne na be sa'ale ékpwe'ele ajô Krôa Krist.

¹³ Amu e ba bebien be nga tyi'ibane metyele bete, be nji ba'ale metiñ. Ve ba yi mfa'a wônane na, mi tyi'ibane metye, nde ba ye nyoñe duma dap, amu minsône mienan.

¹⁴ Ve mfa'a wom, teke bebé, teke jam afe ya wume de, vengevenge ve Krôa Nti wongan Yésus Krist. A Krôa éte, *si nyô é ne ntyeléban mfa'a wom, aval ane me fe me ne ntyeléban mfa'a *si nyô.

¹⁵ Amu saa ntyi'ane atyel ñwô ô ne mfi, nge tee ntyi'an, ve mboban mfefé ététéa.

¹⁶ Mvo'é a *mvam bi ne be ba ba tôñe njôan ôte. Ja'ane be Israél Zambe.

¹⁷ A taté éyoñe ji, môt a bo'o te beta ndeñele ma. Amu me me be'e bifele bi Krist e nyôle jam.

¹⁸ A bobejañ e mvame Nti wongan Yésus Krist é tabe'e be minsisime mienan. Amen!