GALATI 2 - Kalate Zambe Nnomo a Mfefe Mfefé Nkôñelan

Paul ba minlôman ba kui tyiñ

¹ Wôna, e mvuse mimbu awôm a minyin, me nga beta bet a ke Yérusalém, bia Barnabas. Me nga kee fe Tite e nsamba wom.

² Amu me nga bet a ke wé a nlitan éziñ. A me nga kañete be Mbamba Foé ma kat e be bikuu. Me nga kañete fe nye a *zen ya minlañ e zañ bia be beta be bôt, a za bo a *zen éziñ na, ma mate mbi nge mane wu mbile zesé.

³ Ve be nji yemete Tite, e nye bia nye bi mbe nsamba na, a tyi'iban atyel.

⁴ Nalé a mbe amu mbia be bobenyañ be nga nyiin asoé a jeñe zene ya ndaman éto fili jangan ja so bia e be Krist a toé bia belo.

⁵ Bi nji suu biabebiene si e be bôte bete, ja'ane kui *tyiñ a be nté éziñ, e nde benya mejôô ya Mbamba Foé ba ye bo ñyemetan amu mia.

⁶ Ve mfa'a beta be bôt, akôsa bo nkôñe wop, nalé nye teke me ajô: Zambe a nji semé ngum avale môt. Ve akôsa bo nalé, bôte bete be nji tindi ma jam afe éziñ a ngu.

⁷ Ve be nga su'ulane yene na, ésaé nkatane Mbamba Foé e be tee mintyi'ibane metye é nga vebane be ma, aval ane é nga vebane be Pierre e be mintyi'ibane metye.

⁸ Amu nyô a nga bo Pierre nlômane be mintyi'ibane metye, nye fe a nga bo ma *nlôman e be bikuu.

⁹ A, amu ñyemane ya yeme *mvam é nga vebane be ma, Yakob, Séfas a Yôanes, mbe be nga yené ane mekôn, be nga batane bia Barnabas, ndeme élat ya mfulan ésaé, nde bia ye ke be bikuu, be ki be kele be mintyi'ibane metye.

¹⁰ E too ve na, bia yiane simesane minzôzoé, e ne jame me nga nyoñe nju'u ya bo.

Paul a nji kui * tyiñ a Pierre Antiôche

¹¹ Ve éyoñe Séfas a nga so Antiôche, me nga liti ne ngeññ na me nji bo *tyiñ a nye bi lôane mesu mesu, amu a mbe nkoban été.

¹² Amu na, te yene bôt be nga bômane Yakob be za so'ok, a nga bo a ja'ak a bikuu. Ve éyoñ be soya, a nga bo bikôñ, a tyetebe, a ko mintyi'ibane metyele woñ.

¹³ Ane beyude bevok be nga bo ane nye, ja'ane Barnabas, a nga dutubane fe, a bo nalé.

¹⁴ Eyoñe me nga yene na be nji wulu *zôsôô, aval ane benya mejôô me Mbamba Foé me né, me nga jô Séfas e bôt été na: Nge wo, mone beyude, wo nyiñ aval ane bikul bia nyiñ, ve saa aval ane beyude, ô ne yemete bikul aya na, be bo ane beyude'

¹⁵ Bia, bi ne bebialébialé ya beyude, saa bikuu, bebo mam *abé bete.

¹⁶ Ve bia yeme na, môt a nji kabe amu mimboone mi mam ya metiñ, ve a mbunan a buni Yésus Krist. Bia fe bi nga buni Yésus Krist, saa mimboone mi mame ya metiñ, amu teke môt a ye kabe a mimboone mi mame ya metiñ.

¹⁷ Ve nge a njeñane ya jeñe mekabe e be Krist, bia fe bi nga yené bebo *abé, ye Krist a ye bo mbo ésaé ya *abé? Teke bebé!

¹⁸ Amu nge ma beta lôñe jôme me nga tyam, ma ma bobane ntyame metiñ.

¹⁹ Amu na a *zen ya metiñ, me nto ñwuan mfa'a ya metiñ, e nde te ma ye nyiñe mfa'a Zambe. Me ntoo ntyelan élé yôb bia Krist; a sa ke mamien ma nyiñ, ve Krist nye a nyiñe be ma.

²⁰ Amu ényiñe jame ya minsôn été va, ma nyiñe je, a mbunane ya buni mone Zambe, nye a nga nye'e ma, a ve émien amu ajô dam.

²¹ Me nji bo mvame Zambe na é bo momo. Amu nge môt a kui vôme ya bo *zôsôô a zene ya metiñ, wôna Krist a nga wu éwuwui.