FILIP 3 - Kalate Zambe Nnomo a Mfefe Mfefé Nkôñelan

Bikotekote beye'ele

¹ E jame ma su'ulane jô a bobejañ, e ne na: Va'ane be Nti. Me nji jañele jôm éziñ éyoñe ma tili mia avale mame da, a mfa'a wônan, nalé a yemete mia.

² Taba'ane bemvu ntye! Taba'ane mbia bebo bisaé ntye! Taba'an ékotekote ntyi'ibane metyele ntye!

³ Amu bia bi ne mintyi'ibane metye, e bia bia kañ a Nsisime Zambe, e bia bia futi duma dangan e be Krist Yésus, a bi nji tabe biabebiene mebun.

⁴ Akôsa bo nalé, me bili beamu ya tabe mamiene mebun. Nge môt éziñ a buni na a ne tabe émiene mebun, me ne ngule ya dañe tabe mamiene mebun,

⁵ ma, nyô a nga tyi'iban atyele môse muame, mvoñ Israél, mvô'ô Bényamin, bialébialé mone Hébre. Mfa'a metiñ, me ne Farizieñ;

⁶ mfa'a nye'ane ya bo ésaé, me mbe nkpwe'ele keké, mfa'a *zôsôô a yené metiñ, me mbe te bijô.

Yésus a nga bi ma

⁷ Amu e mame mese me nga too ane nsenge mfa'a wom, ma yene me ane los amu Krist.

⁸ Ma yene na, mam mese me ne los éyoñe wo ve'ane me a beta mvaé a dañ, nye ate a ne ñyemane ya yeme Yésus Krist Nti wom. Amu nye me maneya jañele mam mese, a ma yene me mese ane mbuan, asu ya bi Krist ane ma'an,

⁹ a yené e be nye, saa fe a *zôsôô a ne éñwom, nyô a so metiñ, ve a nyô a so amu mbunane ya buni Krist, e *zôsôô a so e be Zambe, nyô a ye'ebe a mbunan.

¹⁰ E ne na, be yeme nye, émien, a ngule ya ñwômane wé, mfula'an a mintaé mié, a na be funane nye awu dé été.

¹¹ Ajô te bia ye kui e ñwômane miñwuan, nge e ne nguleya bobane nalé.

¹² Saa na, me maneya bi mam mete mese, nge na me ntoo *mvo'é é ne ngum. Ve ma ke ôsu a jeñe zene ya bi me, amu Yésus Krist a nga bi mamien.

¹³ A bobejañ, me nji yene na me biya me, susu'a jam ma tyelé nleme yôp a ne na, éyoñe me vuaneya dulu ya mvus, a same *nlem ôsu,

¹⁴ me tôñesan e jame ma sôñ, asu ma'an me tii a e nloone ya yôp, ñwô Zambe a loone bia e be Yésus Krist.

¹⁵ Bia bese, e ba be ne nya *mvo'é, e ntaba'ane ñhe nalé. A nge mfa'a éziñ mia wulu aval afe wôna, e mfa'a ôte fe, Zambe a ye faé mia éfufup.

¹⁶ E nté bia yange vôme bi kuiya nyô, e ñwula'ane zene jia.

¹⁷ Mia bese, nsamba wua, a bobejañ, vuane ma a fomba'ane ba ba wulu ane éve'ela mi bili mfa'a wongan é né.

¹⁸ E ne été na, bôt abui, ane me mbe me jô'ô mia de biyoñ biyoñ, a ma beta ba'alane mia de éyoñe ji a mili'i mise na, ba wulu dulu besiñe Krôa Krist.

¹⁹ Asu'ulane dap e ne njañan. E *zambe wop a ne mebume map, a ba futi duma dap ôsone viap été, mbe bete minleme miap mi luu ve mame ya *si nyô.

²⁰ Amu mvô'ô jangan é ne yôb été, e vôme bia yange Nyii bôtô, nye a ne Nti Yésus Krist.

²¹ Nye a ye kôñelane nyôl ôsone jangan a bo je é funane nyôle jé é ne étôtok, a ngule ja ve nye nguleya futi biôme bise éjôé jé e si.