EZAYI 7 - Kalate Zambe Nnomo a Mfefe Mfefé Nkôñelan

Nkulu mejô Ezayi ba njô bôt Akaz

¹ Melu Akaz, e mone Yôtam, mone Ozias, njô bôte ya Yuda, mme Retsin, njô bôte ya Siri, ba Péka, e mone Remalia, njô bôte ya Israél, be nga ke bita Yérusalém na be wosane nye; ve be nji bo nguleya wosane nye.

² Nde be nga kate *nda bôte David na: Besirieñ be vuleya minkan Efrayim. Ajô te nleme Akaz a wu bôte bé mi nga fô'ôban ane bilé ya fé bia fô'ôban a évuñulu.

³ Ane Nti a nga jô Ezayi na: Kuik atan ô ke tôbane Akaz, mia Sir-Yasub mone wôé, mfa'a aku'u nkoñ ébata y'akôé, e zene ja lôt afube ndube biyé.

⁴ Wo ye jô nye na: tabe'e ne séé, te ko jôm éziñe woñ, nleme wôé fe ô bo'o te ko woñ ôsu ya bisi'i bi nduan bite bibaé mbie bia kui ôtita, ôsu ya ayaa Retsin a Siri, a e mone Remalia.

⁵ Amu Siri a jeñe wo abé ba Efrayim a mone Remalia mbe ba jô na:

⁶ mbetan bi ke wosane Yuda, bia ye bo na tison é ko woñ, bia ye mane tyame je akekui ja ye tek, a bia ye telé njô bôt e zañe jé: e mone tabil

⁷ Avale di nde Nti a jô na: jame te é se nguleya tabe ayap jame te é se nguleya boban.

⁸ Amu na Damas nye a ne nlô ya Siri A Retsin ki nlô ya Damas. A li'iya mimbu mewôm metan, wôna Efrayim, éyoñ a bu'ubaneya, a ye bo teke fe beta bo ngum ayoñ.

⁹ Samari a ne nlô y'Efrayim. A mone Remalia a ne nlô ya Samari nge mi nji yeme ngu mbunane wônan été, mia ye bo teke dañ.

¹⁰ Ane Nti a nga beta kobô Akaz a jô nye na:

¹¹ sili'i Nti, e Zambe wôé, ndem asu dôé, sili'i je nge mewôm me ne mfa'a ya si nge ma me ne mbetane yôp.

¹² Akaz a nga yalane na: Maa ye ke sili jôm, maa ye ke ve'ele Nti.

¹³ Nde ñhe Ezayi a nga jô na: Vô'ôla'an a *nda bôte David! Ye e dañeya mone Jam mfa'a wônane na: mi ve bôt ate'e nyôl, a na mi ve fe Zambe wom ate'e nyôl'

¹⁴ Ajô te Nti émien a ye ve mia ndem: mi lôô ngone minga é ntoo abum, Ja ye biaé monafam, a ja ye yôlé nye na: Emmanuel.

¹⁵ A ye di mbon a wôé, akekui éyoñ a ye yeme bene jôm é n'abé, a tobe ji é ne mvaé.

¹⁶ Ve da na te na mon a yeme bene jôm é n'abé a tobe ji é ne mvaé, e sii bejô bôte bebaé ba kumetane wo nlem ja ye bo teke fe môt.

Minlo a mvôfôm bia soo abui minjuk

¹⁷ Nti a ye soo melu be wo e be bôte bôé a *nda bôt ésoo mme me nji tame yené ataté *môs Efrayim a nga kandane Yuda. Njô bôte y'Asiri.

¹⁸ Môs ôte Nti a ye selé minlo mi né e susu'a ya éfuse si ôsôé y'Ejipte wo ve atek. Nalé fe bemvôfôm be ne Asiri;

¹⁹ Minlo a bemvôfôm bete ba ye zu a bese ba ye bebe e bone mimbi'ili be ne nlumbu abui, e minsalane ya mekôm, e bisaé bise a Miñyanebe mise.

²⁰ Môs ôte, Nti a ye tyeñ ôtyenjeñ ñwô a ye kus Efrate yat, jame te da yiane fombô njô bôte y'Asiri, a ye tyeñe mia minlô a mimvote mise ya nyô, nalé fe zel.

²¹ Môs ôte, môt ase a ye ba'ale étoñe ngale nyak a mintômba mibaé;

²² menyañ ma ye bo étua abui avale ya na bôt ba ye di mbon. Amu môt ase a ye li'i, a too si éte, a ye di mbon a wôé.

²³ Môs ôte, a ye bo na, e vôm ase mindi'i mi woon toyini mi né, mi too besikele be argent toyini, minsinik a biyo bia ye kui vôm ate.

²⁴ Ba ye nyiin été a mekoñ a bilaé Amu si ése ja ye bo ve minsinik a biyo.

²⁵ Mfa'a ya minkôle mise be nga bé a ébak; woñe minsinik a biyo wo ye bo momo, ve benyak a mintômba bia ye di été.