GALATI 5 - Kalate Zambe Nnomo a Mfefe Mfefé Nkôñelan

Nsubane mvam

¹ Amu ajô ya tu'a bo beti, nde Krist a nga kôté bia. Teba'ane ñhe ngu, te beta bili ébôñeté ya éto belo si.

² Ma Paul, ma kobô mia de. Nge mia beta tyi'ibane metye, Krist a ye bo te beta volô mia jôm.

³ Ma beta bendé môt ase a tyi'iban atyele na, a ne ntindane ya ba'ale metiñe mese.

⁴ Mia kandane Krist nge mia jeñe *zôsôô wônan e metiñ été. Mi subeya *mvam.

⁵ Ve bia a *zen ya Nsisim amu mbunan, nde bia yange ndi *nlem ya *zôsôô wongan.

⁶ Amu mfa'a nyô a nee be Yésus Krist, mfi ô nji bo ntyi'ane atyel, nge tee ntyi'ane atyel. Ve mbunan wo bo ésaé a nye'an.

⁷ Mi nga bo mi tôñe *mvo'é, za a nga bo mia na mi jô'é ve benya mejôô mewôk'

⁸ Ndutan ôte, ô nji so e be nyô a loone mia.

⁹ Oyôme mvusu wo vusu ngum ébañ ôse!

¹⁰ Mfa'a wônan, me too ndi e be Nti na, mia ye bo te tôñe zene fe. Ve nyô a miase lubulubu zañe jenan a ye nyoñe *melep, ja'ane a ne za nge za.

¹¹ Ve mfa'a wom a bobejañ, nge ma beta kate foé ya ntyi'ibane metye, ma beta wu ékpwe'ele amu jé? Eyoñ éte nkolan ôba'a ya élé wo ye bo momo!

¹² E ba ba bo nzameta'ane zañe jenan, be kôme'e ke tyi'ibane metye nya ntyi'ibane.

Wula'an a Nsisim sa a minsôn

¹³ Mia a bobejañ, mi nga loban amu éto beti, ve jame da, éto beti éte é bo'o te ve minsône fet ya nyiñ ane mia kômbô. Ve, a zene ya nye'an, bo'one bebo bisaé ya ba bevok.

¹⁴ Amu metiñe mese ma jaléban éfia jia jina été na: Wo ye nye'e môte mfe ane wo nye'e womien.

¹⁵ Ve nge mia lôan, a diane mia mia, taba'ane ntye. Mia ye wôan, bana a ba bevok.

¹⁶ Vô'ôlane ma: wula'an a ngule ya Nsisim, nde mia ye bo te bo nkômbane ya minsôn.

¹⁷ Amu minsôn, e minkômbane mié été, mia wosane Nsisim. A Nsisim wo wosane minsôn. Ba siane zañe jap, avale ya na, mi bo te bo nkômbane wônan.

¹⁸ Ve nge mia wulu a Nsisim, mi nji fe bo metiñe si.

¹⁹ Ba yeme mimboone mi mame ya minsôn, mi ne na: Ebamba, mvin, ôdo'é mbia mvô,

²⁰ nkañane bezambe befe, bemvi'i, ziñ, ntañete, mbia *aban, ayaa, mesengan, metyama'ane, mbia mengam,

²¹ miñyamete, nso'one bilam, mbia ndian a mam mefe avale te. Ma kate mia, ane me nga mane jô de na, e ba be ne bebo avale mam ete ba ye bo te nyoñe ngab éjôé Zambe.

²² Ve ébuma ya Nsisim é ne na: Nye'an, mevak, *mvo'é, njiban, *zôsôô, *mvam, mbamba *nlem, mbunan,

²³ évôvoé, njôane *nlem. Atiñ da wosan avale mame te e ne momo.

²⁴ E ba be ne ba be Krist, be tyeléya minsôn élé yôb a fulane mbia miñyiane mié a ayôñ minkômbane dé.

²⁵ Nge mia nyiñ a Nsisim, wula'ane fe a ngule Nsisim ate.

Atiñe Krist

²⁶ E mbo'an te bo mebun e zañe jangan, a te soñ mintañete a minyamete wua a nyô mbok.