EZEKIEL 10 - Kalate Zambe Nnomo a Mfefe Mfefé Nkôñelan

Metye'e me nduan, mfefé ñyenane vagoñ

¹ Eyoñe te me nga fombô a yene na, mfa'a ñyeme yôp ô nga too Bekerubime yôp, jôm é yené'é an'ako'o safir, jôm é yené'é an'éve'ela éto njôan.

² A nga jô môt a be'e éfumulu ngômesane na: Nyi'ine zañe minka mi ne Bekerubime si jalé'é mo môé a ma'a me nduan wo ye nyoñe zañe Bekerubim, wôna miala'ane me e tison. Nde a nga nyiin mise mam me lôô.

³ Eyoñ a nga nyiin Bekerubim be nga tele mbo nnôme ya Nda Zambe a *nkut ô nga jaé nseñe y'été.

⁴ Etôto'o Nti é nga kôlô kérubime yôp a lumbu mfa'a mbala'asi ya *nda Zambe ô mbe. Nda Zambe é mbe njalan a *nkut a nseñe ki njalan a mfaane y'étôto'o Nti.

⁵ Eduñe mefabe Bekerubim é nga wô'é a kui nseñe y'atan aval'ane tyiñe Zambe a ne ngul ése éyoñ a kobô.

⁶ Eyoñe Nti a nga bendé môt a be'e éfumulu ngômesane na: Nyoñe nduan e zañe Bekerubim! Nde môt ate a nga ke tebe fefele nka.

⁷ Wua ya Bekerubim a nga same wo nduan é mbe nye bebé a to'é ma'a me nduan été a jalé me mo môt a be'e éfumulu ngômesan, nye ve nyoñ a kee me.

⁸ Bive'ela bi mo me môt bi nga yené mefabe Bekerubim si.

Bekerubim a minka

⁹ Ane me nga fombô a yene minka minyin fefele Bekerubim, nka wua fefele kerubim ase a minka mite mi nga faé an'ako'o krizôlit.

¹⁰ Nyenane ya mis, mise minyini mi mbe avale da; nka ôse ô nga yené ane nge ô ne ézezañe nka ôfe.

¹¹ Eyoñe mia ke ôsu, mi mbe nguleya ke meku'u menyin; teke ke fefe; ve mi mbe mi kelek mfa'a nlô wo liti mie zen; mi mbe te ke fefe.

¹² Nyô, mvus mo a mefabe Bekerubim bi mbe njalane mis mbôma'an; avale te fe minka, minka be benyini be nga be'e.

¹³ Me nga wôk be lo'one minka mite jôé na ôlende.

¹⁴ Kerubim ase a nga be'e mesu menyin: di ôsu é too di kerubim, di baa é too di môt di lale é too di ngbwengbwem a di nyini é too di ndôé.

¹⁵ A Bekerubim be nga bete yôp: be mbe bevevee be biôm me nga yene bebé ôsôé Kébar.

¹⁶ Eyoñe Bekerubim be mbe be wulu'u, minka mi mbe mi wulu'u fefele jap; éyoñe Bekerubim be mbe be ndamé'é mefabe map asu ya kôlô si a yele, minka fe mi nji tebe fefe ve lat a be fefele jap.

¹⁷ Eyoñe Bekerubim ba tebe, minka fe mi tebe éyoñe ba bet, minka fe bi beté a be; amu nsisime bevevee be biôm ô mbe mie été.

¹⁸ An'étôto'o Nti é nga kôlô mbala'asi ya *nda Zambe a bebe Bekerubime yôp.

¹⁹ Nde Bekerubim be nga ndamé mefabe map a kôlô si, mise mam me lôô éyoñe be nga ke, minka mi tôñe be. Be nga tebe anyiine *mbé ya Nda Nti mfa'a jôbe da tôô; a étôto'o Zambe Israél é mbe be be yôb été.

²⁰ Be mbe betite me nga yen e Zambe Israél si bebé ôsôé Kébar; a me nga yeme na be mbe Bekerubim.

²¹ Wua ase a mbe a be'e mesu menyin, mefabe menyin a mo me bôt me nga yené mefabe mabe si.

²² Mesu map me nga funane ma me nga yene bebé ôsôé Kédar; aval éyeka'a da, be mbe fo'o bebien. Kérubim ase a mbe a wulu'u tetele ôsu vié.