FILIP 2 - Kalate Zambe Nnomo a Mfefe Mfefé Nkôñelan

Njeñan Elat

¹ Nde nge nloon éziñ ô ne be Krist, nge mveane ngule *nlem e nye'an été, nge mfulane minlem e mfufube Nsisim été, nge ngule ya nye'e a wô'ane mintaé,

² ajô te, jala'ane meva'a mam éyoñe mi ne tyiñe jia. Biane nye'ane wua, a bo nleme wua. Jeñane nlatan.

³ Te boone jam éziñ a mesengan, nge a mebun asu bone be mam, ve a éjoté nyô, yenane bôte befe na ba dañe mia.

⁴ Môt a bo'o te simesane ve émien, ve a simesa'ane fe bôte befe.

Yésus, mbetane wo dañe yôp

⁵ Mi bian aval ôsimesane te e be mia, avale da boban e be Yésus Krist na,

⁶ nye ate, a ne avale fe ane Zambe, a nji yene nkôñe wua a Zambe ane jôm a yiane bi a ngu

⁷ Ve a nga bo émien éwôwôlé, a nyoñ éto mbo ésaé, a bo émiene na a funane môt, a amu a nga yené ane môt,

⁸ e nde a nga suu émiene si, a bo mewôk a kui awu, awu e Krôa yôp.

⁹ Ajô te Zambe a nga dañe bete nye yôp a ngule jé a ve nye jôé da dañe môé mese.

¹⁰ Ane aboñ ese da ye kutubane si amu jôé Yésus, mfa'a ya yôp, mfa'a ya si a e si été,

¹¹ a na, ôyem ôse ô meme na, Nti nye a ne Yésus Krist.

¹² Ajô te a bôt ma dañe nye'e, mia mia zu mia bo mewôk biyoñe bise, bo'one nalé, saa ve éyoñe me né, ve a dañe dañ éyoñe me ne momo. Bo'one nyiane wônan ô bo ésaé e woñ a mfô'ôban été.

¹³ Amu Zambe nye a bo mia mi bi nkômban a mboon aval ane mbamba nta'ane mame wé a né.

¹⁴ Bo'one mam mese te menyiñ nge minsitik,

¹⁵ nde mia ye yené te bijô a teke jam da ndeñele mia, mi too bone be Zambe, be ne teke ayeñ, ézezañe ya miaé bôt ô ne ézezam a ndaman wu, e vôme mia yené ane menjeñe m'éfufup e si nyôna été;

¹⁶ e mia mi be'e mejô ya ényiñ; e duma dame le asu môse Krist, amu da ye yené na, me nji mate mbil émate mate, nge wu njuk e zezé.

¹⁷ A ja'ane metyi mam ma sôéban ane ényunyui ba sôôé étyi'a a ésaé ya mbunane wônan yôp, me ne mevak a jame te, a ma vak a mia.

¹⁸ Avale te fe mia, taba'ane mevak été a vak bia be mia.

Esaé Timôté baa Epafrôdite minlôman mi Paul

¹⁹ Ma buni na, e be Nti Yésus, ma ye ji'a lôme mia Timôté, nde ma fe ma ye bi ngule nyô amu mefoé ma ye nyoñ me so'o be mia.

²⁰ Me nji bi môte mfe a kaban asimesane dam, e nyô a kôme tyelé nleme yôp ajô mam ma nambe mia.

²¹ Bese be lôô fo'o ve mfi wobe bebien, saa ñhe wu Yésus Krist.

²² Ve nye, mia yeme na, a nga liti mboone wé: Aval ane mon a too e fefel ésaa, a nga fubu ésaé Mbamba Foé bia nye.

²³ Nye ñhe ma buni na ma ye lôme mia, ataté éyoñe ma ye tu'a yem été ja yange ma,

²⁴ me too ndi e be Nti na ma fe ma ye zu ana'ana.

²⁵ Akôsa bo nalé, me nga yen e too mfi na me lôme mia Epafrôdite, mojañe wom, ébe mbo ésaé a nyô bia nye bia wosan, nyô mi nga lôme na a zu saane ma e minkômbane miam été

²⁶ amu a nga bili beta nkômbane ya beta yene mia bese, a a nga bili njuk e *nlem amu foé mi nga nyoñ ajô ôkone vié.

²⁷ E ne fo'o na, a nga kon bebé ya wu, ve Zambe a nga ko nye éngôngo, a saa ve nye étam, nalé fe ma, me za bo ve ôlun ôlun.

²⁸ Ajô te ma ji'a bulane mia nye. Ndemben éyoñe mia ye yene nye, mia ye beta vak, a na, me ki me bo te beta dañe wô'ô ôlun.

²⁹ Ajô te nyoñane nye a beta mevak e be Nti. A bian ésemé e be bôt aval ane nye,

³⁰ amu a nga ye wu amu ésaé Krist. A nga ye dimili ényiñe jé, éjiane ya jôme miabebien mi mbe te ngule ya bo mfa'a ya saane ma.