EZAYI 9 - Kalate Zambe Nnomo a Mfefe Mfefé Nkôñelan

¹ E bôt ba wulu dibi été, be lôô beta éfufup; éfufup ja faé e be ba be too sii nsisiñ y'awu.

² Wo bo ayoñe bôte na e bo abui; wo ve de mevak. Da vak meva'a ya nkôane bidi asu dôé, aval ane bôt ba vak éyoñ ba kabane biôme ya nsa.

³ Amu ébôñeté é nga titi nye yôp, nkasa ô nga bôme nye mvus, a ôlé môt a tibili nye, ô bu'uya bie ane môse ya Madian.

⁴ Amu ékôndé ése ba jaé éndundumba été, a alô'ô ése ba te dube metyi été, ba ye wua bie nkaba'a nduan été naa nduan é mane di'i bie.

⁵ Amu mon a vebaneya be bia, monafam a bialéya be bia, a ngule ya jôô bôt ja ye bebe nye bitule yôp, ba ye loone nye na: étua môt, Mbôndé mefek, Zambe a ne ngu, Esaa a too nnôm éto, Njôô ya *mvo'é.

⁶ A ye telé a yemete njôan ô ne ndam a e *mvo'é é ne teke nné, asu éto njôane David a asu éjôé jé. A ye yemete a telé bie, e *zôsôô a nya ntyi'ane mejôô yôp, ataté éyoñe ji a kui nnôm éto, ntindane Nti ya nnôm éto ñwô wo ye bo jame te.

Bibubua Nti a kuli Samari

⁷ Nti a wuaya Yakob éfia, éfia te é biya Israél.

⁸ Mam ma tôñ éfia te, ma ye nambe bôte bese. Efrayim a e môt a too Samari, be jô'ôk mebune mab été na:

⁹ Brik é maneya ku si, bia ye lôñ a meko'o me ne mbaan; be kpwéya besikomor si, bia ye tyendé be a besédre

¹⁰ Nti a teléya nye Retsin e ngame yat, a veleya besiñe bé ôyo,

¹¹ Besirieñ mfa'a y'ôsu a Befilisteñ mfa'a ya mvus, a be maneya kui menyu a min Israél. Akôsa bo mam mete mese, ayaa dé e nji bulane mvus, a wo wé ô ngenane nsaman.

¹² Ve bôt be nji bulane be nyô a nga bôme be, be nji ke jeñe Nti ya *minsamba mewosan.

¹³ Ajô te Nti a nga tyi'i Israél nlô a njem, ntem alen a nkaé môse wuwua;

¹⁴ *mvendé môt a nyô a bili duma, mbe be ne nlô; *nkulu mejô a ye'ele minsos nye a ne njem,

¹⁵ betebele y'ayoñe di be nga bo na ayoñ e dimi fé, a e bôt betebele bete be nga liti *zen, be nga mineban;

¹⁶ ajô te Nti a ye bo te yene bendôman y'ayoñe dina mvaé, nge wô'ô bobenyui a minkuse mié éngôngo; amu bese be ne bebo abé a bebo mbia be mam. A menyu mese ma ba'alane mejô ya *te fek. V'amu mam mana mese, ayaa dé e nji kôlô, a wo wé ô ngenane nsaman.

¹⁷ Amu mboon *abé wo yôñ ane nduan ja di'i biyo a ndôé, a kalane bisaé y'afan, nsum ôtita ki ô bete yôp

¹⁸ si é ne nkuan amu ayaa Nti ya *minsamba mewosan e dañeya abui, a bôt be ntoo ane jôme nduan ja bi; teke môt a kame monyañ.

¹⁹ Ba tyi'i ôfus mbo nnôm, ve beta wô'ô zaé, ba mine wu vo'o mbo ngal, ve teke jaé, môt ase a mine minsône ya wo wé.

²⁰ Manasé a di Efrayim a Efrayim a di Manasé, ba lat a wosane Yuda. V'amu mam mete mese, ayaa dé e nji kôlô, a wo wé ô ngenan ô same.