EZAYI 8 - Kalate Zambe Nnomo a Mfefe Mfefé Nkôñelan

Kpwatôla y'Asiri

¹ Ane Nti a nga jô me na: Nyoñe beta éfase étyimbi ya tili, a tili été avale môt a ne yeme lañe na: E be nyô a ne jôé na Maher Salal As Baz,

² me nga nyoñe bengaa ya buni môé na: Uri, *ntuni a Zakari mone Bérékia.

³ Ane bia minga wom, a too nkulu mejôa minga, bi nga jô'ôbô, nde a nga nyoñ abum a biaé monafam. Ane Nti a nga jô me na: Yôlé'é nye jôé na: Maher-Salal-As-Baz.

⁴ Amu na te na mon a yeme loone «Papa» ba «Mama» ba ye kee akume ya Damas a biôme bi nsa ya Samari ôsu be njô bôte y'Asiri.

⁵ Nti a nga beta kobô ma a jô na:

⁶ amu bôte ba be nga biasé mendime ya Siloé, mme ma lôt ôte'etek, a be nga vak amu ajô Retsin a di e mone Remalia,

⁷ Ajô te, amu nalé, ô lôô Nti a zuu ndône beta mendim y'ôsôé me ne ngu e be be: nalé a ne na, njô bôte y'Asiri a duma dé ese. Osôé te wo ye kui ndôn A yandane mekindi'i mé mese;

⁸ wo ye kôñelan a wosane Yuda. Wo ye kui ndôn a yandan abui mevôm, wo ye kui nné *tyiñ. Ndamane ya mefabe mé wo ye jalé ndame ya si jôé a Emmanuel!

⁹ Mia *meyoñ me bôt, mi kusa bo bilat e zañe jenan, beta woñ a yange mia. Mia mesi me n'ôyap, tuka'a vô'ôlan: mi ne kômesane mewosan, ve beta woñ a yange mia. Yaa, mi ne fo'o kômesane mewosan, ve beta woñ a yange mia.

¹⁰ Kelane mi bôndé mefek ma ye bo momo! Jô'an ajô éziñ, da ye bo te k'ébô'a! Amu Zambe a ne be bia.

¹¹ Amu avale di nde Nti a nga kobô ma, éyoñe wo wé ô nga bi ma, a éyoñ a nga ve ma ayemé na: me bo te wulu e zene bôte bana;

¹² te mia loone jôm ése ayoñe bôte di da loone njoñ ya kpwé éjôé na njoñ ya kpwé éjôé; mia ye bo te ko e jôm ése ba ko woñe woñ, a mia ye bo te mate je.

¹³ Nti ye *minsamba mewosan nye mia yiane telé étyi, nye mia yiane ko woñ, nye mia yiane mate,

¹⁴ a ye bo vôme y'étyi, a ako'o ya bidim. Akôm ékolé ôbak asu menda me bôte mebaé ya Israél, avot a ôlam asu bôte be too Yérusalém.

¹⁵ Abui bôt da ye kolé ôba'été, ba ye ku a bu'i, ba ye bili ôlam, a ba ye bi be ngbwa.

Foé * nkulu mejô asu melu ma zu a den

¹⁶ Futi'i nkulane mejô abam été, fete ñye'elane wu abam été, beyé'é bam be too bengaa.

¹⁷ Ma yange Nti a solé asu dé e be *nda Yakob, me too nye ndi.

¹⁸ Bia be bone Nti a nga ve ma bi ne mendem a ékate foé Israél été, mendem a ékatefoé Nti ya *minsamba mewosan, nyô a too nkôle Siône yôp.

¹⁹ A nge ba jô mia na: kela yenane bebi'i bekôn, mimvimvi'i, beloñe vioñ a bekobô menyiñ, ye bôt be se nguleya sili bezambe babe mam, nge sili bewu mam asu bevevee'

²⁰ Mia ye yalane na: bia yiane fombô avale ane miñye'elan a minkulane mejô mi Nti mia jô. E môt a bo te semé abendé di a ye bo te yen melende me tyé.

²¹ Njuk a zaé bia ye bi bôt éyoñe ba ye wulu a tulane si; a éyoñe zaé ja ye bo, bôt ba ye wô'ôlun, a yo'é njô bôte wop, a ba ye same mise yôp.

²² Wôna éyoñ ba ye kôñelan mfa'a ya si, ba ye koon ôlun, dibi a ntyelane minleme yôp; a ba ye wuaban afibe dibi été.

²³ Ve dibi da ye bo te jôô nnôm éto, mfa'a ya si, e vôme biyebe bi né éyoñe ji; nge melu ya atata'a me nga bo na, sii Zabuloñ a sii Néftali bi bo jôm ba biasé, melu ma zu, ma ye ve zene ya mañ, e Yordane yat, sii *meyoñ me ne te yeme Zambe duma.