GALATI 3 - Kalate Zambe Nnomo a Mfefe Mfefé Nkôñelan

Mekute me bôte ya Galati

¹ A mekute me bôte ya Galati, za nye a nga ndumekane mia, éyoñ e ne na, Krist ntyelan élé yôp, a nga kañeteban e mise menan été'

² E jame dina étam nde faane ma éfufup: ye amu mba'alane metiñ nde mi nga nyoñe Nsisim? Ye e nji bo amu ñwô'ane mi nga wô'ô Mbamba Foé ya mbunan'

³ Ye mi ne aka'a nkôñ mekute te? Mia mi nga taté a Nsisim, ye mia ye ke sondô a minsôn'

⁴ Ye abime ñyemane te e mbe zezé? A na, nge ô mbe zezé,

⁵ nyô a ve mia Nsisim a bo bitua bi mam e zañe jenan, ye a bo mam mete amu mba'alane metiñ? Ye sa amu mi nga wô'ô Foé ya mbunan'

Ebotane * bebuni amu Abraham

⁶ Amu Abraham a nga bili mbunane be Zambe, ane ô nga lañebane nye mfa'a ya *zôsôô,

⁷ yemane ñhe na, *bebuni, mbe be ne bone be Abraham.

⁸ E ne fe na, ntilan wo taté yené ôsu na, Zambe a ye kale bikuu ve a zene ya mbunan. A nga taté kate Abraham foé éte na: Meyoñe mese ma ye yen ébotan e be wo.

⁹ Ajô te ba be ne *bebuni, be bili bibotan baa be Abraham, mbuni.

¹⁰ Ke beba'ale metiñe bese, be ne e biyo'é si. Amu e ne ntilane na. Biyo'é bi bo'o e be nyô ase a nji ke ôsu a ba'ale mame mese me ne ntilane kalate metiñ.

¹¹ A e ne teke bisô na, teke môt a ye kabe amu metiñ asu Zambe, éyoñ e ne na, e môt a ne *zôsôô amu mbunan nye a ye nyiñ.

¹² Amu na metiñ me nji so e mbunan. Ve mfa'a metiñ, nyô a jalé mintilane mise ya été a ye nyiñ a me.

¹³ Krist a nga mane ya'ane señe jangan mfa'a ya kôté bia e biyo'é ya metiñ, a a nga bobane biyo'é e señe jangan, ane e ne ntilane na: Biyo'é bi bo'o e be nyô ase a tyele élé yôp.

¹⁴ E nde te ébotan Abraham ja ye kui e be bikuu amu Yésus Krist, ane bi ne ngul ya nyoñe Nsisime ya ntiñetan amu mbunan.

Ngaka'a, a ésaé metiñ

¹⁵ A bobejañ, bi tame fombô a yen ane bôt be wô'ô zu ba bo mam. Eyoñ kalate nkaban élik a ne ngômôtô, teke môt a ne tyame nkaban ôte nge kô'ôlane wô.

¹⁶ E ne na, mengaka'a me nga boban e be Abraham a mvoñe bôte jé, aval ane nge a mbe ajô ya abui bôt, ve a mbe ajô môte wua: a mvoñe jôé, e ne na Krist.

¹⁷ Osimesane wom ñwô wu: kalate nkaban élik a ne *mvo'é a nga taté mane boban e be Zambe. Atiñ e nga so mvuse mimbu mintete minyin a mewômela, e nji bo ngule ya bo ngaka'a momo.

¹⁸ Amu nge éli'i ja nyoñeban amu metiñ, e nji fe bo a *zen ya ngaka'a. Amu Zambe a nga mvamane Abraham amu ngaka'a.

¹⁹ A taté éyoñ éte, metiñ me ma beta fe volô jé? Ma ba'aban a kô'ôlan fo'o ve na, ntyamane metiñ ô yené nté ma yange nsoone mvoñe bôt, nje éte ngaka'a é nga tiñetiban. Ngaka'a éte é nga kateban a *zen ya b'éngele, a wo ya ntebe zañ.

²⁰ Amu ntebe zañ ate a nji bo ntebe zañe ya môte wua. Ve Zambe a ne wua.

²¹ Ye metiñ ma wosane mengaka'a me Zambe? Teke bebé: nge *atiñ éziñ e nga veban, e nde e bili ngule ya ve ényiñ, wôna *zôsôô a nga ye so metiñ.

²² Ve mintilan mi nga liti na, *si nyô ése é ne nkôm *abé si, nde, amu mbunane ya buni Yésus Krist, ngaka'a é nga jalébane mfa'a *bebuni.

²³ Mbunan ô ngenane te so, bi nga vaa éto belo ya metiñe si, nté mbunan ô nga yiane yené ô mbe momo.

²⁴ Ajô te ñhe metiñ me nga too mba'ale nté bi nga yange Krist, nde bia ye kaleban amu mbunan.

²⁵ Ve éyoñe mbunan ô soya, bi nji fe bo éjôé mba'ale ate si.

²⁶ Mia bese, amu mbunan, mi nto bone be Zambe e be Yésus Krist.

²⁷ Yaa, e mia bese mi nga dubane be Krist, mi nga jaé Krist.

²⁸ Mone Yude a nji ke fe bo, nge mone Grék, a *ôlo ô nji ke fe bo, nge *nti, fam é nji ke fe bo, nge minga, amu mia bese mi ne jôme jia e be Yésus Krist.

²⁹ A, nge mi ne ba be Krist, wôna mi ne mvoñe bôt Abraham. Amu ngaka'a, mi ne benyoñe ngap.